Республикæйæн йæ экономикон хъомыс бирæ у

0
17

Нæ республикæйы кусæг балцы уыд УФ-йы экономикон рæзты министр Максим Решетников, йемæ ма Уæрæсейы Промышленност æмæ базарады министрады, «Ростех» æмæ æндæр профилон ведомствæты бæрнон кусджытæ.

Цæгат Ирыстонмæ ацы кусæг балц министрæн фыццаг нæ уыд. Йæ радон ссыды нысан уыд Цæгат Ирыстоны социалон-экономикон рæзтæн аргъ скæнын, инвестицитæ республикæмæ куыд цæуынц, уый сбæлвырд кæнын, базонын, куыд æххæстгонд цæуынц национ проекттæ æмæ программæтæ республикæйы, стæй, нæ бæстæйы ныхмæ, раздæр чи никуыма уыд, ахæм санкцитæ æвæрд кæй цæуы, уый нымайгæйæ, бизнесæн цавæр æххуысы мадзæлттæ ис æмæ цы уавæрты архайынц, уый сбæлвырд кæнын дæр.
Цæгат Ирыстоны Сæргълæууæг Сергей Меняйло æмæ республикæйы хицаудзинад æххæстгæнæг оргæнты минæвæрттимæ фембæлды рæстæг Максим Решетников куыд загъта, афтæмæй Цæгат Ирыстонæн йæ экономикон хъомыс у бирæ, уымæ гæсгæ Уæрæсейы Экономикон рæзты министрады, иннæ федералон ведомствæты ‘рдыгæй йæм ис сæрмагонд хъусдард.
— Республикæ лæуд у рæзты фæндагыл. Ууыл дзурæг сты ацы азы фыццаг кварталы бæрæггæнæнтæ. Фæфылдæр инвестициты бæрц. Сæ гуырахстмæ гæсгæ Цæгат Кавказы федералон зылды субъектты ‘хсæн Цæгат Ирыстон ахсы фыццаг бынат. Хорзæрдæм ивддзинæдтæ цæуы промышленносты, хъæууон хæдзарады, туризмы, — фембæлды фæстæ журналистты фарстытæн дзуаппытæ дæтгæйæ загъта министр.
Максим Решетников куыд бафиппайдта, афтæмæй, Цæгат Ирыстон бахъахъхъæдта йæ промышленнон хъомыс, æмæ уыцы хъомыс фидардæр цæмæй кæна, ууыл зæрдиагæй архайы республикæйы Сæргълæууæг Сергей Меняйло йæ дæлбар бæрнон кусджытимæ.
Ныртæккæ республикæйы æххæстгонд цæуынц 20 паддзахадон программæйы, уыдонæй 12 сты национ проекттæ. Се ‘ппæтæн дæр сæ иумæйаг хæрдзтæ сты 20 миллиард сомы. Æппæт ацы программæты фæлгæты 114 объекты ныртæккæ цæуынц арæзтадон, бындурон цалцæггæнæн æмæ рацарæзты куыстытæ.
— Кæй зæгъын æй хъæуы, ис сагъæссаг куыстуæттæ дæр, абоны базарадæй чи фæхауæггаг, абоны домæнтæн дзуапп чи нал дæтты æмæ йæ авналæнтæ кæмæн нал амонынц, ахæмтæ. Уыдон домынц ивддзинæдтæ, ног цæстæнгас, уымæ гæсгæ республикæйæн йæ фарсмæ балæудзæн федералон Хицауад, фарстатæ лыг кæнынæн æххуыс уыдзæн федералон бюджетæй дæр, — бафиппайдта Максим Решетников.

Социалон къабаз райрæзын кæнынæн ис Уæрæсейы Федерецийы Президенты сæрмагонд бардзырдтæ. Ацы ран ныхас, фыццаджыдæр, цæуы горæт Беслæныл, стæй Мæздæджы æмæ Горæтгæрон районтыл. Сæ райрæзын кæныныл æххæстгонд цæуынц бирæ алыхуызон мадзæлттæ, лæвæрд цæуы уæлæмхасæн финансон æххуыс.
Максим Решетников æмæ Сергей Меняйло сæ фембæлды рæстæг куыд фæнысан кодтой, афтæмæй Уæрæсейы Президенты уынаффæтæ цæуынц æххæстгонд, фæлæ куыст хъæуы ноджы фæкарздæр кæнын, социалон объекттæ — фылдæр аразын. Ацы нысантæ сæххæст кæнынæн 2023-2025 азты федералон бюджеты æвæрд æрцæудзæн уæлæмхасæн фæрæзтæ. Æрмæст хæрдзты-проектон гæххæттытæ хъуамæ цæттæгонд цæуой афойнадыл.
Фембæлды рæстæг ныхас цыд курорт «Мамысон»-ыл, ног аэровокзал Дзæуджыхъæуы аразыныл, цæрæнуатон-коммуналон хæдзарады къабаз рацаразыныл, Вагæттæ цалцæггæнæн заводы хъысмæтыл.
«Мамысон»-ыл ныхас кæнгæйæ, фембæлды архайджытæ куыд загътой, афтæмæй фыццаг инвесторимæ бадзырд фыст æрцыд. Уый йæхимæ исы фондз фысымуаты, стæй ма коттеджтæ, ресторантæ æмæ æндæр социалон объекттæ саразыны хæс. 2023-2024 азты зымæгон рæстæгмæ курорты фæзындзæн бындурон инфраструктурæ, цæттæ уыдзæн лыжæтыл цæуынæн хæххон фæндаджы 20 километры. Уый уыдзæн куыстыты фыццаг рад, æмæ, куыддæр сцæттæ уа, афтæ бавналдзысты куыстыты дыккаг, стæй та æртыккаг радмæ дæр. Ныртæккæ фыццаг рады куыстытæ сты сæ тæккæ тæмæны.
Сергей Меняйло арфæ ракодта Максим Решетниковæн æмæ, йемæ чи ссыд, уыцы бæрнон кусджытæн, федералон Хицауады ‘рдыгæй Цæгат Ирыстонмæ ахæм хъусдард кæй ис, уый тыххæй.
Цæгат Ирыстонмæ йæ кусæг балцы Максим Решетников бабæрæг кодта Беслæн дæр. Фыццæгæм скъолайы хæлд спортивон залы сæвæрдта дидинджытæ æмæ фембæлд «Беслæны мадæлтæ»-йы комитеты разамонджытимæ — Дудиаты Сусаннæ æмæ Гæдиаты Анетæимæ. Се ‘хсæн ныхас цыд, фыццæгæм скъолайы бындурыл арæзт чи цæуы, «Беслæн. 1-æм скъола», зæгъгæ, Дунеон культурон-патриотон ацы центрыл. Йæ аразыны æмæ йæ нысаны тыххæй сылгоймæгтæ загътой сæ фæндæттæ æмæ фиппаинæгтæ. Дудиаты Сусаннæ куыд загъта, афтæмæй центры нысан у терроризмы профилактикæ, æмæ уыцы нысанæн йæ ахсджиагдзинад æмбаргæйæ, Центр аразынмæ бар чидæриддæр дары, се ‘ппæт дæр сæ хæстæ æххæст кæнынц цæсгомджынæй æмæ бæрнонæй.
Куыстытæ æххæстгæнæг у реставрацион арæзтадон компани «Скифос-РСК». Центры арæзтад куыд цæуы, уый тыххæй бæлвырд хабæрттæ уазджытæн радзырдта компанийы разамонæг Петр Павлов. Куыд загъта, афтæмæй куыстытæ æххæстгонд цæуынц «Цæгат Кавказы федералон зылды райрæзт»-ы паддзахадон программæйы фæлгæты. Ныронг куыстытæн сæ 30 проценты æххæстгонд æрцыдысты. Афæдзы кæронмæ Центр хъуамæ уа цæттæ. Проекты нысан у, 2004 азы 1-3 сентябры ацы ран цы æвирхъау бæллæх æрцыд, уымæн йæ историон фæд бахъахъхъæнын, хæлд скъолайы бæстыхай та, куыд мемориалон-историон нысаниуæджы объект, уыцы хуызы бахъахъхъæнын.
Уыцы бон Беслæны уыд цины бæрæгбон дæр — байгом ног рæвдауæндон. Горæты цæрджытæ тынг æнхъæлмæ кастысты ацы æхсызгон цаумæ. Йæ гæнæнтæм гæсгæ рæвдауæндон дзуапп дæтты æппæт нырыккон домæнтæн. Бынат дзы ис 120 сывæллонæн. Арæзт та æрцыд Беслæны райрæзты генералон пъланы фæлгæты. Нæ республикæйы Сæргълæууæг Сергей Меняйло, стæй Максим Решетников æмæ мæскуыйаг иннæ уазджытæ дæр уыдысты ацы рæсугъд бæрæгбоны архайджытæ.
Беслæны цæрджытæн æхсызгон цауы фæдыл арфæ ракодтой республикæйы ахуырад æмæ наукæйы министр Алыбегты Эллæ æмæ Беслæны муниципалон сконды сæргълæууæг Фрайты Сослан.

Дедегкаты Зæлинæ

 

ОСТАВЬТЕ ОТВЕТ

Please enter your comment!
Please enter your name here