РЦИ-Аланийы Сæргълæууæг БИТАРТЫ Вячеслав бафыста республикæмæ ног коронавирусон инфекци ма ‘рбауадзынæн ахъаззаг цæттæдзинады фæтк сфидар кæныны тыххæй Указ.
Документмæ гæсгæ, Цæгат Ирыстонмæ ног коронавирусон инфекциимæ фæсарæйнаг бæстæтæй æрбацæуæг адæм хъуамæ се ‘рбацыды тыххæй, æндæр паддзахæдтæй кæд æмæ кæм уыди, уыдæттæ фехъусын кæной ахæм телефонæй: 8-800-301-20-68.
Граждæнты уыцы къорд хъуамæ дыууæ къуырийы дæргъы уой хæдзары, ома, — сæ бон нæу рацæуын куыстмæ, ахуырмæ, æхсæнадон бынæтты уæвыны фадат дæр хъуамæ скуынæг кæной. Куыстуæтты разамонджытæ хъуамæ фадæттæ саразой сæ кусджыты тæвд барынæн, бæрзонд кæмæн уа, уыдон хъуамæ куыстæй иуварсгонд æрцæуой. Дарддæр сæм хъуамæ кæсой медико-санитарон æххуысы специалисттæ.
Указмæ гæсгæ, рæстæгмæ Республикæ Цæгат Ирыстон-Аланийы нæ уыдзæн спортивон, ирхæфсæн æмæ æндæр дзыллон мадзæлттæ кæнæн. Коронавирусимæ тæссаг уавæр цы бæстæты ис, уырдыгæй республикæмæ цы уæзласæн машинæтæ æрбафты, уыдонæн æмæ шофыртæн бæрæггонд æрцæудзæн рæстæгмæйы бынæттæ. Ахæм мадзæлтты фæрцы æнцондæрæй рабæрæггæнæн уыдзæн, вирусыхъæстæ чи у, уыдоны, æмæ сæ дарддæр дзæбæх кæнæн.
Ацы хæс æмæ бæрнондзинад æвæрд цæуы æххæстгæнæг хицауады оргæнтыл, Мидхъуыддæгты министрады, Æдасдзинады федералон службæйы, «Роспотребнадзор»-ы регионалон хайæдтыл. Республикæйы Сæргълæууæг æвæры домæн, цæмæй медицинон кусæндæтты архайд уа æнæкъуылымпы, стыр æргом аздахой, хæдзары низы алыхуызон æууæлтимæ чи сæйы, уыцы адæймæгтæм. Уымæй дарддæр, æппынæдзух хъус дарын хъæуы, 60 азæй фылдæр кæуыл цæуы, ахæм рынчынтæм, уым та хъуамæ хъуыддаджы балæууой цæугæ медицинон æххуысы кусджытæ.
РЦИ-Аланийы Сæргълæууæджы Указы фыст ис: «Респираторон фæзындтытимæ рынчынтæм æвæстиатæй æркæсын, тагъд медицинон æххуыс сын бакæнын, ног коронавирусон инфекци рабæрæг кæнынæн биологон æрмæг райсын, рынчындæтты æмæ амбулаториты тагъд медицинон æххуыс скæнын кæмæ хауы, æппæт уыцы кусæндæтты цæттæдзинадæн уавæртæ конд æрцæуæд».
Промышленност æмæ транспорты министрад æнæниздзинад хъахъхъæнынады ведомствæимæ Цæгат Ирыстоны хъуамæ сфæстауæрц кæна дезинфекцион, хибахъахъхъæныны фæрæзтæ, буарыл чи не ‘ндзæвы, ахæм тæвдбарæнтæ æмæ æхгæд хуызы ультрафиолетон тынтауджытæ. РЦИ-Аланийы Сæргълæууæджы Указ бæлццæттæ æмæ уæзæгтæласæг уæлдæфон æмæ æфсæнвæндаджы транспорты хицæуттæ æмæ организацитæн фæдзæхсы, цæмæй дезинфекцийы домæнтæ æппынæдзух æххæст кæной.
Республикæ Цæгат Ирыстон-Аланимæ ног коронавирусон инфекци ма ‘рбафтыны тыххæй оперативон штаб кусдзæн æхсæвæй-бонæй. Алы бон дæр Битарты Вячеславмæ штаб æрвитдзæн ног коронавирусон инфекциимæ уавæры тыххæй бæрæггæнæнтæ.
РЦИ-Аланийы
Сæргълæууæджы
æмæ Хицауады
пресс-службæ
