Зындгонд куыд у, афтæмæй ивгъуыд хуыцаубоны Уæрæсейы сбæрæг кодтой Медицинон кусæджы бон. Уыцы цауы фæдыл кадджын æмбырд арæзт æрцыд Дзæуджыхъæуы дæр. Республикæйы æнæниздзинад хъахъхъæнынады къабазы кусджытæн сæ бæрæгбоны фæдыл арфæтæ ракодта æмæ хæрзиуджытæ радта Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйло.
Республикæйы разамонæг йæ арфæйы ныхасы куыд фæбæрæг кодта, афтæмæй цæгатирыстойнаг дохтыртæ кад æмæ радимæ æххæст кæнынц сæ профессион хæстæ — фыццаградон медицинон æххуыс бакæнынæй æппæты вазыгджындæр операцитæ саразыны онг. Медицинæйы къабазы кусджытæ сæ архайды уæрæхдæр пайда кæнынц æппæты нырыккондæр технологитæй, æппæт фадæттæй æвналынц, цæмæй рынчын тагъддæр йæ къахыл слæууа.
— Коронавирусы пандеми иу хатт ма ирдæй равдыста, бахъуаджы сахат медицинон кусджытæ удуæлдайдзинад æмæ суанг хъæбатырдзинад равдисыныл дæр кæй нæ бацауæрддзысты, уый. Къабазы æппæт кусджытæн дæр зæрдиаг бузныг зæгъын! Сæрмагондæй фæбæрæг кæндзынæн, сæ бинонты къуыригæйттæ нæ фенгæйæ, рынчындæтты инфекцион хайæдты чи куыста æмæ ныртæккæ дæр чи кусы, уыцы медикты. Хъыгагæн, эпидемиологон уавæр фæстаг рæстæг ногæй иуцасдæр фæкарздæр. Фæлæ дызæрдыг нæ кæнын, иумæйаг хъарутæй карз низы ныхмæ фидар кæй фæлæудзыстæм, ууыл. Зынаргъ хæлæрттæ! Уæ бæрæгбоны хорзæх уæ уæд, — загъта Сергей Меняйло.
Арфæты фæстæ республикæйы Сæргълæууæг фембæлды архайджыты къордæн радта федералон æмæ республикон паддзахадон хæрзиуджытæ.
Афтæ, УФ-йы Президенты Указæй пандемийы æууæлты удуæлдай куысты тыххæй Пироговы номыл орденæй хорзæхджын æрцыдысты: Гигиенæ æмæ эпидемиологийы республикон центры специалисттæ-дохтыртæ Абайты Аланæ, Анжеликæ Акопян, Борыхъуаты Иринæ, Булацаты Майя, Засеты Ирланæ, Къарджиаты Агуындæ, Хъæцмæзты Кристинæ, Олисаты Светланæ, Сæбанты Зæлинæ æмæ Сæлбиты Альбинæ, биолог Бутаты Еленæ, хайады хицау Гойаты Нанæ, химик-эксперт Къадзаты Светланæ, хайады хицауы хæстæ æххæстгæнæг Мæхъиты Иринæ æмæ лабараторийы сæргълæууæг Мамиаты Светланæ, стæй «Роспотребнадзор»-ы управленийы хайады хицау Габеты Джульеттæ.
Хъырымаг Лукайы майдан райстой: уæлдæр амынд центры дохтыры æххуысгæнджытæ Æмбалты Фатимæ, Уаниты Зæлинæ, Галинæ Денисова, Светланæ Зайченко, Наталья Катрич, Георгий Концелидзе, Цагъаты Джулетæ, лаборанттæ Гикъаты Дианæ, Голиаты Оксанæ, Нæкуысаты Зæлинæ æмæ Томайты Дзерассæ, стæй «Роспотребнадзор»-ы республикон управленийы сæйраг специалисттæ-эксперттæ Æмбалты Беллæ, Битеты Земæ, Гъуцъунаты Тамарæ æмæ Джусойты Татьянæ.
РЦИ-Аланийы Сæргълæууæджы Указæй æнæниздзинад хъахъхъæнынады къабазы сгуыхтдзинæдтæ æмæ бæрзонд профессион дæсныйады тыххæй кадджын ном «Республикæ Цæгат Ирыстон-Аланийы сгуыхт дохтыр» лæвæрд æрцыд: 1-æм поликлиникæйы травматолог-ортопед Абысалты Русланæн, Мæздæджы районы Центрон рынчындоны сæйраг дохтыры хæдивæг Бестауты Эрикæн, Сывæллæтты республикон клиникон рынчындоны дохтыр-нефролог Битеты Валентинæйæн, æнæххæст бæрнондзинады æхсæнад «Æнæниздзинад»-ы сæйраг дохтыры хæдивæг Гаглойты Нодарæн, УФ-йы Хъахъхъæнынады министрады «Санитарон-эпидемиологон цæстдарды 1002-æм центры дохтыр-эпидемиолог Гайттаты Русланæн, Тагъд медицинон æххуысы республикон клиникон рынчындоны дохтыртæ Хъайтмазты Фатимæ æмæ Гиоты Ларисæйæн, Сывæллæтты республикон клиникон рынчындоны дохтыр-хирург Дзукъаты Асланæн, Республикон офтальмологон центры дохтыртæ Туаты Зуретæ æмæ Катауты Тамарæйæн, Республикон клиникон рынчындоны дохтыр-пульмонолог Сæбанты Зинаидæ æмæ Сывæллæтты республикон клиникон рынчындоны анестезиолог-реаниматолог Тадеты Вадимæн.
Медицинæйы къабазы бирæазон æнæзæрдæхудт куысты тыххæй кадджын ном «Республикæ Цæгат Ирыстон-Аланийы æнæниздзинад хъахъхъæнынады сгуыхт кусæг» лæвæрд æрцыд: æнæххæст бæрнондзинады æхсæнад «Æнæниздзинад»-ы генералон директор Гæбæраты Юрийæн, 1-æм рæвдауæндоны лаборант Дзгойты Зинаидæ æмæ РЦИ-Аланийы Гигиенæ æмæ эпидемиологийы центры эпидемиологы æххуысгæнæг Сæууойты Лидияйæн.
РЦИ-Аланийы
Сæргълæууæджы
æмæ Хицауады
пресс-службæ
