Фӕстаг рӕстӕг селекцийы сыгъзӕрин фонды несийы стӕм мыггӕгтӕ парахат кӕнын райдыдтой халсарты хуыздӕр куыстгӕнджыты ӕхсӕн. Ӕмӕ уый хуымӕтӕджы нӕу. Неси у, аргъ кӕмӕн нӕй, ахӕм хойраджы продукт. Уымӕй уӕлдай ма йӕм ис бирӕ хосгӕнӕн миниуджытӕ дӕр.
Ботаникон равзӕрдмӕ гӕсгӕ неси у хъармуарзаг зайӕгой. Йӕ зӕнг цалдӕр метры ахилы фӕйнӕрдӕм. Йӕ райгуырӕн бӕстӕ та у Астӕуккаг Ази. Фӕлӕ ныртӕккӕ неси кӕм нӕ зайын кӕнынц, ахӕм паддзахад нӕй.. Суанг ма Уӕрӕсейы хуссайраг районтӕй дарддӕрӕй-дарддӕр цӕуы цӕгатмӕ.
Ахӕм уазал рӕтты пайда фӕкӕнынц сӕрмагонд агротехникон мадзӕлттӕй ӕмӕ несийы тагъддӕр цӕттӕгӕнӕн мыггӕгтӕй.
Ахуыргӕндтӕ куыд сбӕрӕг кодтой, афтӕмӕй неси диссаджы хъӕздыг у хӕлцады продукттӕй. Зӕгъӕм, сӕкӕр дзы ис 10-15 проценты. Хъуаг нӕу аскорбины туагадӕй дӕр. Уый та адӕймаджы организм хъахъхъӕны алыхуызон хӕцгӕ низтӕй. Уӕдӕ витамин Р ӕмӕ Р1 та цармы хус кӕнын нӕ уадзынц.
Несийы руаджы хойраг хуыздӕр батайы, алыхуызон буаргъӕдты ивындзинад нывыл кӕнын райдайы. Фолийы туагад ӕмӕ витамин Р фесафынц тугдадзинты сӕртӕгдзинад, туджы ӕлхъывдад бӕлвырд фӕхуыздӕр вӕййы. Каротин, ароматон иу-гӕндтӕ, минералон буаргъӕдтӕ, уӕлдайдӕр ӕфсӕйнаг ӕмӕ крахмал несийы вӕййы — 08 проценты, клетчаткӕ ӕмӕ дзы витамин А кӕй ис, уый руаджы цӕстӕй хуыздӕр уынын райдайӕм, хӕцгӕ низтӕ фесӕфынц. Уымӕй уӕлдай иа адӕймаджы куыстхъомдзинад дӕр фӕфылдӕр вӕййы, уӕнг-рог ӕмӕ йӕм ӕнӕниздзинады ӕнкъарӕнтӕ фӕзынцнц.
Бирӕтӕ, ӕвӕццӕгӕн, нӕ зондзысты, несимӕ бирӕ хосгӕнӕн миниуджытӕ кӕй ис, уый. Хистӕр кары адӕмтӕн ӕй фӕамонынц, сӕры магъзы ӕмӕ зӕрдӕйы тугдадзинтӕ хъыгдард куы вӕййынц, уӕд. Тынг пайда у сывӕллӕттӕн дӕр. Хъуыддаг афтӕ у, ӕмӕ йӕ дыргъты ӕфсӕйнаджы ӕнцонтайӕн цӕххытӕ кӕй ис, уый руаджы неси хорз ӕххуыс кӕны зӕрдӕйы тугдадзинты системӕйы, уыргты, игӕры, чысыл туджы низтӕ фесафынӕн. Дзӕбӕх кӕны гемморой, сӕры рыст банцайы. Уымӕй уӕлдай, адӕймаджы иумӕйаг ӕнкъарындзинад хуыздӕр кӕны, йӕ ахаст хъӕлдзӕгдӕр вӕййы.
Ныхас несийы канд хосгӕнӕн миниуджытыл нӕу. Куыд зонӕм, афтӕмӕй ацы хойраджы продукт мыды хуызӕн хӕрзад вӕййы цӕттӕйӕ. Фӕззӕджы бур неситӕ дуканиты куы фенут, уӕд сӕ балхӕнынмӕ ма зивӕг кӕнут. Уымӕн ӕмӕ неси у ӕнӕниздзинады хос. Цас дзы фылдӕр хӕрат, уыйас цардхъомдӕр уыдзыстут.
Беслехъоты Ирӕ, дохтыр
