Ирыстоны культурæ æмæ æхсæнадон-политикон рæзтмæ ахадгæ æвæрæн чи бахаста, уыдонæй иу уыд нæ адæмы иузæрдион хъæбул, Цæгат Ирыстоны адæмон нывгæнæг, поэт, публицист, æхсæнадон архайæг Абойты Зауырбег. Йæ цард уыд ирд сфæлдыстадон нывæстæй æххæст. Йæ адæмæн бирæ хæрзты бацыд, фæндыд ма йæ ноджы фылдæр лæггад бакæнын нæ дзыллæйы хæрзæбонæн, фæлæ къорд азы размæ Мæскуыйы, йе ‘рмадзмæ цæугæйæ, æбæрæгæй фесæфт. Абон дæр нæ ничи зоны, Зауырбеджы æнæнцой, Ирыстонмæ уарзты æнкъарæнтæй дзаг зæрдæ æмæ уд тæлфынц æви йæ адзал ссардта, уый…
Зауырбег йæ фæстæ ныууагъта бирæ графикон æмæ нываивадон хæдхуыз куыстытæ. Цæмæй йæ номимæ æмæ йе сфæлдыстадимæ ныртæккæйы æрыгон нывгæнджытæ зонгæ уой, йæ сфæлдыстадон æрмдзæф нæ адæмæй рох ма уа, уыцы нысанимæ цалдæр азы размæ РЦИ-Аланийы Культурæйы министрад æмæ Нывгæнджыты цæдисы хъæппæрисæй Зауырбеджы номыл æрыгон нывгæнджыты ‘хсæн арæзт æрцыд конкурс «Ирыстоны æвзонгад». Ацы æркасты иудадзыгдæр фæархайынц, 35 азы онг кæуыл цæуы, ахæм æрыгон нывгæнджытæ æмæ скульптортæ.
Æндæрæбон нæ республикæйы Нывгæнджыты цæдисы равдыстыты залы байгом ацы конкурсы архайджыты нывты равдыст. Йæ фенынмæ æрбацыдысты сфæлдыстадон интеллигенцийы минæвæрттæ, уæлдæр ахуырады скъолаты ахуыргæнджытæ, студенттæ, конкурсон равдысты архайджыты хиуæттæ, студенттæ.
— Курдиатджын нывгæнæг æмæ график Абойты Зауырбеджы куыстытæ зынгæ бынат ахсынц национ культурæ æмæ аивады. Кæд бирæ азты Мæскуыйы цард, уæддæр æнгом баст уыд йæ райгуырæн зæххимæ, йæ дзыллæимæ. Ирон культурæйы хæзнатæ æмæ фарн хаста нæ бæстæйы цæрæг адæмтæм. Хионы цæстæй каст æмæ цæстуарзонæй æххуыс кодта нæ республикæйы сфæлдыстадон фæсивæды курдиæтты рæзтæн, — загъта, равдыст гом кæнгæйæ, РЦИ-Аланийы Нывгæнджыты цæдисы сæрдар, УФ-йы сгуыхт нывгæнæг Мæргъиты Таймураз. — Ацы равдыст ссис фæткон. Æмæ дзы æрыгон нывгæнджытæ разæнгардæй фæархайынц. Ныр дæр дзы фендзыстут 97 аивадон куысты. Сæ автортæ се ‘рмдзæф æвдисынц нываивады алы жанрты. Иу та сæ кæны Ирыстонмæ æмæ курдиатджын нывгæнæг, æхсæнадон архайæг Абойты Зауырбеджы бындурон нываивадон æрмдзæфæн стыр аргъ кæй кæнынц, уыцы рухс хъуыды, — фæци йæ ныхас Таймураз.
Уый ныхасы бар радта Зауырбеджы хо, конкурс æмæ равдыст саразджытæй иу, Гæздæнты Гайтойы номыл республикон фæсивæдон библиотекæйы хайады сæргълæууæг, РЦИ-Аланийы культурæйы сгуыхт кусæг Абойты Алетæйæн. Равдыстмæ æрбацæуджыты уый базонгæ кодта йæ курдиатджын æфсымæры царды, ахуыры, сфæлдыстадон æмæ æхсæнадон архайды цымыдисагдæр цæвиттонтимæ. Сæ фæрцы та æппæт уазджыты цæстытыл дæр ирдæй ауад Зауырбеджы — хæдбындур нывгæнæджы, курдиатджын графикы, æхсæнадон архайæджы, публицисты, йæ дзыллæйы амондыл зæрдæйæ чи тыхст æмæ сæ фарнæн бæлвырд хъуыддæгтæ чи арæзта, уыцы æцæг ирон лæджы рухс сурæт.
Равдыст «Ирыстоны æвзонгад»-ы ахадындзинады æмæ Абойты Зауырбеджы тыххæй сæ зæрдæагайгæ мысинæгтæ радзырдтой УФ-йы адæмон æмæ сгуыхт нывгæнджытæ, профессортæ Бедойты Шалва, Джыккайты Мурат, Челæхсаты Магрез, зындгонд скульптор, УФ-йы сгуыхт æмæ РЦИ-Аланийы адæмон нывгæнæг Дзбойты Михал
Æрыгон нывгæнджыты равдыст «Ирыстоны æвзонгад»-ы ацы хатт дæр фенæн уыд Дзæуджыхъæуы Дзанайты Азанбеджы номыл нывгæнынады училищæйы, ЦИПУ-йы аивæдты факультеты нывгæнынады хайады, Мæскуы æмæ Бетъырбухы аивадон уæлдæр скъолаты студентты конд нывтæ æмæ скульптурон композицитæ. Ацы аз арæзт æрцыд РЦИ-Аланийы адæмон нывгæнæг Абойты Зауырбеджы райгуырдыл 90 азы сæххæсты фæдыл.
Гасанты Валери
Къамтæ систа ХЪАЙЫРТЫ Дианæ
