Экономикон зындзинæдтæм цæттæ уæвын хъæуы?

0
272

Коронавирусы пандемийы æууæлты архайгæйæ, Уæрæсе нырма бавзардзæн экономикон зындзинæдтæ, уæлдайдæр та, сæвзæргæ эпидемиологон уавæр цы дунеон экономикон къуырцдзæвæн расайдта, уый фæстиуджытæ аиуварс кæныныл нырма уæхскуæзæй бакусын кæй хъæудзæн, уый зæрдыл даргæйæ.

Ахæм хъуыды загъта УФ-йы Президенты пресс-секретар Дмитрий Песков, телеканал «Россия 1»-ы программæ «Москва. Кремль. Путин»-æн интервью дæтгæйæ. Уыимæ, йæ ныхасмæ гæсгæ, пандемийы æууæлты УФ-йы Хицауады архайд у бæрнон æмæ ахадгæ.

«Экономикон æгъдауæй нырма разæй бирæ зындзинæдтæ кæй ис, уый дызæрдыггаг нæу. Уыимæ, дунеон къуырцдзæвæны карздæр рæстæг фæсте аззад, сæвзæргæ уавæрты архайгæйæ, куыд гæнæн уыд, афтæ æппынкъаддæр зиантимæ. Уый бæлвырд у», — бафиппайдта Дмитрий Песков.

Пресс-секретары бафарстой, иуæй-иу федералон чиновникты отставкæйы арвитыны фæдыл Президент цы хъуыды кæны, уый тыххæй дæр. Дмитрий Песковы ныхасмæ гæсгæ, иу кæнæ иннæ адæймаджы йæ бынатæй арвитын æнцон у, куыст рæстæджы æмæ сæвзæргæ уавæрты аккаг рацаразын та бирæ зындæр у, æмæ уымæн, кæй зæгъын æй хъæуы, рæстæг хъæуы. Фæлæ, уæвæн ис, æмæ алкæцы ведомствæйы архайдмæ лæмбынæг æркæсыны фæстæ отставкæтæ æмæ кадрон ивддзинæдтæ уа.

Уыимæ, дыууæ боны раздæр УФ-йы Нымайæн палатæйы сæрдар Алексей Кудрин йæ раныхасы куыд фæбæрæг кодта, афтæмæй ныртæккæ Уæрæсейы экономикæ ис мидцоппайы уавæры. Йæ ныхасмæ гæсгæ, 2008-2009 азты дунеон къуырцдзæвæны рæстæг Хицауад архайдта сæрæндæрæй, æмæ зындзинæдты ныхмæ йæ февнæлд æнтыстджын уымæн уыд.

 

(Информацион агентад «Интерфакс»)

ОСТАВЬТЕ ОТВЕТ

Please enter your comment!
Please enter your name here