РЦИ-Аланийы Хицауады Сæрдары хæдивæг — æнæниздзинад хъахъхъæнынады министр ГОДЖЫЦАТЫ Тамерланы æмæ Сывæллæтты республикон клиникон рынчындоны сæйраг дохтыр ИКЪАТЫ Мураты хъæппæрисæй республикæмæ Пензæйæ æрцыдысты Уæрæсейы Федерацийы Æнæниздзинад хъахъхъæнынады министрады “Зæрдæ æмæ дадзинты хирургийы федералон центры” специалисттæ.
Уыдон æркæсдзысты, Сывæллæтты республикон клиникон рынчындоны кардиохирургион низтимæ цы сывæллæттæ хуыссы, уыдонмæ æмæ се ‘нæниздзинады уавæрæн хатдзæгтæ скæндзысты. Æрцæуæг медицинон къорды сты Центры раззагдæр дохтыртæ — функционалон диагностикæйы æмæ сывæллæтты хирургийы специалисттæ, се ‘хсæн — 4-æм кардиохирургийы хайады сæргълæууæг Алексей Черногривов.
— Сывæллæттæ рынчын сты зæрдæйы алыхуызон низтæй, æмæ, медицинон æвзагыл куы дзурæм, уæд сæ уавæр зæрдæхсаинаг нæу, се ‘ппæтмæ дæр хорз каст цæуы республикон дохтырты ‘рдыгæй, алкæй дæр дзы дзæбæх кæнынц, куыд æмбæлы, афтæ. Махæн та нæ сæйраг хæс у, æвæстиатæй операци кæнын кæмæн хъæуы, ахæм сывæллæтты равзарын, — рынчынтæм фыццаг хатт æркæсыны фæстæ, — загъта Алексей Черногривов.
Алы рынчын сывæллонæн дæр сбæлвырд кодтой йе сдзæбæх кæныны мадзæлттæ, куы бахъæуа уæд та пациентты арвитдзысты Пензæмæ “Зæрдæ æмæ дадзинты хирургийы центрмæ”.
Сывæллæтты республикон клиникон рынчындоны куыд зæгъынц, афтæмæй ахæм специалистты æрцыд пайдайаг у нæхи дохтыртæн, стæй рынчынтæн дæр.
— Сывæллæтты кардиохирургийы къабаз республикæйы нырма уал нæма райрæзыд, уымæ гæсгæ ахæм æмгуыстад у тынг æххуыс æмæ хорзæрдæм зыны, куыд дохтырты дæсныдзинадыл, афтæ рынчынтыл дæр, — зæгъы Сывæллæтты республикон клиникон рынчындоны амбулаторон-консультативон фарстыты фæдыл сæйраг дохтыры хæдивæг Хабæты Ланæ. — Нæ рынчындоны дохтыртæ иумæ кусынц федералон стырдæр медицинон кусæндæтты специалисттимæ иумæ, сæхи ахуыр кæнынц сæ фæлтæрддзинадыл, æмæ афтæмæй сæхи дæсныдзинад дæр кæны бæрзонддæр.
Æрцæуæг дохтыртæ Цæгат Ирыстоны уыдзысты цыппар боны. Уыдон бабæрæг кæндзысты Мæздæджы сывæллæтты поликлиникæ дæр. Æдæппæт æркæсдзысты æмæ се ‘нæниздзинады уавæр сбæрæг кæндзысты 80 сывæллонæн. Республикæйы цæрджытæн се ‘ххуыс у лæвар, Æнæмæнг медицинон фæдзæхстады полисы лæггæдты фæлгæты.
ДЖИХАТЫ Стеллæ,
РЦИ-Аланийы
Æнæниздзинад
хъахъхъæнынады
министрады
пресс-службæ
