Сæрмагонд рейдтæ æххæст кæнгæйæ, ацы азы фыццаг æмбисы æнæххæст бæрнондзинады æхсæнадтæ «Газпром межрегионгаз Дзæуджыхъæу»-ы æмæ «Газпром газдихгæнæн Дзæуджыхъæу»-ы специалисттæ раргом кодтой газуадзæн хæтæлтимæ æнæзакъонæй баиу кæныны 177 цауы.
Газæй ифтонггæнæн кусæндонæн æрхастæуыд 17,9 милуан сомы аргъ зиан. Газæй æнæзакъонæй пайдагæнæг адæймæгтыл арæзт гæххæттытæ æрвыст æрцыдысты барадхъахъхъæнæг оргæнтæм административон кæнæ сæ уголовон бæрнондзинад бадомынæн. Æдæппæт сарæзтæуыд 133 административон æмæ 18 уголовон хъуыддаджы.
Закъонхалджытæн тæссаг у 80 мин сомæй, кæнæ афæдзы æрдæджы мызды бæрцæй сæ фæивар кæнынæй. Газæй æнæзакъонæй пайда кæныны тыххæй амæй размæ административон бæрнондзинад кæмæй бадомдтой, æмæ газуадзæн хæтæлтимæ дыккаг хатт æвастæй чи баиу, ахæм адæмæй бадомынц уголовон бæрнондзинад.
Газуадзæн хæтæлтимæ æнæзакъонæй чи баиу, уыцы адæм, æдасдзинады фæтк халгæйæ, сæхи дæр æмæ иннæ адæймæгты дæр æвæрынц тæссаг уавæры.
— Фыдбылызæй адæмы бахизынæн æмæ газифтонгады къабазы закъон æххæст кæнынæн фадæттæ саразынæн газæй æнæзакъонæй пайдагæнæг адæмæн бæрнондзинад фæкарздæр кодтам, — зæгъынц газæй ифтонггæнæг компанийы специалисттæ.
Нæ уацхæссæг
