Зындгонд куыд у, афтæмæй ивгъуыд хуыцаубоны Уæрæсейы æнæниздзинад хъахъхъæнынады къабазы минæвæрттæ сбæрæг кодтой сæ профессион бæрæгбон — Медицинон кусæджы бон. Къабазы кадджындæр кусджытæн сæ бæрæгбоны фæдыл арфæ ракодта РЦИ-Аланийы Сæргълæууæг Сергей Меняйло.
Медиктæ сæ кадджын æмбырд сарæзтой Тæбæхсæуты Балойы номыл Ирон академион театры агъуысты. Фембæлды архайдтой Цæгат Ирыстоны Парламенты Сæрдар Алексей Мачнев, республикæйы Хицауады Сæрдары хæдивæг Александр Реутов, æнæниздзинад хъахъхъæнынады министр Тебиаты Сослан æмæ иннæ бæрнон кусджытæ.
Сергей Меняйло йæ арфæйы ныхасы медицинон къабазы кусджытæн бузныг загъта сæ зын, фæлæ хъæугæ куысты тыххæй. Республикæйы разамонæг куыд фæбæрæг кодта, афтæмæй медиктæ, сæ равзæрст дæсныйадыл æнувыд уæвгæйæ, адæмы æнæниздзинад бахъахъхъæныныл уæхскуæзæй кусынц. Сергей Меняйлойы ныхасмæ гæсгæ, Цæгат Ирыстоны æнæниздзинад хъахъхъæнынады къабаз ныртæккæ архайы зын уавæрты. Уыимæ, хицауады паддзахадон оргæнтæ æмæ æнæниздзинад хъахъхъæнынады системæйы бæрнон кусджытæ æмæ иннæ специалистты æмхъару архайды фæрцы æппæт сæвзæргæ фарстатæ дæр лыггонд æрцæудзысты.
— Цы йæ æмбæхсæм — махмæ дохтыртæ арæх фæкæсынц, цавæрфæнды зын уавæрæй дæр æххуысхъуаг адæймаджы чи аирвæзын кæндзæн, ахæм зæдтæ. Æмæ, æцæгæйдæр, дохтыр адæймаджы ныфс бауадзы, йæ низæй кæй фервæздзæн, уымæй. Æмæ фылдæр хатт афтæ рауайы. Æмæ уый тыххæй æнæниздзинад хъахъхъæнынады къабазы кусджытæн æз бузныг зæгъын, — фæбæрæг кодта Сергей Меняйло.
Уый фæстæ республикæйы Сæргълæууæг фæлтæрдджындæр кусджыты къордæн саккаг кодта паддзахадон хæрзиуджытæ.
Афтæ, æнæниздзинад хъахъхъæнынады къабазы сгуыхтдзинæдтæ æмæ бæрзонд профессион дæсныдзинады тыххæй кадджын ном «Республикæ Цæгат Ирыстон-Аланийы сгуыхт дохтыр» лæвæрд æрцыд: Дзæуджыхъæуы 1-æм поликлиникæйы сæйраг дохтыры хæдивæг Абысалты Æхсарбегæн, Офтальмологийы республикон центры директоры хæдивæг Бестолты Зæринæйæн, Дзæуджыхъæуы 1-æм поликлиникæйы дохтыр-хирург Бигъуылаты Иринæйæн, Тагъд медицинон æххуысы республикон клиникон рынчындоны анестезиолог-реаниматолог Бузарты Аллæйæн, Дзæуджыхъæуы 7-æм поликлиникæйы диагностикæйы дохтыр Гаджиты Лейлæйæн, Цæгат Ирыстоны паддзахадон медицинон академийы адæймаджы хуылфыдзаумæтты 5-æм кафедрæйы профессор Дзгойты Фатимæйæн, Фтизиопульмонологийы республикон клиникон центры хайады хицау Хъæдохты Маратæн, Дыгуры районы Центрон рынчындоны диагностикæйы хайады дохтыр Тæкъойты Светланæйæн, Тæрхонадон-медицинон экспертизæйы республикон бюройы дохтыр Тъехты Иналæн, Æфсæнвæндаджы клиникон рынчындоны хайады хицау Тыджыты Северянæн, Дзæуджыхъæуы 2-æм арæндоны сæйраг дохтыр Тогойты Жаннæйæн, Дзæуджыхъæуы сывæллæтты 4-æм поликлиникæйы сæйраг дохтыр Туриашвили Кетеванæн, Сывæллæтты республикон клиникон рынчындоны хайады хицау Царахаты Вячеслав æмæ медицинон клиникæ «Æнæниздзинад»-ы дохтыр-хирург Цохъты Зауырæн.
Медицинæйы къабазы сгуытдзинæдтæ æмæ бирæазон зæрдиаг архайды тыххæй кадджын ном «Республикæ Цæгат Ирыстон-Аланийы æнæниздзинад хъахъхъæнынады сгуыхт кусæг» саккаг кодтой: Мæздæджы районы Центрон рынчындоны медицинон хотæ Дзансолты Алетæ æмæ Чаусова Тамарæйæн, стæй Медицинон информацион-аналитикон республикон центры хайады хицау Санаты Азæйæн.
Æмбырды дыккаг хайы республикæйы сфæлдыстадон коллективтæ æмæ хицæн артисттæ дохтырты кадæн радтой стыр концерт.
РЦИ-Аланийы
Сæргълæууæджы
æмæ Хицауады
пресс-службæ
