Сабаты Цæгат Ирыстоны сæйраг горæт нысан кодта бындур ын сæвæрыны 238-æм аз.
Хъесайы-фырты уынджы Терчы былгæрон бæрæгбонмæ æрбацыд Дзæуджыхъæуы бынæттон хиуынаффæйады администрацийы сæргълæууæг Милдзыхты Вячеслав. Милдзыхы-фыртимæ ардæм æрбацыдысты уазджытæ Грознайæ, Черкесскæй, Ялтæйæ, Ростовæй, Пятигорск æмæ Стъараполæй, хъусын кæны горæты администрацийы пресс-службæ.
Горæты Боны программæ байгом кодтой æфсæддон оркестры архайджытæ. Дзæуджыхъæуы адæмты традицитæ æмæ культурæимæ базонгæ уæвæн уыд национ æхсæнадты цатырты. Уыдоны фарсмæ æрбынат кодта ирон чъириты фестивал. Кæй фæндыд, уымæн йæ бон уыд саходын лæвар.
Фенæн ма дзы уыд адæмон æрмдæсныты къухæй конд дзаумæттæ. Зæгъын хъæуы уый, æмæ Дзæуджыхъæуы администрацийы уынаффæмæ гæсгæ Горæты боны программæмæ бæрæгбоны салют нал бахастой.
АНВАРАТЫ Валери
Къамтæ систа ХЪАЙЫРТЫ Дианæ
