Фатертæ саразынæн æхца хайгай чи радта æмæ кæй асайдтой, уыцы адæмæн ацы аз инвесторты хардзæй арæзт æрцæудзæн æртæ хæдзары.
Æртын дыууæ фатеры кæм ис, уыцы фыццаг фарастуæладзыгон хæдзар ис Плийы-фырты уынджы, дыккаг — æртынфондзфатерон хæдзар та — Шегрены уынджы. Ныртæккæ ам æххæст кæнынц аивгæнæн куыстытæ, аст уæладзыджы кæм ис, уыцы æртыккаг сæдæхсайфатерон хæдзар та ис Хæдарцы-фырты æмæ Уалдзыгон уынгты тигъыл. Дзæуджыхъæуы 31-32-æм микрорайоны саразинаг бирæуæладзыгон хæдзары фатертæ райсынмæ чи хъавыд æмæ сайд кæуыл æрцыд,уыцы адæмæн та ратдзысты æхцайы компенсацитæ. Компенсацитæ бафиддзысты цæрæнуаты квадратон метры ныры базарадон аргъмæ гæсгæ (1 квадратон метры аргъ — 35 мин сомы).
Коронавирус хæлиу кæнынæй бахизыны фæдыл Уæрæсейы Хицауад кæй сфидар кодта, уыцы мадзæлтты рæстæг (ома, ацы аз 18 майæ фæстæмæ) банк-агент «Банк ДОМ.РФ» æмæ цæрæнуат хайгай аразæг адæмы барты хъахъхъæнынады фонд сайды бынаты баззайæг адæмæн дæттынц компенсацитæ райсыны тыххæй куырдиæттæ дæрддзæгмæ барвытыны фадат.
РЦИ-Аланийы Арæзтад
æмæ архитектурæйы
министрады пресс-службæ
