Цæгат Ирыстоны Сæргълæууæг Сергей Меняйло Национ музейы Аланыстоны саргъуыды 1100 азы кадæн байгом кодта равдыст «Дзуаримæ фембæлд».
Фестивал «Аланикæ» у Цæгат Кавказы нырыккон аивады æрвылазон бæрæгбон. Байгом фынддæсæм хатт, ацы аз — аивады кусæг æмæ проекты бындурæвæрæг Виталий Пацюковы хъæппæрисæй. Йæ хъуыдымæ гæсгæ, аивад хъуамæ æвдиса царды æппæты сæйрагдæр цаутæ, дзура рухс тауыныл, адæймаджы хуыздæр миниуджытыл.
— Ацы темæ алы адæймаг дæр æмбары йæхи миддунемæ гæсгæ, фæлæ сæйраг уый у, æмæ у «Дзуаримæ фембæлд». Рухстауæн куыстæн цыдæриддæр арæзт цæуы, уымæ хъæуы хицæн цæстдард. Фæнды мæ бузныг зæгъын, ацы равдыстмæ йе ‘вæрæн чидæриддæр бахаста, уыдонæн. Бузныг нæ уазджытæн дæр. Чи зоны, æмæ ацы равдысты фæрцы нæ миддуне фæуæрæхдæр уа, — загъта республикæйы Сæргълæууæг Сергей Меняйло.
Равдыст арæзт æрцыд дыууæ залы — Национ музейы æмæ Александр Пушкины номыл аивадон музейы цæгаткавказаг филиалы. Уым иумæйагæй æвдыст цæуынц, равдысты архайджыты аивад, культурæ, истори ныры рæстæгимæ куыд æмдзу кæнынц, уый.
— Адæймагæн æнæ дины уырнынадæй йæ бон цæрын нæу. “Дзуаримæ фембæлд” æвæрд у, дунейы цыдæриддæр динтæ ис, уыдоны бындуры. Уый фæрцы æхсæнады рæзы æмæ фидар кæны æгъдау. Алы адæмы культурæ дæр у алыхуызон, æмæ иртæст цæуы традицион мадзæлтты фæрцы. Уыдон, рæстæг куыд цæуы, афтæ ивынц, цы æхсæнадæн нæй Дзуар, уый слæууы сæфты фæндагыл. Традицион культурæтыл æнцойгæнгæйæ, мах хъуамæ ма фесафæм нæ фыдæлты æгъдау, саразæм æхсæнады мидæг фидар удварны бындур, уый у проекты сæйраг хъуыды.
Равдыстæй уæлдай, фестивалы арæнты арæзт æрцæудзæн музыкалон программæ, уым æрмæст Ирыстоны музыкалон къордтæ нæ архайдзысты, фæлæ ма Уæрæсейы номдзыд коллективтæ дæр.
Гобозты Агуындæ
