Знон Дзӕуджыхъӕуы республикон онкологон диспансеры бындурыл Компаниты къорд «МедИнвестГрупп» байгом кодта Ядерон медицинӕйы центр ПЭТ-Технолоджи. Цӕгат Ирыстонӕн уый у ног къахдзӕф онкологийӕ рынчынтӕн сӕ низыхатт ноджы растдӕр иртасыны ӕмӕ сӕ уый фӕрцы сӕ низӕй дзӕбӕх кӕныны хъуыддаджы.
Центр кадджын уавӕры байгом кӕнынмӕ ӕрбацыдысты республикӕйы Сӕргълӕууӕг Битарты Вячеслав, егъау медицинон проекттӕ царды рауадзыныл чи кусы, уыцы уӕрӕсейаг компани «МедИнвестГрупп»-ы президент Сергей Нотов ӕмӕ компанийы минӕвӕрттӕ.
ПЭТ-КТ у медицинӕйы нырыккондӕр фӕрӕз. Ӕппӕт иннӕ медицинон фӕрӕзтӕй, суанг компьютерон томографӕй дӕр уый ноджы растдӕр ӕмӕ биноныгдӕр раиртасы онкологийӕ рынчынӕн йӕ низыхатт ӕмӕ йӕ уавӕр, ома, йӕ фӕрцы онкологийӕ рынчынтӕн ӕвӕрд цӕуы ӕппӕтӕй растдӕр ӕмӕ бӕстондӕр диагностикӕ. Низыхатт раст иртӕст куы ӕрцӕуа, уӕд рынчынӕн йӕ низӕй фервӕзыны гӕнӕнтӕ дӕр дзӕвгар фылдӕр вӕййынц.
Республикӕйы Сӕргълӕууӕг Битарты Вячеслав, компанийы минӕвӕрттӕн ӕмӕ онкологон диспансеры, стӕй Ядерон медицинӕйы центры кусӕг дохтыртӕн арфӕ кӕнгӕйӕ, загъта:
— Ацы центр Дзӕуджыхъӕуы кӕй байгом, уый республикӕйӕн у, раздӕр нӕм чи никуыма уыд, ахӕм ахсджиаг къахдзӕф, нӕ цӕрджытӕн ныр сӕ бон уыдзӕн онкологон низтӕ дзӕбӕх кӕныны нырыккондӕр гӕнӕнӕй пайда кӕнын. Ӕнӕмӕнг, ацы инвестицион проекты фӕрцы хӕрзхъӕд медицинон ӕххуыс фӕхӕццӕ уыдзӕн, йе ‘нӕниздзинады уавӕрмӕ гӕсгӕ кӕй бахъӕуа, ӕппӕт уыцы адӕммӕ дӕр. Ахӕм рынчынты нымӕц та нӕм, хъыгагӕн, чысыл нӕу. Уымӕ гӕсгӕ ацы центры фӕзынд у тынг ахсджиг. Нырӕй фӕстӕмӕ нӕ республикӕйы цӕрджыты сӕ низыхатт сбӕлвырд кӕныны тыххӕй иннӕ горӕттӕм цӕуын нал хъӕудзӕн. Онкологон низты аххосӕй чи амӕлы, уыцы рынчынты нымӕц цӕмӕй къаддӕр кӕна — республикӕйы разамындӕн уый у йӕ сӕйрагдӕр хӕстӕй иу, ӕмӕ йӕ ӕххӕст кӕныныл дарддӕр дӕр кусдзыстӕм. Арфӕ кӕнын, Центр байгом кӕныныл чидӕриддӕр бацархайдта, уыдонӕн се ‘ппӕтӕн дӕр.
«МедИнвестГрупп»-ы президент Сергей Нотов йӕ раныхасы арфӕ ракодта, Цӕгат Ирыстоны Ядерон медицинӕйы центр байгом кӕныныл ӕмӕ ацы ахсджиаг проект сӕххӕст кӕныныл чи бакуыста, уыдонӕн:
— Мах нырмӕ дӕр куыстам Дагестаны, Цӕцӕны, фӕлӕ Цӕгат Кавказы республикӕты ‘хсӕн Центр ӕппӕты фыццаг гом кӕны Цӕгат Ирыстоны, ӕмӕ уый хуымӕтӕг бӕрӕггӕнӕн нӕу. Уый дзурӕг у, республикӕйы разамынд адӕмы ӕнӕниздзинадыл кӕй тыхсы ӕмӕ нырыккон медицинон гӕнӕнтӕ фӕпарахатдӕр кӕныныл кӕй архайы, ууыл. Онкологон низтӕ иртасыныл ӕмӕ рынчынтӕн хӕрзхъӕд медицинон лӕггад кӕныныл нӕ компани кусы дунеон ӕмвӕзадыл. Уымӕй уӕлдай уый у фармацевтикӕйы къабазы егъаудӕр холдинг.
Сергей Нотов куыд загъта, афтӕмӕй, ӕппӕт бӕстӕйы дӕр Ядерон медицинӕйы центртӕ ис ӕрмӕстдӕр 18.
Ӕппӕтӕй хӕстӕгдӕр нӕм ахӕм центртӕ уыд Стъараполы ӕмӕ Ростовы. Ядерон медицинӕйы центр рынчынтӕн лӕггад кӕнын райдайдзӕн ацы аз октябры ӕмӕ йӕ хъомысмӕ гӕсгӕ афӕдзмӕ лӕггад кӕндзӕн ӕхсӕз мин рынчынӕн.
ДЕДЕГКАТЫ Зӕлинӕ
Къам систа Къӕбысты Харитон
