Горæт Орелы армрестлингæй Уæрæсейы чемпионаты цы цыппарсæдæ спортсмены ерыс кодтой, уыдоны ’хсæн уыдысты РЦИ-Аланийы æртын минæвары.
Нæ чызджытæ æмæ лæппутæн, галиу æмæ рахиз къухтæй хæцгæйæ, бантыст 21 хæрзиуæджы рамбулын.
Чызджыты ерысты 1-аг бынæттæ бацахстой: 70 кг онг уæзы Маринæ Матвеева (рахиз къухæй хæцгæйæ) æмæ +90 кг – Хъайырты Мæдинæ (галиу къухæй). 2-аг бынæттæм рацыдысты: 60 кг – Хортиты Оксанæ (рахиз æмæ галиу къухтæй) æмæ 70 кг – Дзуццаты Елизаветæ (галиу къухæй). 3-аг бынæттæ æмæ бронзæ майдантæ рамбылдтой 60 кг – Хъæрджынты Эллæ (галиу къухæй) æмæ Дзуццаты Елизаветæ (рахиз къухæй).
Нæлгоймæгты ерысты 1-æм бынæттæ æмæ сыгъзæрин майдантæ рамбылдтой: 60 кг – Церекаты Раман (1-аг бынат рахиз къухæй, 3-аг – галиу къухæй), 75 кг – Золойты Алан (1-аг бынæттæ галиу æмæ рахиз къухтæй), 90 кг – Цæрикъаты Владислав (1-аг бынæттæ рахиз æмæ галиу къухтæй), +110 кг – Хъазиты Гочæ (1-аг бынат рахиз къухæй, 2-аг та – галиу къухæй). 2-аг бынæттæ ма рамбылдтой: 65 кг – Саулохты Азæмæт (рахиз къухæй), 80 кг – Касаты Тамерлан (рахиз къухæй). Бронзæ майдантæй хорзæхджынгонд систы 3-аг бынæттæ бацахсджытæ: 65 кг – Хуыбаты Ирбег (галиу къухæй), 75 кг – Вячеслав Кутателадзе (рахиз къухæй), 80 кг – Хæбæлаты Арсен (галиу къухæй).
Командæты ’хсæн Ирыстоны минæвæрттæ бацахстой 1-аг бынат, 2-аг æмæ 3-аг бынæттæм рацыдысты Бетъырбух æмæ Татарстаны командæтæ.
РЦИ-Аланийы Армрестлинджы федерацийы президент Цъæхилты Таймураз зæрдиаг арфæ ракодта нæ республикæйы Физикон культурæ æмæ спорты министрад æмæ Спортивон-цæттæгæнæн центры кусджытæн, командæйæн ерыстæм ацæуынмæ уавæртæ кæй сарæзтой, уый тыххæй.
Баскаты Уырызмæг
