Цæгат Кавказы аграрон-технологон колледжы ахуыргæнджытæ æмæ ахуырдзаутæ Æрыдоны районы Центрон рынчындонæн æххуысы хуызы медицинон маскæтæ лæвар бахуыйыны фæнд скодтой.
Коронавирусон низæфтауæг кæй хæлиу кæны, уый нымайгæйæ, адæм ахæм маскæтæ парахатæй æлхæнынц. Рынчындоны сæйраг дохтыр Хъуппеты Оледжы куырдиатмæ гæсгæ бахуыдтой маскæты дыууæ хуызы: 6 — æмæ 12-фæлтæронтæ (карантины уавæрты рынчынтимæ архайын кæй бахъæуы, маскæтæ хуыд сты рынчындоны уыцы кусджытæн).
Куыстадон ахуырады мастертæ æмæ студенттæ (уыимæ, колледжы цыколайаг хайадæй дæр) медиктæн æххуыс кæнынц. Компетенци «Модæйы технологитæ»-мæ гæсгæ колледжы чи ахуыр кæны, пенсийы агъоммæ кары уыцы адæм дæр се ‘ххуысы хай бахæссыны фæнд скодтой.
Уавæр хорзæрдæм цалынмæ нæ фæива, уæдмæ бархионтæ æрвылмæй хуыйдзысты 3100 маскæйы.
— Медицинон маскæ бахуыйынæн хуыйæджы диплом нæ хъæуы. Хæсгардæй кæрдын æмæ хуыйæн машинæйæ хуыйын зонын фаг у, — зæгъы колледжы ахуыргæнæг Абайты Светланæ.
ГÆЛÆУТЫ Наталья
