Дзӕуджыхъӕу ӕфсӕнвӕндӕгтӕй баст у нӕ бӕстӕйы алы горӕттимӕ. Ӕрвылбон ардыгӕй бӕлццӕттӕласӕн поезд араст кӕны Мӕскуымӕ. Бонцухӕй та цӕуынц поездтӕ «Дзӕуджыхъӕу — Санкт-Петербург», «Дзӕуджыхъӕу — Адлер» ӕмӕ «Дзӕуджыхъӕу — Новороссийск».
«Ӕрмӕст 2019 азы мах нӕ бӕстӕйы алы рӕттӕм поездты арвыстам 91 мин бӕлццоны, нӕхимӕ та сластам 55 мин адӕймаджы. Бӕлццӕтты ӕнӕкъуылымпыйӕ сӕ нысангонд бынӕттыл сӕмбӕлын кӕнынӕй уӕлдай нӕ хӕс уыдис уыдонӕн фӕндагон лӕггӕдтӕ бакӕнын, цӕмӕй иннӕ хӕттыты дӕр разӕнгард уой поездты цӕуынмӕ. Ӕмӕ уымӕ дӕр сарӕхстыстӕм», — радзырдта нын ӕфсӕнвӕндаджы станцӕ «Дзӕуджыхъӕу»-ы хицау Чегемты Руслан.
Дарддӕр Чегемы-фырт куыд фӕбӕрӕг кодта, афтӕмӕй бӕстӕйы хицӕн регионтӕй адӕмон-хӕдзарадон бирӕ уӕзӕгтӕ ӕхсӕвӕй-бонӕй цӕуы станцӕйы товарон кӕртмӕ. Зӕгъӕм, артаг ӕмӕ сӕрдӕн ӕрмӕджытӕ нӕ республикӕмӕ ссӕуы Самарӕйӕ, цемент — Черкесск ӕмӕ Новороссийскӕй, агуыридуртӕ — Новокубанскӕй, ӕфсӕйнагӕй конд хӕйттӕ — Липецкӕй, хъӕдӕрмӕг — Сыбыры горӕттӕй ӕмӕ афтӕ дарддӕр… 2019 азы Цӕгат Ирыстон алыхуызон куыстуӕтты домӕнтӕм гӕсгӕ уӕзӕгтӕ райста 547 мин тоннӕйы бӕрц.
Утӕппӕт ӕрмӕджытӕ сӕ хицӕуттыл афоныл цӕмӕй сӕмбӕлой, уый тыххӕй товарон кӕрты арӕхстджынӕй пайдагонд цӕуы техникон фӕрӕзтӕй. Бацӕуӕн ӕфсӕнвӕндӕгтӕ кӕмӕ ис, уыцы куыстуӕттӕн компьютеры бӕрӕггӕнӕнтӕм гӕсгӕ фӕзӕгъынц, вагӕттӕ сӕм кӕд бадӕтдзысты, уый, ӕмӕ алы хатт дӕр афоныл ӕвдӕлонгонд ӕрцӕуынц.
Раст куы зӕгъӕм, уӕд Цӕгат Ирыстоны дӕр ис, уӕрӕсейаг промышленнон куыстуӕттӕм цы арвитӕм, уый. Гом акционерон ӕхсӕнад «Кавдоломит» доломиты ссад ӕрвиты бӕстӕйы алы рӕттӕм, “Авджы завод” — кварцы змис ӕмӕ авджы ӕндӕр хомаг. Сомихы республикӕйӕ та ардӕм автомашинӕты ласынц, минералон хъацӕнтӕ кӕмӕй арӕзт цӕуы, ахӕм ӕрмӕг — перлит, ӕмӕ товарон кӕрты вагӕтты ӕвӕрд цӕуы ӕфсӕнвӕндагыл Уӕрӕсемӕ арвитыны нысанимӕ.
Ивгъуыд азы бӕрӕггӕнӕнтыл куы дзурӕм, уӕд 466 мин тоннӕйы алыхуызон уӕзӕгтӕ ацыд нӕ бӕстӕйы алы рӕттӕм, ӕмӕ уый чысыл ӕнтыст нӕу ӕфсӕнвӕндаджы станцӕ «Дзӕуджыхъӕу»-ы кусджытӕн.
«Ай-гъай, нӕ архайд ӕнӕкъуылымпыйӕ кӕй цӕуы, уый у коллективы арӕхстджын фӕллойы руаджы. Цы 46 адӕймаджы нӕм ис, уыдонӕй алчидӕр бӕрнондзинад ӕнкъары йӕ куысты. Алы рады дӕр нӕм фӕкусы 7 адӕймаджы ӕмӕ ӕппӕтӕйдӕр фӕзминаг сты. Арфӕйаг куыст кӕнынц поездтӕ аразджытӕ Теджиты Игорь, Руслан Канчурин, Гегуты Зауыр, станцӕйы радгӕс Цъыккаты Чермен, кассир ӕлборты Новеллӕ, товартӕ чи фӕисы ӕмӕ сӕ ӕрвитгӕ дӕр чи кӕны, уыцы кусджытӕ Джиоты Жаннӕ ӕмӕ Такъӕты Зитӕ, стӕй коллективы иннӕ уӕнгтӕ», — зӕгъы Чегемты Руслан.
Тохсырты Къоста
Къамтӕ систа Къӕбысты Харитон
