Цæгат Ирыстоны Хетæгкаты Къостайы номыл паддзахадон университеты Ирайнаг культурæйы центры уыд Ираны республикæйы минæвар Уæрæсейы Федерацийы Казем ДЖАЛАЛИИМÆ видео-конференци.
Иумæйаг тæссагдзинæдты ныхмæ тох кæнынæн, пайдайаг базарадон-экономикон æмгуыстады рæзтæн æмæ культурон-гуманитарон къабазы бастдзинæдтæ фæуæрæх кæнынæн чи ахъаз кæны, фæстаг рæстæг, Уæрæсе æмæ Ираны ахастдзинæдтæ ахæм ног къæпхæнмæ схызтысты, Культурон æмæ ахуырадон æмгуыстад, дыууæ бæстæйы æхсæн ахастдзинæдтæ фидар кæнынæн ахъаз кæны.
Алыхуызон бæстæты минæвæртты алы бастдзинад дæр банымайæн ис культурон ныхасы фæзындыл. Цалдæр азы дæргъы цæгатирыстойнаг университет Иранимæ парахатæй æмгуыст кæны — иумæйаг иртасæн куыстытæ æххæстгонд цæуынц, студенттæ æмæ ахуыргæнджытæ кæрæдзимæ ахуыр кæнынмæ æрбацæуынц. Уымæй уæлдай, уæрæсейаг-ирайнаг хæлардзинады æхсæнад «Иран-Ирыстон» æнæлазæй кусы. Цалдæр боны размæ ацы æхсæнады хъуамæ сарæзтаиккой ирайнаг Ног азы ралæуды бæрæгбон Навруз, фæлæ йæ дзыллон мадзæлттæ аразыны бар кæй нæй, уый нымайгæйæ, бæрæгбон аивтой. Фембæлды архайджытæ æрныхас кодтой ацы хъуыддагыл, стæй Америчы Иугонд Штаттæ кæй æххæст кæны, уыцы æфхæрæн мадзæлтты аххосæй Ираны сæвзæрæг зындзинæдтыл.
Университеты кусджытæ Пысылмон республикæйы ног нысангонд минæваримæ ныхас кодтой фыццаг хатт. «Фæнды мæ сымахмæ æрбацæуын, фæлæ рын дунейы кæй ахæлиу, уый нымайгæйæ, рахастон сымахимæ, видеобастдзинады фæрцы базонгæ уæвыны уынаффæ», — загъта Казем Джалали.
Цæгат Ирыстоны национ ахастдзинæдты фарстыты министр Цуциты Аслан Казем Джалалийæн йæ куысты ног бынаты фæдыл раарфæ кодта.
— Рагон историон бастдзинæдтæ Ираны æмæ Кавказы культурæты ‘хсæн, дарддæр кæй рæздзысты, стæй Иран коронавирусон низæфтауæгыл чысыл зианимæ кæй фæуæлахиз уыдзæн, уыдæттыл зæрдæ дарын, — загъта Цуцийы-фырт.
Уымæй уæлдай, Цæгат Ирыстоны паддзахадон университеты наукон куысты проректор Туаты Бертæ фадæттæ кæмæн сарæзта, уыцы видео-конференцийы архайджытимæ уыдысты ЦИПУ-йы историон факультеты декан Плиты Зæлинæ, профессор, историон наукæты доктор Бзарты Руслан, Тегераны Алламе Табатабаийы номыл университеты ахуыргæнæг Лейлæ Атефепур, ЦИПУ-йы Ирайнаг культурæйы центры директор Æгайты Руслан æмæ æндæртæ.
Никæ ЩЕРБИНИНА
