Фӕстаг азты Цӕгат Ирыстоны хицауадон оргӕнтӕ фылдӕр ӕргом аздӕхтой нӕ республикӕйы фӕндӕгты арӕзтадмӕ. Уыдон, тугдадзинтау, анывӕзтысты нӕ горӕттӕ ӕмӕ хъӕуты ӕхсӕн. Уӕлдай рӕвдздӕр та нӕм сты федералон фӕндӕгтӕ.
Зӕгъӕм, Дзӕуджыхъӕуӕй Алагирмӕ фӕндаджы дӕргъ у 43 километры ӕмӕ рацарӕзт ӕрцыд 2018-2019 азты. Ныр фӕндаг бӕлвырд кӕй фӕуӕрӕхдӕр, уымӕй уӕлдай йыл ӕвӕрд ӕрцыд асфальты ног фӕлтӕртӕ ӕмӕ у фынджы хуызӕн лӕгъз. Хӕдтулгӕтӕ йыл дыууӕрдӕм кӕнынц ӕнӕкъуылымпыйӕ.
Уавӕр афтӕ у, ӕмӕ фӕндаг кӕуылты цӕуы, уым кӕрӕй-кӕронмӕ ис цӕугӕдӕттӕ ӕмӕ къада дӕттӕ дӕр. Уымӕ гӕсгӕ хидтӕ дыууӕ азы ногӕй аразын бахъуыд цӕугӕдӕттӕ Майрӕмададжы ӕмӕ Хӕтӕлдоны сӕрты. Стӕй Хетӕджы къохмӕ ӕввахс дыууӕ раны къада дӕттыл.
Хъыгагӕн, ӕппӕт хидтӕ ныронг ивд нӕма ӕрцыдысты, фӕлӕ уыдоныл дӕр куыст цӕуы. Джызӕлӕй куы ахызтыстӕм, уӕд бирӕ змӕлд баййӕфтам, цӕугӕдон Джызӕлдоны сӕрты цы хид ис, уым. Фыццагдӕр ныхас кодтам Дзӕуджыхъӕуы газы хӕдзарады Горӕтгӕрон районы филиалы цалцӕггӕнӕн диспетчерон службӕйы кусджытимӕ. Куыд радзырдтой, афтӕмӕй хиды иувӕрсты цы газы хӕтӕл цӕуы, уый фӕхуынчъытӕ, газ уадзын райдыдта, ӕмӕ йӕ ныр ӕндадзӕг Гӕззаты Ацӕмӕз арӕхстгай ӕмпъызта, цӕмӕй мацы фыдбылыз ӕрцӕуа фӕндаггӕттыл.
Ай-гъай, хиды арӕзтад ныртӕккӕ у ӕппӕт куыстыты сӕйрагдӕр ӕмӕ уый тыххӕй та ныхас кодтам прораб — хайады хицау Алим Агаевимӕ.
«Мах стӕм пятигорскаг ӕнӕххӕст бӕрнондзинады ӕхсӕнад «Грант»-ы хидаразджытӕ, — загъта уый. — Нӕ хӕс у, цӕугӕдон Джызӕлдоны сӕрты цы хид ис, уый ногӕй раивын. Уымӕн ӕмӕ уый базӕронд, дзуапп нал лӕвӕрдта нырыккон транспортон фӕрӕзты змӕлдӕн, стӕй йӕ бетонӕй конд могортӕ дӕр слӕмӕгъ сты ӕмӕ йӕ специалисттӕ банымадтой, фыдбылыз ӕрцӕуынӕй тӕссаг кӕмӕн у, ахӕм объекттыл».
Дарддӕр Алим Агаев куыд радзырдта, афтӕмӕй сӕ куыст райдыдтой январы. Фыццагдӕр хидмӕ бацӕуӕнты энергихъахъхъӕнӕн фӕрӕзтӕ ӕвӕрд ӕрцыд дыууӕрдыгӕй, цӕмӕй хӕдтулгӕты тӕрджытӕ бонӕй-ӕхсӕвӕй хуыздӕр уыной сӕ фӕндаг. Уый фӕстӕ хидӕн райхалын бахъуыд йе ‘мбис, транспортон фӕрӕзтӕ та ныртӕккӕ дыууӕрдӕм цӕуынц йӕ иннӕ ӕмбисыл.
Ӕз мӕ цӕстӕнгас ахастон арӕзтадон объектыл. Раздӕр ӕфсӕн-бетон къӕйтӕ ӕвӕрд кӕуыл уыд, уыцы ӕнцайӕн цӕджындзтӕ лӕууыдысты гомӕй, бынӕй та экскаваторыл кусӕг Гагуты Артур йӕ экскаваторы кӕхцӕй къахта ӕнцайӕн цӕджындзты алыварс, цӕмӕй фидаргонд ӕрцӕуой бетонӕй, цӕугӕдоны фаллаг былыл та аразджытӕ Осман Ильясов ӕмӕ Мохамед Ширваниев арматурӕ ӕвӕрдтой.
«Цӕттӕгӕнӕн куыстытӕ конд куы фӕуӕм, уӕд 20 ӕфсӕн-бетон хайы ӕвӕрд ӕрцӕудзысты 5 ӕнцайӕн къӕйыл, дарддӕр та бетон ӕмӕ асфальт цалдӕр фӕлтӕры ӕвӕрын бахъӕудзӕн сӕ уӕлӕ. Ӕрвылбон арӕзтадон объекты фӕкусы 15 адӕймаджы ӕмӕ нӕ куыстадон хъарутӕ куыд амонынц, афтӕмӕй хиды арӕзтад кӕронмӕ ахӕццӕ кӕндзыстӕм 1 сентябрмӕ», — фӕнысан кодта Алим Агаев.
Тохсырты Къоста
Къамтӕ систа Къӕбысты Харитон
