Республикæ Цæгат Ирыстон-Аланийы Сæргълæууæг Сергей МЕНЯЙЛО фембæлд блог-тур «Дæ Ирыстон»-ы Уæрæсейы алыхуызон регионтæй архайджытимæ. Цæгат Ирыстоны туристон хъомысæн цавæр аргъ кæнынц, зæгъгæ, ахæм фарстайы фæдыл республикæйы разамонæг ныхас кодта æрыгон блогертимæ, стæй сын сæ фарстытæн дзуаппытæ радта.
Сæ фембæлды райдайæны Сергей Меняйло æрыгон адæмæн арфæ ракодта сæ разæнгарддзинады, абоны цардмæ куыдфæндыйы цæстæй кæй нæ кæсынц, уый тыххæй.
— Алчидæр уæ æвдисы фидар граждайнаг цæстæнгас, æмæ йыл æргомæй дзурут, адæммæ йæ хæццæ кæнут. Ирыстоны цы рæсугъд бынæттæ ис, уыдон федтат уæхи цæстæй, базонгæ стут йæ бирæ æнусон истори æмæ культурæимæ, æмæ, уыцы æнкъарæнтæй разыйæ кæй баззадыстут, уый мæ уырны. Уæ блог-турæн уыд бæлвырд нысан: раргом кæнын Цæгат Ирыстоны туристон хъомыс, йæ гæнæнтæ æмæ семæ базонгæ кæнын нæ бæстæйы адæмы. Уæрæсейы мидæг туризм, æцæгæйдæр, у диссаджы дуне, æмæ йæ базонынæн кæрон нæй, — раныхас кодта Сергей Меняйло.
Уымæй уæлдай, республикæйы разамонæг радзырдта, æрæджы Цæгат Ирыстоны PRO-Кавказ, зæгъгæ, цы медиафорум уыд, уый тыххæй, æмæ загъта, иннæ хатт ма ахæм форум куы уа, уæд æм цæмæй, æнæмæнг, саккаг кæной.
— Царды алы фарстатыл дæр æхсæнадон хъуыды абон æнцой кæны, фылдæр, социалон хызæгтыл. Æмæ блогертæ æмæ традицион дзыллон информацион фæрæзтæ кæрæдзиуыл баст куы уой, уæд уый, мæнмæ гæсгæ, алы хъуыддагыл дæр хорзæрдæм фæбæрæг уыдзæн. Уыимæ, Цæгат Кавказ туристон æгъдауæй цымыдис, рæсугъд, зæрдæмæдзæугæ æмæ уазæгуарзон регион кæй у, уый адæм базондзысты. Базонгæ уыдзысты йæ алæмæты рæсугъд æрдзимæ, фæллойуарзаг адæмимæ æмæ сæ рæсугъд æгъдæуттæ æмæ традицитимæ, — бафиппайдта республикæйы Сæргълæууæг.
Блог-туры архайджытæ, сæ ныхасмæ гæсгæ, æнæбафиппайгæ нæ фесты, Цæгат Ирыстоны стыр кад кæй кæнынц канд хистæртæн нæ, фæлæ сылгоймæгтæн æмæ кæстæртæн дæр, æмæ зæрдæ бавæрдтой, сæ бафысджытæн се ‘ргом Цæгат Ирыстонмæ кæй здахдзысты, уымæй.
Ныхас ма цыд туристон инфраструктурæйы объекттæ республикæйы аразыныл æмæ æндæр фарстатыл.
Фембæлды кæрон блог-туры архайджытæн Сергей Меняйло радта Арфæйы гæххæттытæ æмæ сын бузныг загъта, Цæгат Ирыстоны æрдзон, историон æмæ культурон цыртдзæвæнты тыххæй хъусынгæнинæгтæ адæммæ кæй хæццæ кæнынц æмæ туризмы рапарахатыл зæрдиагæй кæй архайынц, уый тыххæй.
Блог-тур «Дæ Ирыстон» нæ республикæйы йæ куыст кодта 11-17 июлы. Йæ нысан — мидбæстон туризм парахат кæнын æмæ социалон хызæгты фæрцы Цæгат Кавказы æрдзон, культурон æмæ историон цыртдзæвæнты тыххæй хабæрттæ адæммæ хæццæ кæнын. Нæ рæспубликæйы æдæппæт уазæгуаты уыд 24 блогеры Уæрæсейы алы регионтæй — Волгоградæй, Мæскуыйæ, Краснодарæй, Стъараполæй, Дагестанæй, Омскæй, Рязанæй, Астраханæй, Удмуртийæ, Калугæйæ, Ивановойы æмæ Кемеровойы облæсттæй, Ямало-Ненецты автономон зылдæй, Республикæ Хъырым æмæ Севастополæй. Уыдонæн сæ бафысджыты иумæйаг нымæц у фондз милуан адæймаджы. Къуырийы дæргъы социалон хызæгты блогертæ æвдыстой Цæгат Кавказыл сæ балцы хабæрттæ æмæ сæ бафысджыты зонгæ кодтой Ирыстоны алæмæты рæсугъддзинадимæ, йæ историимæ, йе ‘гъдæуттимæ, йæ культурæ æмæ туристон маршруттимæ.
Ирыстоны уазджыты балцы аластой Хъобанмæ, Хъæрмæдоны æмæ Куырттаты кæмттæм. Уыдон бабæрæг кодтой РЦИ-Аланийы Национ музей, Тугъанты Махарбеджы номыл Аивæдты музей æмæ Нырыккон сфæлдыстады центр, базонгæ сты паддзахадон академион ансамбл «Алан»-имæ, стæй сын сарæзтой ирон чъиритæ кæнынæй мастер-къластæ.
Проект саразæг у раздзогты æхсæнадон иугонды уæнг Алинæ Гостева, æххуысгæнæг та йын уыд Фæсивæды хъуыддæгты фæдыл федералон агентад æмæ РЦИ-Аланийы Туризмы комитет.
РЦИ-Аланийы
Сæргълæууæджы
Æмæ Хицауады пресс-службæ
