Апрелы æрдз райхъал вæййы æмæ дидинæг калын райдайы. Уæвæн ис, æмæ ма асæст бонтæ дæр скæна, фæлæ цыфæндыйæ дæр уалдзыгон хъарм бонты нымæц уыдзæн фылдæр. Арæх апрелы уæлдæфы рæстæмбис температурæ вæййы 9-11 градусы хъарм, хохы та — 2-4 градусы хъарм.
Ростовы гидрометцентры рагагъоммæйы бæрæггæнæнтæм гæсгæ, ацы аз Цæгат Кавказы федералон зылды уæлдæфы температурæ уыдзæн нормæмæ æввахс. Æхсæвы уæлдæфы температурæ æрхиздзæн 2-7 градусы хъарммæ (хатгай 0-3 градусы уазалмæ), бонæй та уæлдæф схъарм уыдзæн 8-17 градусы онг (хицæн бонты температурæ схиздзæн 20-23 градусы хъарммæ).
Бирæазон цæстдарды бæрæггæнæнтæ куыд æвдисынц, уымæ гæсгæ æппæтæй уазалдæр апрел уыд 1965 азы (уæлдæфы рæстæмбис температурæ уыд 5 градусы хъарм), æппæтæй хъармдæр апрел та уыд 1975 азы (14 градусы хъарм).
Арæх апрелы рауары 40-80 миллиметры. Ацы аз дæр апрелы рауардзæн нормæмæ ‘ввахс кæнæ фылдæр. Уаргæ бонты нымæц уыдзæн 9-10. Арæхдæр уардзæн къæвда, мæйы райдианы — сæлæф мит. Уæвæн ис, æмæ мæйы кæрон арв фыццаг хатт ныннæра.
Светланæ СУХОВА,
инженер-синоптик
