«Россети Цæгат Кавказ»-ы филиал «Цæгкавказэнерго»-йы æмæ акционерон æхсæнад «Цæгкавказэнерго»-йы разамонджытæ ТАБОЛТЫ Алыксандр æмæ БЫГЪУЫЛТЫ Сосланæн Беслæны уыд хъуыддаджы фембæлд Рахизфарсы районы фæлхасгæнджытимæ.
Ахæм дзыллон мадзал сарæзтой фыццаг хатт. Рахизфарсы районы электрон хызты бæстыхаймæ регионы хызæгон æмæ уæйгæнæг компаниты разамонджытимæ лыггæнинаг фарстытыл комкоммæ æрныхас кæнынмæ æрбацыд 40 адæймаджы (уыдонимæ — иуæй-иу хъæуты администрациты сæргълæуджытæ дæр).
— Ныртæккæ «Россети Цæгат Кавказ»-ы разамынды хæс у регионты электрохызæгон комплексы рæзтæн ахъаз кæнын. Уымæ гæсгæ нæ фæлхасгæнджытимæ фембæлдтытæн ис стыр ахадындзинад, — загъта «Цæгкавказэнерго»-йы филиалы директор.
Районы цæрджытæ хицауиуæггæнæг адæймæгтæм цы фарстытæ радтой, уыдонæн сæ фылдæр баст уыдысты электрон тыхы хæрзхъæддзинад æмæ йын æхца фидыны хъуыддагимæ.
Фарныхъæуы, Заманхъулы, Брут æмæ Хуымæллæджы администрациты сæргълæуджытæ бафиппайдтой электрон тыхæй ифтонгады хорзæрдæм ивддзинæдтæ, фæлæ Бруты разамонæг Æлдаттаты Батрадзы ныхасмæ гæсгæ, сæ хъæуы электрон тыхæй ифтонгады хатгай къуыхцытæ рауайы (Бруты электрон телты иуæй-иу хæйттæ ивинаг сты). Фарныхъæуы трансформаторон дæлстанцæ та хъæуы центрæй æндæр ранмæ раивын, уымæн æмæ уым аразынмæ хъавынц сывæллæтты ног рæвдауæндон. «Цæгкавказэнерго»-йы филиалы разамонджытæ ацы хъуыддæгтæм сæ цæст дардзысты.
Ног Бæтæхъойыхъæуы бирæсывæллонджын бинонтæн радих кодтой зæххы хæйттæ, æмæ администрацийы минæвар Кудзаты Ацæмæз энергетиктæн бафæдзæхста хъæуы кæрон уыцы ног уынгтæм электрон тых бауадзын. Цæмæй уыцы бинонтæ сæ арæзтæдтæм бавналой, уый тыххæй сæ хъæуы электрон тых. Энергетиктæ цæттæ сты ног фæлхасгæнджытæм электрон тых бауадзынмæ, æцæг сæ энергокомпанимæ барвитын хъæуы куырдиæттæ.
Æмткæй райсгæйæ, энергетиктæ адæмы фæрстытæн радтой бæлвырд дзуаппытæ. Таболы-фырт æмæ Быгъуылы-фырт районы дæлхайæдты разамонджытæн бахæс кодтой æппæт хъуыддæгтыл дæр бакусын æмæ сæ фæндæттæ цыбыр æмгъуыдмæ бахæссын, сæхæдæг та æрвылмæй дæр цæттæ сты адæмы сагъæсы æфтауæг фарстытæн дзуаппытæ дæттынмæ æмæ сын сæ куырдиæттæ хынцынмæ.
Æргом фембæлдтыты рæстæг фæлхасгæнджытæй æрбафтæг фарстытæ лыггонд куыд цæуынц, уымæ йæ цæст дары «Россети Цæгат Кавказ»-ы разамынд.
«Россети Цæгат Кавказ»-ы
пресс-службæ
