РЦИ-Аланийы Хицауады Сæрдары фыццаг хæдивæг Атарты Георгийы разамындæй цы кусæг æмбырд ацыд, уым æркастысты, федералон паддзахадон географион информацион системæ «Иугонд цифрон платформæ «Тыгъдадон бæрæггæнæнты национ системæ» («Единая цифровая платформа «Национальная система пространственных данных») регионы царды куыд уагъд цæуы, уымæ. Архайдтой дзы æххæстгæнæн хицаудзинады оргæнты разамонджытæ æмæ республикæйы районты бынæттон хиуынаффæйады администрациты минæвæрттæ.
Цæгат Ирыстоны æххæст кæнын райдыдтой, ацы азы кæронмæ Уæрæсейы Федерацийы æппæт субъектты фæзуатыл дæр пайда кæнын кæмæй райдайдзысты, уыцы иугонд цифрон платформæ «Тыгъдадон бæрæггæнæнты национ системæ».
Куыст цæуы технологион цыд æмæ рæзт фæхъомысджындæр кæныныл. Иугонд цифрон платформæ баиу кæндзæн зæхх æмæ æнæзмæлгæ мулчы объектты тыххæй бæрæггæнæнтæ, иу ресурсыл æрæмбырд кæндзæн дзыллон кадастрон картæтæ, хъæутæ æмæ горæтты арæнтæ, сæрмагонд хъахъхъæнинаг фæдзæхст бынæттæ æмæ афтæ дарддæр.
Атарты Георги 2026 азы ноябры кæронмæ бахæс кодта хъæугæ мадзæлттæ саразын æмæ райдайын паддзахадон æмæ муниципалон лæггæдтæ Тыгъдадон бæрæггæнæнты национ системæйы æххуысæй дæттын. Куыд бахахх кодта, афтæмæй платформæйæ пайда кæнын у ахсджиаг стратегион къахдзæф, йæ руаджы республикæйы фæзуæттимæ архайын æнцондæр у, бæрзонддæр кæны паддзахадон лæггæдтæ дæттыны хæрзхъæддзинад.
– Арæзтад æмæ Финансты министрадтæ иумæ хъуамæ алыг кæной хъæугæ æхцайы фæрæзты фарста, дарддæр та «Росреестр»-имæ иумæ æркæсын хъæуы техникон хæслæвæрды фарстамæ: модуль хъуамæ йе ‘ппæт дæр уа автоматизацигонд. 1 августмæ уыцы куыст бакæнын хъæуы, цæмæй ноябры кæронмæ федералон æмæ регионалон информацион системæтæ платформæйы баиу уой, – фæбæрæг кодта Атарты Георги.
Цифрон платформæйы рæзт æмæ æмбæлгæ куысты, республикæйы бынæттон хицаудзинады оргæнтæ территориалон пъланарæзт æмæ горæты нывæзты зонæты документтæ паддзахадон информацион системæмæ бахæссыны тыххæй æмбырды архайджыты базонгæ кодтой республикæйы паддзахадон исбон æмæ зæххытимæ ахастдзинæдты министры хæдивæг Датиты Олег æмæ арæзтад æмæ архитектурæйы министры хæдивæг Быдтаты Сергей.
Тыгъдадон бæрæггæнæнты национ системæ æркусын кæнынмæ цæттæгæнгæйæ, «Росреестр»-ы Цæгат Ирыстоны управлени республикæ æмæ районты бынæттон хиуынаффæйады оргæнтимæ иумæ ныридæгæн комплексон кадастрон куыстытæ сæххæст кодтой, бацæттæ кодтой æнæмæнгхъæугæ картографион æрмæджытæ, Иугонд паддзахадон æнæзмæлгæ мулчы реестрмæ (ЕГРН) сæ бахастой. Æххæстгонд æрцыдысты кадастрон хыгъдмæ хаст регионалон исбон æмæ муниципалон объекттыл бартæ райсыны паддзахадон регистрацийы куыстытæ.
Тыгъдадон бæрæггæнæнты национ системæйы руаджы федералон æмæ регионалон хицаудзинады оргæнтæн сæ бон уыдзæн оперативон æгъдауæй кæрæдзийæн хъæугæ бæрæггæнæнтæ дæттын, граждæнтæ æмæ бизнесы бон уыдзæн æнцонæй информаци райсын, æмткæй райсгæйæ, фæфылдæр уыдзысты регионтæм инвестицитæ æрбаздахыны гæнæнтæ.
Уымæй уæлдай, тыгъдадон бæрæггæнæнты национ системæйы сервисты руаджы граждæнтæн фенцондæр уыдзæн информаци æмæ лæггæдтæ райсын дæр.
РЦИ-Аланийы Сæргълæууæг æмæ Хицауады пресс-службæ
