Арфæтæ —Уырыссаг театры коллективæн

0
39

Евгений Вахтанговы номыл Уырыссаг академион театр сбæрæг кодта йæ 150 азы юбилей. Уыцы ахсджиаг цауы фæдыл арæзт кадджын æмбырды архайдта Цæгат Ирыстоны Сæргълæууæг Сергей Меняйло.

 

— Уæлдай æхсызгон мын у абон ацы кадджын æмбырды архайын æмæ Уырыссаг театр коллективæн йæ бæрæгбоны фæдыл арфæ ракæнын. Йæ хъæздыг историйы 150 азы дæргъы театры бавзæрста æртæ алыхуызон дуджы: фæзынд Уæрæсейы империйы, йæ архайд адарддæр кодта Советон Цæдисы, ныр та кусы нырыккон Уæрæсейы. Ахæм вазыгджын историон къæпхæнты сæрты театр æнтыстджынæй кæй хызт, уый, фыццаджы-фыццагдæр, у, театралон аивадыл æнувыд чи уыд æмæ йæ цард аивадæн чи снывонд кодта, уыцы зындгонд адæймæгты сгуыхтдзинад, — йæ раныхасы фæбæрæг кодта республикæйы разамонæг.
Цæгат Ирыстоны Сæргълæууæг «вахтанговонтæн» бузныг загъта сæ æвидигæ курдиат æмæ удуæлдай куысты, стæй ирон драмон аивады скъолайы хуыздæр традицитыл иузæрдион кæй сты, уый тыххæй.
— Зынаргъ хæлæрттæ, куыд æппæт театрдзаутæ, афтæ уын æз дæр бузныг зæгъын уе сфæлдыстадон цæхæр æмæ фæзминаг фæллойы тыххæй! Мæ зæрдæ уын зæгъы ноджы стырдæр аивадон бæрзæндтæм схизын, — фæнысан кодта Сергей Меняйло.
Уый фæстæ республикæйы Сæргълæууæг театры коллективы минæвæртты схорзæхджын кодта республикæйы паддзахадон хæрзиуджытæй. Афтæ, театралон аивады рæзтмæ стыр бавæрæн æмæ бирæазон сыгъдæгзæрдæ куысты тыххæй кадджын ном «Республикæ Цæгат Ирыстон-Аланийы адæмон артист» лæвæрд æрцыд Чсиаты Роберт æмæ Цæллаты Аланæн, кадджын ном «Республикæ Цæгат Ирыстон-Аланийы сгуыхт артист» саккаг кодтой Элинæ Захарова æмæ Тогойты Аланæн. Цæгат Ирыстоны Кады грамотæйæ та схорзæхджын кодтой театры уæлæдарæсы цехы хицау Ларисæ Бузыревайы.
Уыцы изæр театры сфæлдыстадон коллективæн бæрæгбоны арфæтæ ракодтой УФ-йы Федерацийы Советы уæнг Мамсыраты Таймураз, УФ-йы Паддзахадон Думæйы Граждайнаг æхсæнады райрæзты, æхсæнадон æмæ дины иугæндты фарстаты фæдыл комитеты сæрдары хæдивæг Владимир Шаманов, РЦИ-Аланийы Парламенты Сæрдар Алексей Мачнев, ЮНЕСКО-йы хъуыддæгты фæдыл уæрæсейаг къамисы сæрдары хæдивæг Дзасохты Алыксандр, Дзæуджыхъæуы бынæттон хиуынаффæйады администрацийы сæргълæууæг Милдзыхты Вячеслав æмæ иннæ кадджын уазджытæ.
Артисттæ сæ юбилейон изæрмæ бацæттæ кодтой сæ цымыдисагдæр спектаклтæй скъуыддзæгтæй арæзт театрализацигонд равдыст.
Зындгонд куыд у, афтæмæй Фæллойадон Сырх Тырысайы орденхæссæг Уырыссаг академион театры равзæрды боныл нымад цæуы 1871 азы 15 апрел. Уæд театры фыццаг сезон байгом Михаил Лермонтовы драмæ «Маскарад»-мæ гæсгæ æвæрд спектаклæй. Дзæуджыхъæуккаг театр у Цæгат Кавказы культурæ æмæ аивады зæронддæр кусæндæттæй иу. Ирыстойнаг театримæ æнгом баст сты зындгонд режиссерты, актерты, драматургтæ æмæ нывгæнджыты нæмттæ. Аивады ацы артдзæсты се сфæлдыстадон фæндаг райдыдтой Хетæгкаты Къоста æмæ Евгений Вахтангов дæр. Зæгъын хъæуы, йæ 125 азы юбилейы агъоммæ, 1996 азы, театрæн Евгений Вахтанговы ном кæй радтой, уый дæр.

РЦИ-Аланийы
Сæргълæууæджы æмæ Хицауады
пресс-службæ

 

ОСТАВЬТЕ ОТВЕТ

Please enter your comment!
Please enter your name here