Онлайн, офлайн кӕнӕ дӕрддзӕфмӕ ахуырад

0
316

(Цы ӕмбӕхсы рӕсугъд терминты фӕстӕ)

Цас тагъддӕр здӕхы нӕ цард йӕ раздӕры донвӕдмӕ, уый бӕрц нын нӕ цӕстытӕ тынгдӕр гом кӕны нӕ ахуырады уавӕрмӕ. Афтӕ чи дзуры, зӕгъгӕ, ӕрвылбоны традицион боны ахуырад, дӕрддзӕфы ахуырад ӕмӕ онлайн-ахуырады ӕхсӕн ницы хъауджыдӕр ис, уый тынг рӕдийы. Ӕцӕг ахуыргӕнджытӕн ныридӕгӕн бӕстон бӕлвырд у: уыдон сты бынтон ӕндӕр ахуырады уагӕвӕрдтӕ. Пандеми (фыдрын) GOVID-19 кӕй расайдта, уыцы бирӕмӕйон иппӕрд ахуырадӕй рохсты уацары бакодта нӕ ахуырдзау фӕсивӕды стырӕй-чысылмӕ. Нырма хатдзӕгтӕ кӕныны рӕстӕг нӕма ӕрцыд, афтӕмӕй зынын байдыдтой алыхуызон иртасӕн куыстытӕ. Уыдоны автортӕ, сӕ сӕт калгӕйӕ, архайынц, цӕмӕй мах сразы уӕм, традицион ахуырадӕй-онлайн ахуырад хуыздӕр кӕй у, ууыл.

Комкоммӕ йӕ куы зӕгъӕм, уӕд чидӕртӕ сӕ удӕй «арт цӕгъдынц», мӕнг дзурыныл нӕ ауӕрдынц, нӕ астӕуккаг, астӕуккаг-сӕрмагонд ӕмӕ уӕлдӕр скъола ног фӕндагыл ӕрлӕууа, уый тыххӕй. Ацы аз мартъийы мӕйы нӕ бӕстӕйы уӕлдӕр скъолатӕ иу уысммӕ рахызтысты дӕрддзӕфы ахуырадмӕ. Бахахх ӕй кӕнӕм: онлайнмӕ нӕ ацыдысты, фӕлӕ рӕстӕгмӕ рахызтысты дӕрддзӕфмӕ ахуырады хуызмӕ. Цалдӕр мӕймӕ арӕзт ӕрцыдис, раздӕр дӕнцӕг кӕмӕн нӕ уыд, ахӕм бынтон ног уагӕвӕрд. Дӕрддзӕф ахуырадӕн цы мадзӕлттӕ ссардтой, уыдонӕй спайда кӕнӕн уыдзӕн традицион ахуырады дарддӕры рӕзты мидӕг, цӕмӕй размӕцыддӕр суа, уый тыххӕй.

Дӕрддзӕф ахуырадмӕ раст цӕстӕй каст куы ‘рцӕуа, уӕд уый суыдзӕн хорз ӕххӕстгӕнӕн традицион ахуырады программӕтӕм. Уӕлдайдӕр та студент цӕйдӕр аххосӕй йӕ ахуыр кӕронмӕ куы нӕ ахӕццӕ кӕна, уӕд. Бирӕ чызджытӕн (сылгоймӕгтӕн) бинонты уавӕртӕм гӕсгӕ сӕ бон нал бавӕййы боны ахуырмӕ рахизын. Ӕмӕ ахӕм уавӕры дӕрддзӕфмӕ ахуырады курсытӕ, кӕд боны ахуыры ӕххӕстӕй нӕ баивой, уӕддӕр сын фӕахъаз уыдзӕн ахуырады фӕлгӕты баззайынӕн. Уыимӕ, зӕгъын ӕмбӕлы, традицион ахуырад ӕххӕстӕй баивын йӕ бон кӕй нӕ бауыдзӕн, уый. Иннӕрдыгӕй та, дзаумӕтты хонын хъӕуы сӕхи нӕмттӕй. Бынтон ног ахуырады хуыз онлайн-ахуырад у — фӕсаууонмӕ ахуырады формӕ. Традицион ахуырады уагӕвӕрды тыгъдады фӕсаууонмӕ ахуырады уыдис ӕнӕмӕнгӕй ӕххӕстгӕнгӕ фӕлварӕнты сесситӕ, ома, лӕгӕй-лӕгмӕ комкоммӕ ныхас. Ахуыргӕнӕгӕн та уыдис йе студентты зонындзинӕдты ӕмвӕзад комкоммӕ бӕрӕг кӕныны фадат. Фӕлӕ уӕддӕр фӕсаууонмӕ ахуырады бон нӕ уыдис ӕххӕст ахуырад дӕттын, ӕмӕ уымӕ гӕсгӕ студенттӕ ахуыр кодтой иу аз фылдӕр (6 азы). Ам ныхас цӕуы программӕ ӕххӕст кӕныны рӕстӕгыл.

Традицион ахуырады уагӕвӕрды цӕмӕй исты лекцион курсы программӕ сӕххӕст кӕнай, уый тыххӕй равдисын хъӕуы бӕрӕггонд зонындзинӕдтӕ ӕмӕ фӕлтӕрддзинад. Уый тыххӕй уыдис, ӕнусты дӕргъы чи ныффидар, ахӕм цӕстдарды хуызтӕ: фӕлварӕнтӕ, зачеттӕ, коллоквиумтӕ, контролон куыстытӕ ӕмӕ ӕндӕртӕ. Иууон паддзахадон фӕлварӕн (ИПФ) дзыллон хуызы ахуырадмӕ хаст куы ‘рцыд астӕуккаг скъоламӕ, уӕд йӕ амидингӕнджытӕ ӕнхъӕлдтой, уый баивдзӕн уӕлдӕр скъоламӕ бацӕуӕн фӕлварӕнтӕ. Ӕрмӕст хъуыддаг куыд равдыста, уымӕ гӕсгӕ сбӕрӕг йӕ рӕдыд. Ӕмӕ бирӕ рӕтты бацӕуӕн фӕлварӕнтӕ фӕстӕмӕ здӕхын байдыдтой уӕлдӕр скъоламӕ. Ницавӕр тесттӕ баивдзысты музыкалон курдиат, ӕвзаджы ӕнкъарынад, ныв кӕнынмӕ арӕхстдзинад ӕ.а.д. Суанг ӕппӕты хуыздӕр тестон уагӕвӕрд дӕр ӕххӕссы ӕрмӕст зонындзинӕдты кӕцыдӕр хайыл, уымӕ гӕсгӕ йӕ бон нӕу сбӕрӕг кӕнын, уыцы зонындзинӕдты хӕрзхъӕддзинад, ома, ӕвзарыны хъомыс ӕмӕ аргъ кӕныны курдиат. Абон иунӕг тесты бон дӕр нӕу сбӕрӕг кӕнын адӕймаджы гӕнӕнтӕ хъуыды кӕнынмӕ, сфӕлдыстадон хуызы исты фарстытӕ лыг кӕнынмӕ. Афтӕмӕй та студенты цӕттӕдзинад ахӕм фарстытӕ лыг кӕнынмӕ сбӕрӕг кӕны уӕлдӕр ахуырады хӕрзхъӕддзинад, куыд профессионалон хуызы цӕттӕ кӕныны уагӕвӕрды хай, афтӕ.

Онлайн-курсытӕ студентты зонындзинӕдтӕ сбӕрӕг кӕныны тыххӕй ӕппындӕр сӕ сӕр нӕ риссын кӕнынц. Сӕ сӕйраг «бӕрӕггӕнӕн» у — тагъд ӕмӕ аслам. Кассӕмӕ ӕхца бафид ӕмӕ дыууӕ мӕйы фӕстӕ де ‘вдисӕндар сӕртификаты хуызы цӕттӕ у! Йӕхицӕн аргъ кӕнын чи зоны, иу ахӕм разамонӕг кӕнӕ амалхъом адӕймаг дӕр йӕхимӕ куыстмӕ нӕ райсдзӕн ахӕм дипломы хицауы. Ноджы ма иу ахадгӕ фиппаинаг: ахуырад у, кӕрӕдзи фӕстӕ ахуыргонд чи цӕуы, ахӕм уагӕвӕрды ранывӕст. Ӕмӕ кӕд традицион ахуырады ис растӕвӕрд ӕмӕ ноггӕнгӕ цӕуӕг бирӕвӕрсыг уагӕвӕрд хӕрзхъӕддзинад бӕлвырд кӕнынмӕ, уӕд онлайн-ахуырады мидӕг та уымӕн йӕ кой дӕр нӕй. Сомбоныл нӕ хъуыды кӕнгӕйӕ, ныгуылӕйнаг, растдӕр та амырыкаг ахуырад дӕнцӕгӕн кӕй исӕм, уый фыдыбӕстӕйы ахуыргӕнджыты стыр тыхсты ӕфтауы, уымӕн ӕмӕ уый дунейы мидӕг размӕцыдыл нымад никуы цыдис. Амырычы Иугонд Штатты статистикӕмӕ гӕсгӕ, амырыкаг ахуырдзаутӕ сӕ 60 проценты астӕуккаг скъола каст нӕ фӕвӕййынц, хуызджын (негрты, латинӕгты) фӕсивӕды ӕхсӕн та — 80 проценты. Японы бӕстӕ у, дунейы мидӕг уӕлдӕр ахуырад ӕнӕмӕнг чи скодта, иунӕг ахӕм бӕстӕ. Ӕмӕ уым никуы ӕмбӕхстой, иу рӕстӕг сӕ ахуырады бындурӕн советон ахуырады уагӕвӕрд кӕй райстой, уый. Афтӕ зӕгъӕн ис, ныртӕккӕ размӕцыд чи ссис, уыцы бӕстӕтӕй дӕр (Швеци, Норвеги ӕмӕ Финлянди).

Фӕлӕ Уӕрӕсейы, ӕппӕты размӕцыддӕр ахуырады бӕстӕйы, цӕмӕдӕр гӕсгӕ цармыстыгъд бакодтой ӕмӕ дӕнцӕгӕн исынц амырыкаг ахуырад. Ныгуылӕн Европӕ ӕмӕ Амырычы ис дыууӕ хуызы ахуырад: иу — сӕхицӕн, иннӕ — колониалон бӕстӕтӕн. Ӕмӕ се ‘хсӕн ис ставд хахх. Дыккӕгтӕн парахат кӕнынц ахӕм зондамындтытӕ: «Мах хъӕуынц кусӕг къухтӕ», «онлайн-дзыллон ахуырад» ӕмӕ ӕнд. Уыдонмӕ мах лӕмбынӕг куы ‘ркӕсӕм, уӕд сбӕрӕг вӕййы, модӕйы чи бацыд, уыцы ныгуылӕйнаг педагогтӕ ӕмӕ психологты куыстыты лӕмӕгъ тӕлмацтӕ англисаг ӕвзагӕй нын кӕй амонынц, уый. Ахӕм уӕлӕнгай, ӕнӕбындур архайдӕн фидӕн нӕй ӕмӕ нӕ уыдзӕн, уымӕ гӕсгӕ афоныл ӕрлӕууын ӕмӕ ахъуыды кӕныны рӕстӕг раджы ӕрцыд. Фыдыбӕстӕйы ахуырадӕн ном чи скодта, уыцы профессурӕ сӕ размӕцыд программӕтӕ ивынц, чиновниктӕ ӕнӕзондӕй размӕ кӕй тӕрынц, уыцы домӕнты уагӕвӕрдмӕ гӕсгӕ. Фӕлӕ ныртӕккӕ сагъӕс кӕнын хъӕуы ахуырады мидисыл. Рӕсугъд терминты фӕстӕ тутт бынат йеддӕмӕ ницы ис. Абон фыдыбӕстӕйы традицион ахуырады уагӕвӕрд хъахъхъӕд куы нӕ ӕрцӕуа, уӕд ма, нӕ уӕлдӕр скъола кӕуыл ӕнцой кӕны, уыцы цӕджындзтӕ дӕр, ӕлыгӕй кондау, пырхгонд ӕрцӕудзысты. Хъусӕй лӕууынӕн ӕмӕ уӕхсчытыл схӕц-схӕц кӕнынӕн рӕстӕг нал ис. Ӕмӕ абон уый тыххӕй ӕмхъӕлӕсӕй комкоммӕ куы нӕ зӕгъӕм, уӕд нӕ ахуырадӕй ницыуал баззайдзӕн.

Ацы аз сесситӕ фыдрыны ӕфсонӕй студенттӕ лӕвӕрдтой онлайны хуызы, дарддӕр куыд уыдзӕн, уымӕн ничима ницы зоны. Фӕлӕ, нӕ ахуырад сӕрсӕфӕны был кӕй ӕрлӕууыд, уый дызӕрдыггаг нӕу.

Хозиты Барис

ОСТАВЬТЕ ОТВЕТ

Please enter your comment!
Please enter your name here