Бӕлтайы скъолайы дӕр нырӕй фӕстӕмӕ кусдзӕн нырыккон нымӕцон ӕмӕ гуманитарон ахуырады центр «Рӕзты тӕлм». Уыцы ӕхсызгон цауы фӕдыл кадджын ӕмбырдмӕ ӕрбацыдысты Бӕлтайы цӕрджытӕ, Дзӕуджыхъӕуы Минӕвӕртты ӕмбырд ӕмӕ горӕты бынӕттон хиуынаффӕйады администрацийы бӕрнон кусджытӕ.
Зындгонд куыд у, афтӕмӕй ахӕм кусӕндӕттӕ фыццаградон национ проект «Ахуырад»-ы фӕлгӕты гом кӕнынц Уӕрӕсейы ӕппӕт регионты, уыимӕ, Цӕгат Ирыстоны дӕр. Афтӕ, республикӕйы Ахуырад ӕмӕ наукӕйы министрады бӕрӕггӕнӕнтӕм гӕсгӕ, Цӕгат Ирыстоны ахӕм центртӕ байгом уыдзӕн ӕвдайӕ фылдӕр. Уыцы кусӕндӕтты скъоладзаутӕн уӕлӕмхасӕн ахуыртӕ араздзысты информатикӕйӕ, технологийӕ, цардархайды ӕдасдзинады бындуртӕ ӕмӕ ӕндӕр предметтӕй. Уымӕй уӕлдай, уыцы центрты кусдзысты сывӕллӕтты сфӕлдыстады алыхуызон къордтӕ дӕр. Уыимӕ, «Рӕзты тӕлмытӕ» ифтонггонд цӕуынц ӕппӕты нырыккондӕр ахуырадон техникӕйӕ.
Ныронг ахӕм центртӕ, куыд зонӕм, афтӕмӕй кусын райдыдтой республикӕйы хъӕууон районты. Ныр ахӕм центр йӕ архайд рапарахат кӕндзӕн Бӕлтайы скъолайы дӕр. Кадджын ӕмбырды архайдтой ӕмӕ бӕлтайӕгтӕн уыцы ӕхсызгон цауы фӕдыл арфӕ ракодтой Дзӕуджыхъӕуы Минӕвӕртты ӕмбырды сӕрдары хӕдивӕг Сӕлбиты Зитӕ, горӕты администрацийы ахуырады управленийы хицау Зинаидӕ Ларионова ӕмӕ иннӕтӕ.
«Бӕлтайаг скъоладзаутӕн ныр зынгӕ хуыздӕр фадӕттӕ уыдзӕн информатикӕ ӕмӕ иннӕ предметтӕй бӕлвырд, бӕстондӕр зонындзинӕдтӕ райсынӕн. Уымӕн ахъаз уыдзысты центры техникон ифтонгад, стӕй дзы чи кусдзӕн, уыцы специалистты профессион дӕсныдзинад ӕмӕ фӕлтӕрддзинад. Сӕрмагондӕй нӕ арфӕйы ныхас зӕгъын фӕнды, ацы райдзаст кабинетты цалцӕг ӕмӕ фӕлгонцадыл чи бакуыста, ӕппӕт уыцы адӕмӕн», — фӕнысан кодта Зинаидӕ Ларионова.
Дзӕуджыхъӕуы администрацийы пресс-службӕ
