Дзæуджыхъæуы уыд РЦИ-Аланийы Инвестициты фарстаты фæдыл советы радон æмбырд. Республикæйы Хицауады Сæрдар Дзанайты Барис разамынд цы æмбырдæн лæвæрдта, уый архайджытæ æркастысты цалдæр цымыдисаг инвестицион проектмæ.
Афтæ, советы уæнгты размæ æнæххæст бæрнондзинады æхсæнад «Æрхонкæйы станицæ»-йы минæвар Хæмыцаты Арсен рахаста егъау агропромышленнон комплекс саразыны фæдыл инвестицион проект. Куыд нысангонд цæуы, афтæмæй фидæны комплексы æрбынæттон уыдзысты куырой, хъæууонхæдзарадон продукцийæ консервгæнæн цех, скълæдтæ, æндæр куыстадон бæстыхæйттæ… Хæмыцы-фырт куыд фæбæрæг кодта, афтæмæй амынд проектыл инвестор ныридæгæн схардз кодта 300 милуан сомы. Уымæй уæлдай, проектыл куыст адарддæр кæнынæн бахъæудзæн банчы æфстæуттæ райсын дæр. Компанийы минæвары ныхасмæ гæсгæ, йæ архайды фыццаг къæпхæныл ног комплексы уыдзæн 150 кусæн бынаты бæрц.
Дарддæр советы уæнгтæ æрдзырдтой агротуристон-дзæбæхгæнæн комплексы арæзтадыл. Ацы проект та бавдыста æнæххæст бæрнондзинады æхсæнад «Шале». Проекты уагæвæрдимæ æмбырды архайджыты базонгæ кодта республикæйы экономикон рæзты министр Кучиты Зауыр. Йæ ныхасмæ гæсгæ, фидæны фæлладуадзæн комплексы кусдзысты бирæуæладзыгон фысымуæттæ æмæ хицæн коттеджтæ, банкетон зал, дзæбæхгæнæн дæлхайад. Дзæуджыхъæуы бынæттон хиуынаффæйады администрацийы сæргълæууæджы хæдивæг Дзоблаты Зураб куыд фехъусын кодта, афтæмæй, горæты разамынды уынаффæйæ, ныридæгæн бæлвырдгонд æрцыд, фидæны комплекс кæм сараздзысты, уыцы бынат.
Дарддæр советы уæнгты раз раныхас кодта æнæххæст бæрнондзинады æхсæнад «Агримакс.Аэро»-йы минæвар Иринæ Чижова. Ацы компани бацæттæ кодта, хъæууонхæдзарадон куыстады къабазы фæстаг рæстæг уæрæх пайда кæнын кæмæй райдыдтой, ахæм роботизацигонд комплексты рауагъды проект. Афтæ, компани фæнд кæны Ирыстоны роботизацигонд донхорыггæнæн системæты рауагъд рапарахат кæнын. Иринæ Чижовайы ныхасмæ гæсгæ, ахæм куыстадон цехтæ саразынæн хъæуы 1 мин квадратон метры бæрц зæххы хай. Уымæй уæлдай, компани куры, цæмæй йын радих кæной, сæ техникæйæн фæлварæнтæ кæм аразой, хъæууонхæдзарадон культуртæ садзынæн зæххы хай дæр.
Компани «Норд-Зюйд»-ы минæвар Михаил Брячак та радзырдта Ирыстоны егъау логистикон центр саразыны проектыл.
Советы уæнгтæ бирæ фарстытæ радтой проектты автортæм, фæндæттæ бахастой инвестицион архайд хъомысджындæр кæныны фæдыл.
Ныхасæн хатдзæгтæ кæнгæйæ, Дзанайты Барис профилон ведомствæты разамонджытæн бахæс кодта, цæмæй амынд инвестицион проекттæ царды рауадзыны фæдыл сæххæст кæной æппæт æмбæлгæ организацион мадзæлттæ дæр.
— Нæ сæйрагдæр хæсыл нымайын, цæмæй, республикæмæ йе ‘ргом чи раздæхта, уыцы инвесторты архайдæн уа æппæт хъæугæ фадæттæ дæр. Кæй зæгъын æй хъæуы, ацы цымыдисаг проекттæ ахъаз кæндзысты уæлæмхасæн кусæн бынæттæ гом кæнынæн, бюджетмæ хъалонты фиддонты рæзтæн. Амынд æууæлтæ уæлдай ахсджиаг сты Цæгат Ирыстоны дарддæры социалон-экономикон райрæзтæн, — кæронбæттæны бафиппайдта Дзанайы-фырт.
Уый тыххæй фехъусын кодта РЦИ-Аланийы Сæргълæууæджы æмæ Хицауады пресс-службæ.
Нæ уацхæссæг
