Цæмæй адæмы цард фæхуыздæр уа, уый тыххæй РЦИ-Аланийы фæстаг азты стыр æргом здæхт цæуы паддзахадон æмæ республикон национ проекттæ царды ауадзыны хъуыддагмæ. Уыцы проекттæй иу у «Мæгуырдзинады ныхмæ тох». Ацы проекты руаджы цæрджыты бон у хи куыстуат байгом кæнын, хи дарынхъом уæвын æмæ афтæ дарддæр. Финансон æххуысы бæрц бæрæг кæны сæрмагонд къамис.
Нæ республикæйы дзыллон хабархæссæг фæрæзты минæвæрттæ фембæлдысты проекты разамонæг Абайты Константинимæ.
— Абоны бонмæ адæмимæ бафыстам 544 социалон бадзырды. Уыдонæй 200 адæймаджы ныридæгæн райстой æхцайы фæрæзтæ æмæ сæ социалон проекттыл кусынмæ бавнæлдтой. Проекттæ сты алыхуызон: хъæууон хæдзарады проекттæ баст сты стурвос дарын æмæ туризмимæ. Ныртæккæ нæ республикæйы экономикæйы рæзтимæ æнгом баст у туризм. Уый фæдыл нæм бирæ хъуыдытæ æмæ социалон проекттæ ис. Зæгъæм, социалон бадзырд чи бафыста, уыдон сæ машинæтæм базилдзысты, алыхуызон хъæугæ ифтонггарзæй сæ баххæст кæндзысты, æмæ бæлццæтты ласдзысты Мамысоны туристон-рекреацион комплексмæ, — зæгъы проекты разамонæг.
Цæмæй адæймаг паддзахадон социалон æххуысы фæрæз райса, уый тыххæй, фыццаджыдæр, хъæуы бадæттын куырдиат, кæм цæры, уыцы районы социалон æххуысады хайадмæ, кæнæ та Фæллой æмæ социалон æххуысады министрадмæ. Бацæттæ кæнын хъæуы хъæугæ гæххæттытæ, уыдонимæ, бинонтæ фæкæсынхъуаг кæй сты, уый æвдисæндар.
ХЪОЙБАЙТЫ Галинæ
Къам систа ХЪАЙЫРТЫ Дианæ
