Политикон парти «Иугонд Уӕрӕсе»-йы регионалон хайады уыд Муниципалон скондты ӕппӕтуӕрӕсеон конгрессы архайджыты ӕмбырд.
Муниципалон хиуынаффӕйады хуыздӕр кусӕджы ном райсыныл республикон конкурсы фондз номинацийы ацы аз чи фӕуӕлахиз, уыдонӕн — республикӕйы районты ӕмӕ хъӕуты бынӕттон хиуынаффӕйады администрациты сӕргълӕуджытӕн, сӕ хӕдивджытӕн, специалисттӕн, муниципалон скондты минӕвӕртты депутаттӕн кадджын уавӕры саккаг кодтой дипломтӕ ӕмӕ ӕхцайы премитӕ.
— Ацы ӕрвылазон конкурс мунициалон скондты хуыздӕр кусджыты ногӕй-ногмӕ кӕй рабӕрӕг кӕны, ӕмӕ йӕ архайджыты нымӕц кӕй рӕзы, уый фӕрцы нӕ бон фидарӕй зӕгъын у, нӕ республикӕйы районты бынӕттон хиуынаффӕйадӕн йӕ фидӕн ӕбӕрӕг кӕй нӕу, муниципалон хицаудзинады иннӕ оргӕнты куыстмӕ дӕр зӕрдӕ кӕй не ‘хсайы, йӕ алы къабӕзты, сӕ размӕ ӕвӕрд хӕстӕ бӕрнонӕй чи ӕххӕст кӕны, ахӕм фӕлтӕрдджын адӕм кӕй кусы, уымӕй та нӕ адӕмы цард фӕхуыздӕр кӕныны хъуыддагыл зӕрдиагӕй кӕй архайынц, уый ӕхсызгон у, — загъта РЦИ-Аланийы Муниципалон скондты советы сӕрдар Нӕкуысаты Барис ӕмӕ ма йӕ ныхасмӕ бафтыдта: — Нӕ конкурсы бӕрӕггӕнӕнтӕ бахынцыны тыххӕй жюрийы уӕнгтӕ, нӕ республикӕйы бынӕттон хиуынаффӕйады ӕмӕ муниципалон хицаудзинады фӕлтӕрдджын кусджытӕ, дзыллон хабархӕссӕг фӕрӕзты ӕмӕ ӕхсӕнадон организациты минӕвӕрттӕ лӕмбынӕг ӕркастысты конкурсы архайджытӕй алкӕй ӕрмӕджытӕм дӕр, уый фӕстӕ сын сӕ бӕрӕггӕнӕнтӕ иумӕйагӕй бахынцгӕйӕ, алы номинацийы дӕр снысан кодтам ӕртӕ бынаты. Хъуамӕ уын конкурсы хатдзӕгтӕ фехъусын кодтаиккам Муниципалон кусӕджы бон — 21 апрелы, фӕлӕ нӕ коронавирусимӕ баст уавӕр бакъуылымпы кодта.
Конкурсы территориалон ӕхсӕнадон хиуынаффӕйады хуыздӕр специалисты номинацийы фыццаг бынат бацахста Мӕздӕджы 9-ӕм ӕхсӕнадон хиуынаффӕйады сӕргълӕууӕг Галинӕ Николаева, Муниципалон сконды минӕвӕртты хуыздӕр номинацийы та фыццаг бынат саккаг кодтой Мӕздӕджы минӕвӕртты депутат Любовь Токаревайӕн, номинаци «Горӕты арӕзтады политикӕйы, архитектурӕйы, зӕххытӕй хӕдзардзинӕй пайда кӕныны, коммуналон хӕдзарады, цардархайды къабӕзтӕ биноныг кӕныны тыххӕй» фыццаг бынатмӕ рацыд Дзӕуджыхъӕуы бынӕттон хиуынаффӕйады администрацийы цӕрӕнуатон-коммуналон хӕдзарады комитеты хайады сӕргълӕууӕг Битарты Витали.
Национ политикӕйы муниципалон сконды ӕмвӕзадыл адӕмты ‘хсӕн сабырдзинад ӕмӕ хӕлардзинад тауыны номинацийы фыццаг къӕпхӕны дипломы аккаг ссис Горӕтгӕрон районы бынӕттон хиуынаффӕйады администрацийы хайады сӕргълӕууӕджы хӕдивӕг Абайты Тамарӕ.
Анвараты Валери
