РЦИ-Аланийы Сæргълæууæг Сергей Меняйло бабæрæг кодта Аланийыл Саргъуыды 1100 азы кадæн конд равдыст «Аргъуанмæ фæндаг». Равдыст байгом Цæгат Ирыстоны Национ музейы. Архайдта ма дзы Дзæуджыхъæуккаг æмæ Алайнаг епископ Герасим.
Сергей Меняйло куыд фæбæрæг кодта, афтæмæй ирон адæм чырыстон дин кæй райстой, уый у историон цау, хъуамæ нæ культурон бынтæ хъахъхъæнæм.
«Уæрæсейы Президент загъта ахсджиаг хъуыды: хъуамæ нæ уидæгтæм раздæхæм. Нæ истори, не ‘гъдæуттæ, нæ традицитæ куы ивæм, уæд нæхи истори дæр фесæфдзæн. Уæрæсе у бирæнацион бæстæ, алы адæмыхатт дæр бæрæг дарынц йæ хæдхуыздзинадæй. Ацы равдыст хъуамæ фæстаг ма суа, 24-25 сентябры фæстæ дæр сæ хъуамæ кæнæм. Республикæйы дæр æмæ бæстæйы дæр. Адæмæн хъуамæ радзурæм нæ историйы, рæсугъд культурæйы, хъæздыг удварны хæзнаты тыххæй», — фæбæрæг кодта Сергей Меняйло.
Равдыст куы байгом, уæд æрбацæуæг адæм æрзылдысты залыл, федтой равдысты нывтæ. Равæрдтой дзы 200 куысты бæрц. Экспозици бар дæтты, Алани чырыстон динмæ цы дæргъвæтин фæндагыл фæцыд, уый раиртасынæн.
Аланийыл Саргъуыды бæрæгбон конд цæудзæн 24-25 сентябры. Цæгат Ирыстоны цæрджытæм æнхъæлмæ кæсынц культурон-спортивон хъуыддæгтæ, фестивалтæ, равдыстытæ, æрмдæсныты мастер-класстæ.
РЦИ-Аланийы
Сæргълæууæджы æмæ Хицауады
пресс-службæ
