Цардæн йæ фидыц сабитæ сты, уыдоны къухы ис фидæн. Скъолайы ахуырæй уæгъд рæстæг сæ удварны рæзтыл афоныл бацархайынц нæ республикæйы Хицауад, министрадты, ведомствæты разамонджытæ æмæ сабиты ныййарджытæ.
Цымийы поселочы рæсугъд æрдзы хъæбысы æрбынат кодта сæрдыгон фæлладуадзæн лагер «Стъалы». Ам æрвылаз дæр сæ фæллад сæрды мæйты фæуадзынц, авдæй цыппæрдæс азы онг кæуыл цæуы, уыцы скъоладзаутæ. Алы рады дæр вæййы 35 лæппу æмæ чызджы. Семæ кусынц фæлтæрдджын ахуыргæнджытæ æмæ хъомылгæнджытæ. Кæстæрты æргом здахынц Райгуырæн бæстæ уарзынмæ, æдас æмæ æнæниз цардыуагмæ, фыдæлты культурæ, æгъдæуттæ æмæ ирон æвзаг хуыздæр æмæ арфдæр базонынмæ.
Лагеры разамонæг Гулчеты Ритæ нын куыд радзырдта, афтæмæй сæм алы радæн дæр цы нысан вæййы, уымæ гæсгæ сын сæ хъомылгæнинæгтæн лекцитæ бакæсынц зынгхуыссынгæнæн службæйы, фæндæгтыл æдасæй цæуыны автоинспекцийы кусджытæ, нæ республикæйы медицинон профилактикæйы центры специалисттæ. Æфсæддон-патриотон лагер «Балц» æмæ бæстæзонæн лагер «Хохаг»-ы инструктортæ. Вæййы сын фембæлдтытæ нæ республикæйы зындгонд поэттæ æмæ фысджытимæ, аивады архайджытимæ, Æппæтдунеон æхсæнадон змæлд «Иры Стыр Ныхас»-ы минæвæрттимæ. Уыдон фæсивæдимæ фæныхас кæнынц ирон æвзаг æмæ литературæйы ахадындзинадыл. Фыдæлты æгъдæуттæ абоны царды сæ удыхъæдыл куыд хорз зынынц, уый тыххæй.
Ирон хъæзтыты федерацийы разамонæг Цогойты Тамерлан æмæ Фæсивæды патриотон хъомылады центры хайады сæргълæуджытæ Тъехты Эльбрус, Касаты Аслæнбег æмæ Гулиты Вадим сывæллæттæн равдыстой, нæртон хъæзтыты руаджы хъару æмæ арæхстдзинад цы хуызы бафæлварæн ис, уый. Афтæ ма базыдтой кусарт кæнын æмæ бæгæны фыцын. Изæрыгæтты та сын гом арвы бын равдыстой ирон мультипликацион æмæ аивадон кинонывтæ, сарæзтой ирон хъазт.
Лагеры хъомылгæнинæгтæй сæ алкæмæн дæр йе ‘нæниздзинады хицæндзинæдтæ нымайгæйæ, хæринаггæнджытæ, шеф-пъовыр Булацаты Зæлинæйы лæмбынæг цæстдардæй, фондз хатты цæттæ кæнынц хæрзад хæринаг. Сæ фынгыл иудадзыгдæр вæййы дыргътæ æмæ халсартæ. Хъомылгæнинæгты æнæниздзинадмæ йæ цæст дары дохтыр Иринæ Шевченко. Сыгъдæгдзинады домæнтæн дзуапп дæттынц сæ фæлладуадзæн æмæ хъазæн уæттæ.
Цæмæй кæстæртæн ирон æвзаг æмæ культурæимæ ам иудадзыгдæр зонгæ кæныны фадат уа, ууыл лагеры зæрдиагæй архайы этнолагер «Фыдæлты уæзæгмæ»-йы разамонæг Кузаты Светланæ. Уый хъомылгæнинæгты, канд иронау дзурыныл нæ ахуыр кæны, фæлæ ма семæ арæх бабæрæг кæны нæ республикæйы музейтæ æмæ зæрдылдарæн бынæттæ.
Лагеры кæрт аив у дидинджытæй. Ис херытæ, хæрдмæ ивазæнтæ, бассейн, шахмæттæй, шашкæтæй æмæ теннисæй хъазæн стъолтæ, футболæй æмæ волейболæй хъазæн фæзтæ.
Лагеры сæрдыгон рад йæ кæронмæ кæй æрхæццæ, сывæллæттæ дзы хъæлдзæгæй сæ рæстæг кæй арвыстой, уый бæрæг уыд, ивгъуыд хуыцаубоны дзы цы концерт арæзт æрцыд, уымæй. Уыдон дзы сæ арæхстдзинад равдыстой ирон кафт, зард æмæ æмдзæвгæтæ аив кæсынæй, стæй сценикон равдыстыты архайынæй. Уазæгуаты сæм æрбацыдысты æмæ сын зæрдиаг арфæтæ æмæ зæрдылдарæн лæвæрттæ ракодтой Æппæтдунеон æхсæнадон змæлд «Иры Стыр Ныхас»-ы сæрдары хæстæ æххæстгæнæг Еналдыты Хъазыбег, Дзæуджыхъæуы Ветеранты советы сæрдар, æхсæнадон архайæг Лалыты Лев æмæ лагеры хъомылгæнинæгты ныййарджытæ. Цæмæй бæрæгбон æмбæлгæ уагыл арæзт æрцæуа, ууыл зæрдиагæй бацархайдтой методист Хæуытаты Зитæ, хъомылгæнджытæ Оксанæ Кузнецова æмæ Псхацъæты Миланæ.
Лагеры сæрдыгон радæн æхца радих кодтой нæ республикæйы Фæллой æмæ социалон рæзты æмæ Нациты ‘хсæн ахастдзинæдты министрадтæ.
Гасанты Валери
Къамтæ систа Хъайырты Дианæ
