Æппæтуæрæсеон адæмон фронты цæгатирыстойнаг активисттæ регионы Æнæниздзинад хъахъхъæнынады министрадмæ барвыстой куырдиат.
Уым фыст ис: «Рахизфарсы районы Бруты амбулаторимæ хъæуы дон бауадзын, Зæронд Бæтæхъойыхъæуы амбулатори та хъæуы телефоны бастдзинад æмæ интернетæй сифтонг кæнын».
Ацы аз кусын чи райдыдта, уыцы медицинон кусæндæттæм цæстдарæн рейды заман æхсæнадон организацийы минæвæрттæ аиппытæ рабæрæг кодтой.
— Æмткæй райсгæйæ, амбулаториты арæзтады хæрзхъæддзинадæй райгонд стæм. Рынчынтæ дæр немæ разы сты. Дзæбæхгæнæндæтты алыварс аивгонд у, фæлæ аиппытæ дæр раргом сты. Зæгъæм, Бруты амбулатори кусын цы бон райдыдта, уыцы бонæй фæстæмæ йæм дон нæ цæуы. Зæронд Бæтæхъойыхъæуы дзæбæхгæнæндонмæ та стационарон телефоны телтæ кæй нæма бауагътой, уый нымайгæйæ, адæм ардæм æххуысы фæдыл фæдзурынц медикты чырæг телефонтæм. Интернет дæр дзы нæ кусы, — зæгъы Адæмон фронты регионалон штабы уæнг Болиаты Лаурæ.
Куыд рабæрæг, афтæмæй, амбулаторитæ сты кусджыты хъуаг, цæмæй медиктæ ног нырыккон кусæнгæрзтæй кусын базоной, уый тыххæй та сын саразын хъæуы зонындзинæдтæ фылдæргæнæн курсытæ.
Чи раргом, уыцы хъæндзинæдты тыххæй æхсæнадон организацийы уæнгтæ барвыстой республикæйы Æнæниздзинад хъахъхъæнынады министрадмæ.
БÆДТИАТЫ Оксанæ
