Ралæууыд май — тæрккъæвдаты, цъиуты цъæхснаг зарджыты, дидинкалæг дыргъцæхæрадæтты мæй.
Арæхдæр майы уæлдæфы рæстæмбис температурæ вæййы 15-17 градусы хъарм. Ростовы гидрометцентры развæлгъау бæрæггæнæнтæм гæсгæ Цæгат Кавказы федералон зылды уæлдæфы температурæ уыдзæн нормæмæ æввахс. Æхсæвы-иу уæлдæфы температурæ æрхаудзæн 8-13 градусы хъарммæ, бон та-иу схиздзæн15-22 градусмæ, хицæн бонты — 25-30 градусы хъарммæ.
Бирæ азты бæрæггæнæнтæм гæсгæ æппæты уазалдæр май уыдис 1986 азы — 12 градусы хъарм. Тæккæ хъармдæр май уыд 2007 азы — рæстæмбис нымадæй 18 градусы хъарм.
Майы мæй боныхъæд иугъæдон нæ вæййы, арæх æрцæуы къæвдатæ. Хохрæбынты рауары 90-141 миллиметры, республикæйы быдираг районты та — 40-50 миллиметры. Ацы аз уарынтæ уыдзысты нормæмæ æввахс, фылдæр — тæрккъæвдатæ, их дæр-иу рауардзæн тыхдымгæимæ.
Светланæ СУХОВА,
инженер-синоптик
