Ныртӕккӕ Хуссар Ирыстоны адӕмон кӕфтытӕ ӕмӕ зарджыты паддзахадон ансамблы артисттӕ зӕрдиагӕй кусынц ног программӕ бацӕттӕ кӕныныл.
Ансамблы аивадон разамонӕг Гуылӕрты Радион журналисттӕн куыд радзырдта, афтӕмӕй ног программӕимӕ коллектив аивадуарзджыты базонгӕ кӕндзӕн декабры. Уыимӕ, йӕ ныхасмӕ гӕсгӕ, фидӕны программӕ ӕнгом баст уыдзӕн ныхас «ног»-имӕ — ног ӕвӕрд кӕфтытӕ, ног уӕлӕдарӕс, стӕй, сценӕмӕ фыццаг хатт чи рахиздзӕн, уыцы артисттӕ.
«Ӕрвылбон дӕр нӕ репитицитӕ ахӕссынц 5-6 сахаты бӕрц, алчидӕр архайы йӕ хъарутыл нӕ ауӕрдгӕйӕ. Ног программӕйы уыдзысты ирон ӕмӕ Кавказы иннӕ адӕмты кӕфтытӕ. Уыимӕ, бацархайдзыстӕм, цӕмӕй дзыллон кӕфтыты ӕппынкъаддӕр архайой 24 артисты. Сӕрмагондӕй мӕ зӕгъын фӕнды, коллективы ног кафджытӕ кӕй фӕзынд, уый тыххӕй дӕр. Уыцы фӕсивӕдӕн сӕ фыццаг концерт нӕ коллективы сконды суыдзӕн ӕцӕг сфӕлдыстадон фӕлварӕн», — бафиппайдта Гуылӕры-фырт.
Ансамблы архайды иннӕ къабӕзтыл дзургӕйӕ, аивадон разамонӕг куыд фехъусын кодта, афтӕмӕй ныртӕккӕ сывӕллӕтты (6 азӕй хистӕр) ахуырмӕ исынц кӕфтыты студимӕ дӕр.
Зындгонд куыд у, афтӕмӕй Республикӕ Хуссар Ирыстоны адӕмон кӕфтытӕ ӕмӕ зарджыты Галаты Барисы номыл паддзахадон ансамбл «Симд»-ӕн бындур ӕвӕрд ӕрцыд 1936 азы.
(Информацион агентад «Осинформ»)
