Ацы бонты сæ профессион бон сбæрæг кодтой, сæ куысты хæстæм гæсгæ адæймагæн йæ фарсмæ йæ зын сахаты æппæты фыццаг чи балæууы æмæ, фæкæсинаг чи у, уыдонæн сæ цард чи фæрогдæр кæны æмæ сыл чи баузæлы, уыцы адæм — социалон кусджытæ.
Нæ республикæйы ис социалон лæггадгæнæг 43 кусæндоны æмæ организацийы. Уым адæмæн лæггад кæнынц æртæ минæй фылдæр социалон кусæджы. Сæ бæрæгбон рæсугъдæй арвитыны тыххæй уыдонæн сæ хуыздæртæ знон æрбамбырд сты Уырыссаг академион театры.
Республикæйы социалон кусджытæн арфæ ракæнынмæ æрбацыд Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйло.
— Æхсызгон мын у, уæ профессион бæрæгбоны уын арфæ кæй кæнын, уый. Адæммæ, уæлдайдæр царды зын уавæрты бахауæг, фæкæсинаг адæммæ, сымах стут се ‘ппæтæй дæр хæстæгдæр, æмæ, уæ хæстæ æххæст кæнгæйæ, фæлмæнзæрдæ æмæ æнæкæрон фæразондзинад кæй æвдисут, уый тыххæй уын стыр бузныг. Уæ куысты вæййы зындзинæдтæ, къуылымпытæ, фæлæ сæ сæрты ахизынæн уын не ‘ххуыс кæй уыдзæн, уымæй уын зæрдæ æвæрын, — загъта Сергей Маняйло.
Адæмæн социалон лæггад кæныны къабазы сгуыхтдзинæдты тыххæй республикæйы Сæргълæууæджы Указæй «Республикæ Цæгат Ирыстон-Аланийы социалон хъахъхъæнынады сгуыхт кусæджы» кадджын ном лæвæрд æрцыд: Батиаты Светланæйæн — Рахизфарсы районы социалон лæггадгæнæг центры специалистæн, Джиоты Земфирæйæн — горæт Дзæуджыхъæуы Цæгат-Ныгуылæйнаг муниципалон зылды социалон лæггадгæнæг центры хайады сæргълæууæгæн, Дзантиаты Томæйæн — Дзæуджыхъæуы Терчыфалейы муниципалон зылды социалон лæггадгæнæг центры хайады сæргълæууæгæн, Дзгойты Зæлинæйæн — республикæйы Фæллой æмæ социалон рæзты министрады инвалидтимæ куысты фæдыл хайады сæргълæууæгæн, Дойаты Тамарæйæн — ацæргæ граждæнтæ æмæ инвалидтæ боныгон кæм вæййынц, Дзæуджыхъæуы уыцы центры хайады сæргълæууæгæн, Татьянæ Демченкойæн — Мæздæджы районы социалон лæггадгæнæг центры социалон кусæгæн æмæ Сосранты Анжелæйæн — Æрæфы районы социалон лæггадгæнæг центры социалон кусæгæн.
Сæ куысты хæстæ зæрдиагæй æмæ æнтыстджынæй кæй æххæст кæнынц, уый тыххæй Республикæ Цæгат Ирыстон-Аланийы Кады гæххæттæй хорзæхджын æрцыдысты: Фæллой æмæ социалон рæзты министрады хайады сæргълæууæг Бестауты Иринæ, Фæллой æмæ социалон рæзты министрады бухгалтерон хыгъды сæйраг специалист Джиоты Беллæ, сывæллæтты санатори «Тæмисчъы» сæйраг медицинон хо Хъараты Фатимæ, Фæллой æмæ социалон рæзты министрады сæйраг специалист-эксперт Мыстулаты Иринæ, Дзæуджыхъæуы Цæгат-Ныгуылæйнаг муниципалон зылды социалон лæггадгæнæг центры директоры хæдивæг Сланты Беллæ æмæ сывæллæтты реабилитацион санатори «Тæмисчъы» директор Цæгæраты Зæлинæ.
ДЕДЕГКАТЫ Зæлинæ
