Æххуыс —æфсæддонты бинонтæн

0
137

Нæ республикæйы æрсидты хыгъдмæ чи бахауд, уыцы граждæнты бинонтæн фыст цæудзæн иурæстæгон материалон æххуыс — 30 мин сомы бæрц. Уый тыххæй аппаратон æмбырды фехъусын кодта РЦИ-Аланийы Сæргълæууæг Сергей Меняйло. Æхцайы фæрæзтæ радих кæндзысты республикæйы бюджетæй.

РЦИ-Аланийы фæллой æмæ социалон рæзты министр Айдарты Алинæ куыд радзырдта, афтæмæй æмбырдгонд æрцыд 640 куырдиаты æрсидтмæ бахауæг граждæнты бинонтæй. Æххуыс бакæныны фæдыл бацæттæ кодтой реестр æмæ æппæт гæххæттытæ дæр.
— Æвæстиатæй хъæуы райдайын æхцайы фæрæзтæ фидын æрсидты хыгъды уæвæг граждæнты бинонтæн. Бахæс кæндзынæн районты сæргълæуджытæн ацы фарстамæ биноныг цæстдарды мадзал бацæттæ кæнын. Фæллой æмæ социалон рæзты министрадæн та цыбыр æмгъуыдмæ уыцы æхцайы фæрæзтæ сæмбæлын кæнын æфсæддонты бинонтыл, — загъта Сергей Меняйло.
Уымæй уæлдай, нæ республикæйы Сæргълæууæг фæнысан кодта, æхцайы фæрæзтæй хъауджыдæр ма сын социалон æххуысты æндæр мадзæлттæ дæр цæмæй уа, уый тыххæй. Ныхас цæуы, сывæллæттæн ахуырадон кусæндæтты бынæттæ скæныныл.
Æрсидты граждæнтæ æмæ сæ бинонтæн консультативон информацион æххуыстæ бакæныны фæдыл, колл-центры куысты тыххæй та радзырдта РЦИ-Аланийы Сæргълæууæджы æмæ Хицауады Администрацийы разамонæг Гобеты Ибрагим. Куыд загъта, афтæмæй абоны онг бæлвырдгонд æрцыд 2,5 мин куырдиаты. Сæвзæрæг фарстатæ æххæст кæныны тыххæй ацы куыстмæ æрбаздæхтой юристты, психологты, бархионты æмæ æфсæддон комиссарадты минæвæртты. Сергей Меняйло æмбырды архайджытæн бацамыдта, ацы фарстамæ кæй хъæуы прокуратурæйы архайд дæр бафтауын, уый.
РЦИ-Аланийы Сæргълæууæг фехъусын кодта, социалон хæслæвæрдтæ æххæст кæнынæн республикæ федералон бюджетæй кæй райста æхцайы фæрæзтæ. Уæлæмхасæнæн 336 милуан сомы 3-7 азы онг сывæллæттæн, 86,6 милуан сомы æртыккаг æмæ дарддæр иннæ сывæллæтты райгуырды æрвылмæйон пособитæн, уымæй уæлдай, дихгонд æрцыд 67,5 милуан сомы кæлæддзаг хæдзæрттæй ног цæрæнуæттæм раивыны паддзахадон программæ æххæст кæныны нысантæн. Республикон профилон ведомствæтæ — Фæллой æмæ социалон рæзты, Финансты, Артаг, энергетикæ æмæ цæрæнуатон-коммуналон хæдзарады министрадтæн хæсгонд æрцыд æппæт амынд æххуысы мадзæлттæ дæр бæлвырд æмгъуыдмæ сæххæст кæнын.

РЦИ-Аланийы
Сæргълæууæджы æмæ Хицауады
пресс-службæ

 

ОСТАВЬТЕ ОТВЕТ

Please enter your comment!
Please enter your name here