6 сентябры цæгатирыстойнаг скъолаты ацыд национ проект «Ахуырад»-мæ хауæг федералон проект «Нырыккон скъола»-мæ гæсгæ хъæутæ æмæ чысыл горæтты ахуыргæнæндæтты æрдзон-наукон æмæ технологон къабæзты ахуырады центртæ «Рæзты тæлм» гом кæныны кадæн арæзт марафон.
Ацы аз нæ республикæйы байгом кæнынмæ хъавынц ахуырады 22 центры: фæйнæ æртæ — Алагиры, Æрыдоны, Æрæфы æмæ Рахизфарсы районты, фæйнæ дыууæ — Горæтгæрон æмæ Дыгуры районты, æхсæз та — Мæздæджы районы. Æрæджы «Рæзты тæлм»-ы 16 центры сæ дуæрттæ байгом кодтой скъоладзаутæн.
Ахуырады министры хæдивæг Мæхъиты Людмилæ архайдта Горæтгæрон районы Джызæлы 1-æм скъолайы ахуырады центр гом кæныны кадæн арæзт æмбырды. Центр кæй байгом, уый фæдыл скъоладзаутæ æмæ педагогтæн арфæ кæнгæйæ, хицауиуæггæнæг сылгоймаг загъта:
— Центр «Рæзты тæлм» хъæуккаг скъолайы æнæмæнг саразинаг уыд. Ацы проект æххæстгæнæг ахуыргæнæндæттæ ифтонггонд цæмæй сты, уыцы нырыккон кусæнгæрзты фæрцы ног зонындзинæдтæ райсынæн спайда кæнæн ис урокты рæстæг æмæ урокты фæстæ ахуыры рæстæг. Уæ гæнæнтæ ацы фадæтты руаджы кæй раргом кæндзыстут, стæй ахуырадон лабораториты куыст биноныг кæй рахатдзыстут, уыдæттæй мæ ныфс ис, зондамонджытæ та уын ацы хъуыддаджы баххуыс кæндзысты.
Хистæркъласонтæ уазджытæн, экскурси сын саразгæйæ, нырыккон ифтонггæрзты пайдайы тыххæй хабæрттæ радзырдтой. Ахуырады центртæ химийæ, физикæ, биологи, экологи, физиологи æмæ нейротехнологийæ нымæцон лабораторитæй, бирæкъабазджын робототехникон системæтæ æмæ манипуляцион роботтæ рахатынæн ахуырадон кусæнгæрзтæй, модулон ивæн уæлæфтуантимæ ахуырадон роботтæ-манипулятортæй, стæй ноутбуктæй ифтонггонд сты.
Адæм ахуырады æмæ хъомылады ног мадзæлттæй цæмæй пайда кæной, стæй ахуырдзаутæ æрдзон-наукон æмæ технологон къабæзты бындурон æмæ уæлæмхасæн иумæйагахуырадон программæтæ рахатой, центртæ «Рæзты тæлм» уымæн аразынц.
2019 азæй нырмæ Цæгат Ирыстоны чысыл горæттæ æмæ хъæуты ахуыргæнæндæтты сарæзтæуыд ахуырады 103 центры «Рæзты тæлм»-ы. Иннæ аз байгом уыдзæн ноджыдæр ма 22 центры, 2024 азы та — 16 центры æмæ афтæмæй скъолаты бындурыл арæзт амынд центрты нымæц схæццæ уыдзæн сæдæ цыппор иумæ.
РЦИ-Аланийы
Ахуырад
æмæ наукæйы
министрады
пресс-службæ
