Низ раиртасыны фӕрӕз

0
318

Ӕхсызгон цау ӕрцыд Ирыстоны. Дыууӕ мӕйы размӕ Республикон-онкологон диспансеры фӕзы чи байгом, йӕ койӕ дӕр нӕ стыр тасы чи уадзы ӕмӕ адӕмы цард дунейы милуангай чи хӕссы, уыцы ӕгъатыр низ ракы ныхмӕ «Ядерон медицинӕйы, ПЭТ-технолоджи», зӕгъгӕ, центр райдыдта йӕ куыст. Уый егъау ӕнтыстдзинад у нӕ бӕстӕйы медицинӕйы рӕзты. Онкологон низтӕ сӕ тӕккӕ цӕфыл сбӕлвырд кӕнын ӕмӕ сӕ ныхмӕ дзӕбӕх кӕныны мадзӕлттӕ аразынӕн молекулярон ӕмвӕзадыл ахъаззаджы медицинон лӕггад.

Ног центры куысты тыххӕй нӕ республикӕйы журналисттӕн бӕлвырддӕр радзырдта «Ядерон медицинӕйы» сӕйраг дохтыр Хъесаты Барис. Куыд загъта, афтӕмӕй “ПЭТ-Позитронон-эмиссион томографи” стыр ахъаз у, рак йӕ райдайӕны сбӕрӕг кӕнынӕн, адӕймаджы буары бӕлвырд цы ран сӕвзӕрдис, уый, ӕмӕ низы лыстӕг хӕйттӕ фенын. Ома, рак ӕххӕст куы нӕма сырӕзы, 1 къӕпхӕнӕй дӕр раздӕр сбӕрӕг кӕнын.

— Магнитон ӕмӕ компьютерон томографтӕ дӕр кӕй не сбӕлвырд кӕнынц, ахӕм ӕвӕджиауы мадзал у «ПЭТ-технолоджи». Хирургия и «лучевая терапия» — уыдон ӕдых куы свӕййынц, уӕд медицинон ӕххуыс райсӕн ис ацы центры. Компьютерон ӕмӕ магнитон томографтимӕ абаргӕйӕ, ПЭТ — адӕймаджы ӕнӕниздзинадӕн знаггад ӕппындӕр нӕ хӕссы. Раздӕр-иу нӕ рынчынты сӕ уавӕр сбӕрӕг кӕнынмӕ ӕрвыстам Ростов, Мӕскуы ӕмӕ Стъараполмӕ. Фӕлӕ, бирӕ рынчынтӕн сӕ уӕззау уавӕрмӕ гӕсгӕ ӕнцон нӕ уыд дард фӕндагыл абалц кӕнын.

Ныр нӕ республикӕйы рынчынты Уӕрӕсейы стыр горӕттӕм цӕуын нал хъӕуы. Нӕхимӕ рынчынӕн иртасӕн куысты рӕстӕг йӕ буары уагъд цӕуы радиофармпрепарат, кӕцы бӕлвырд сбӕрӕг кӕны, рак адӕймаджы буары цы ран фӕзынд, уый. Уыимӕ, канд къабӕзтӕ (метастазы) ӕмӕ «опухоль» нӕ, фӕлӕ йӕ ӕппӕты фыццаг фӕзынд дӕр, йӕ лыстӕг хӕйттӕ (частицы). ПЭТ-ы фӕрцы нӕ бон у ныр ахадгӕ мадзӕлттӕ аразын рынчыны дзӕбӕх кӕнынӕн, кӕнӕ ӕппӕты фыццаг ӕнӕнхъӕлӕджы бӕрӕггонд кӕмӕн ӕрцыд, уыдоны бынтон сдзӕбӕх кӕнынӕн. Радиофармпрепарат уагъд цӕуы ставд тугдадзинмӕ, у ӕдас мадзал, кӕнӕн ын ис афӕдз 3-4 хатты. Радиофармпрепарат ласт цӕудзӕн Стъараполӕй. Уым та ис циклотронон-радиохимион лаборатори. Центрмӕ препарат хӕццӕ кӕнӕм сӕрмагонд контейнерты. Йӕ мидӕг ис капсулӕ «мультидозӕимӕ». Уый фаг у 15-20 иртасӕн куыстӕн. Препарат бауадзыны фӕстӕ сканер бӕлвырд ӕмӕ биноныг равдисы, цъаммар низы фӕзындтыты бӕрӕг бынӕттӕ, йе ‘ппӕт миниуджытӕ, кӕцы ӕмвӕзады ис, йӕ тӕссагдзинады (злокачественность) ӕууӕлтӕ. Ядерон медицинӕйы ПЭТ-технолоджи Цӕгат Кавказы иунӕг у ӕмӕ ис махмӕ — Ирыстоны. Ӕдӕппӕт та нӕ бӕстӕйы ахӕм центртӕ арӕзт ӕрцыд 17 субъекты. Дзӕуджыхъӕуы центр медицинон лӕггад кӕндзӕн Уӕрӕсейы хуссайраг регионӕн. Алы бон дӕр онкологон низтӕй рынчынтӕн — 18 адӕймагӕн кӕндзыстӕм иртасӕн куыст. Бынӕттон цӕрджытӕй онкополиклиникӕйӕ ӕрвыст чи у медицинон полисимӕ, уыдонӕн иртасӕн куыст уыдзӕн лӕвар. Иннӕты та хъӕудзӕн фидын.

ПЭТ-технолоджи у хӕрзхъӕд нырыккон медицинон лӕггад, арӕзт ӕрцыд федералон программӕйы фӕлгӕты компани «МедИнвестГрупп»-ы къордтӕ «Медилукс», «РосНано»-йы проекттӕм гӕсгӕ.

МедИнвестГрупп проектӕн радих кодта 300 милуан сомы. Кусы нӕ центры, Мӕскуы ӕмӕ Ростовы зындгонд специалисттӕм ахуырты чи уыд, ахӕм радиологтӕ ӕмӕ рентгенологтӕ, — загъта сӕйраг дохтыр Хъесаты Барис.

Саутӕты Тамилӕ

Къамтӕ систа ХЪАЙЫРТЫ Дианӕ

ОСТАВЬТЕ ОТВЕТ

Please enter your comment!
Please enter your name here