Нæ республикæйы сфæлдыстадон интеллигенцийы минæвæрттæй сæ фылдæрæн сæ фæндаг журналистикæмæ райдыдта нæ Иры фарны мæсыг — газет «Рæстдзинад»-æй. Æмæ дзы йæ удцырыны зынг кæмæн бахсыст, уыцы фæрнджын, уæздан, сыгъдæгзæрдæ сылгоймæгтæй иу у ирон журналистикæйы ветеран, УФ-йы Журналистты цæдисы уæнг, курдиатджын очеркист ХЕСТАНТЫ-БУТАТЫ Победæ.
Уый йæ зæрдæйы хорзæхæй, йæ зонд æмæ курдиатæй йæ дзыллæйæн журналистикæйы сыгъдæгзæрдæйæ лæггад кæны 40 азæй фылдæр. Йæ уды цæхæрæй, йæ цæстуарзондзинадæй, фæлтæрддзинадæй кæуыл баузæлыд, уыцы æвзонг лæппутæ æмæ чызджытæй ныртæккæ рауад дæсны журналисттæ.
Победæ райгуырд æмæ схъомыл Зилгæйы. Дунемæ фæзынд, номдзыд диктор Юрий Левитан дунейы дзыллæтæн Фыдыбæстæйы Стыр хæсты фæуды тыххæй куы фехъусын кодта, уыцы фарны бон — 9 Майы. Уыцы бон Зилгæйы хъæуы астæу репродукторæй хæсты фæуæлахизы тыххæй адæм хабар куы фехъуыстой, уæд сæ цинæн кæрон нал уыд. Фæлæ ма сæ циныл дывæр цин бафтыд, куы сæм æрбайхъуыст, хъæуы дзырддзæугæдæр лæг, рухстауæг Бутаты Хъазыбегæн чызг кæй райгуырд, уый, уæд. Хъæубæсты цæрджыты номыл бирæ хъуыды кæнын дæр нæ бахъуыд, загътой сæ фæндон æмæ йыл сæвæрдтой ном Победæ.
Ирон æмбисонд, куыд зæгъы, афтæ, лæгæн йæ ном вæййы фæндагамонæг стъалы. Нæхи Победæйæн дæр йæ ном ахæм амондджын разынд, зæгъгæ, куы зæгъон, уæд нæ фæрæдийдзынæн. Царды цы фæндаг равзæрста — журналистикæ, ирон дзырдаивадæн лæггад кæнын, ууыл цæуы кад æмæ радимæ, уæздан æмæ фырнымдæй.
ЦИПУ-йы уырыссаг-ирон хайад æнтыстджынæй каст куы фæци, уæд кусын райдыдта корректорæй газет «Рæстдзинад»-ы. Ам уæд цы кадджын хистæртæ, уацхæсджытæ, техникон кусджытæ уыд, уыдон ыл тынг баууæндыдысты, сæхи чызгау, æй бауарзтой. Победæ куыстмæ зивæг никуы кодта, стæй абон дæр нæ кæны. Газеты радон кæнæ бæрæгбоны номыртыл кусгæйæ -иу ыл бирæ хæттыты сбон. Уæддæр «бафæлладтæн» никуы загъта. Уыцы рæстæг газеты æмæ журнал «Мах дуджы» цæуын райдыдтой, йæ зæрдæмæхъаргæ новеллæтæ æмæ очерктæ æрдзы, Ирыстоны хъæбатыр фыртты, зæхкусджыты, дохтырты æмæ ахуыргæнджыты тыххæй.
— Цард фæллойгæнæджы зæрдæйы фарнæй цæуы, сой уый фæрцы вæййы нæ алы хæдзары дæр, — афтæ арæх фæзæгъы Победæ. Æмæ сын сæ зын, фæлæ арфæйаг куысты тыххæй фæфыссы аив, æрвыгау ирд æмæ æнцонæмбарæн æвзагыл. Уæдæ йæ зæрдæйы, ирон аивады табугæнæг рухс кæй судзы, театр, музыкæ, цирчы, кинойы, нывгæнджыты аивадæн стыр аргъгæнæг кæй у, уый та зонæм газет «Рæстдзинад»-ы æмæ Цæгат Ирыстоны радиойы нæ аивады дæснытæй, зæрдæагайгæ æрмæджытæ кæй бацæттæ кодта, уымæй.
Ирыстоны зæххыл Победæйæн алы дур дæр, нæ уæзæгæн æцæгæй дæр, кад æмæ ном чи кæны, уыцы адæймæгтæй алчидæр зынаргъ кæй у, уый бæрæг у йæ уацты æмæ очеркты чиныг «Курдиаты рухс»-æй дæр. Мыхуыры куы рацыд, уæд ын цыбыр рæстæгмæ дуканиты тæрхæджытыл ссарæн дæр нал уыд.
Победæ хойы зæрдæ дары Турчы цæрæг ирæттæм дæр. Кæддæриддæр-иу сæ исчи йæ фыдæлты уæзæгмæ куы ссыд, уæд-иу сæ Победæ æрбахуыдта Цæгат Ирыстоны радиомæ, кæнæ сыл-иу газет «Рæстдзинад»-мæ уац бацæттæ кодта, кæнæ та сыл-иу сарæзта радиобакаст.
Газет «Рæстдзинад» æмæ Цæгат Ирыстоны радио сты нæ адæмæн сæ удварны суадæттæ. Ам нæ уарзон хистæр Победæ кодта фарны лæггад йæ дзыллæйæн. Кæд радиойы фылдæр информацион программæйы редактор уыд, уæддæр ын-иу фадат куы фæци, уæд-иу аивадон радиобакастытæ нæ фыдæлты æгъдæутты, Нарты кадджыты сæйраг мидис цæй мидæг ис, уый тыххæй æхсызгонæй цæттæ кодта бирæ цымыдисаг æрмæджытæ.
Æппæт мæргъты ‘хсæн булæмæргъы зардæн хицæн азæлд куыд ис, афтæ алы фыссæг æмæ журналисты фыстæн дæр ис йæхи азæлд адæмы зæрдæйы. Æмæ мæм уыцы хуызы мæ зæрдæ афтæ дзуры, Победæйы радиобакаст, очеркæн цы азæлд ис, адæмы уды, уый ницæимæ ис абарæн, йæ зæрдæйы арфæй цы зæрин дзырдтæ райгуырынц, уыдонæй нывæзт æрмæг куыд аив фыст вæййы, ахæм аив æнкъарæнтæ балæвар кæнынц газеткæсджытæн æмæ радиомæхъусджытæн дæр. Победæ цы фыссы, уый цалынмæ йæ уарзæгой рæсугъд зæрдæйы, арф æмæ бирæвæрсыг зонындзинæдты æвæрæнты нæ бахсиды, йæ уды тæгтæй йæ нæ саив кæны, уæдмæ йæ адæмы размæ нæ рахæссы. Йæ уацы, очеркы алы архайæджы дæр, фыццаджыдæр, зæрдæбынæй бауарзы, стæй йын йæ фæллойы æмæ царды фæндагыл ныффыссы, йæ зæрдæйы арфæй цæуæг кадæг.
Победæ, уалдзæджы кадджындæр бонтæй иу — 9 майы райгуырдтæ, æмæ дæ царды алы къахдзæф дæр нæ намысджын фыдæлты удварны рухсы тæразæй кæй барыс, уый бæрæг у адæмы, де ‘мсис хæлæртты ‘хсæн дын цы кад æмæ рад ис, уымæй. Æмæ дын нæ зæрдæ зæгъы, дæ уды рухсæй ма не ‘ппæты дæр бирæ азты куыд тавай, дæ аив фыст æрмæджытыл та нæ газеткæсджытæ немæ бирæ азты куыд цин кæной, уыцы хорзæх дæу, мах æмæ Ирыстоны адæмы уæд!
ГАСАНТЫ Валери
