Бæрзæндтæм тырнынæн — æппæт уавæртæ

0
55

Национ проект «Ахуырад»-ы нысантæй иу у курдиатджын сывæллæттимæ кусын. Уымæ гæсгæ, иумæйаг хъарутæй, Дзæуджыхъæуы знон кадджын уавæры байгом паддзахадон бюджетон ахуырадон куыстуат «Вершина». Сывæллæтты æмæ фæсивæды курдиæттæ æмæ арæхстдзинад раргом кæныны, сæ райрæзтæн баххуыс кæныны республикон центр гом æрцыд федералон бюджеты æххуысæй, проект «Алы сывæллоны æнтыстдзинад»-мæ гæсгæ.

Кадджын мадзалмæ хуынд æрцыдис бирæ уазджытæ, нæ республикæйы районты минæвæрттæ, уазджытæ сыхаг республикæтæй.
Нырыккон ахуырадон центры ахуырдзаутæн æмæ ахуыргæнджытæн арфæтæ ракæнынмæ æрбацыд РЦИ-Аланийы Сæргълæууæг Сергей Меняйло.
Уазджытæн скодтой цымыдисаг балц бæстыхайы уæладзгуытыл. Алы кабинеты дæр цæуынц ахуыртæ. Математикæ æмæ информатикæ, робототехникæ æмæ радиотехникæ, нывкæнынад, физикæ æмæ музыкæ. Бирæ алыхуызон гæнæнтæ дзы ис сабитæн.
Уалыты Лерæ ахуыр кæны 30-æм скъолайы 9-æм къласы. — Куы базыдтон нæ горæты ахæм центр байгом, уæд æрбацыдтæн. Уарзын æлыгимæ архайын, ам нæ ахуыр кæнынц дурынгæнæджы дæсныйадыл, — загъта чызг.
Гæбæраты Давид та йæхи фæлвары биологи æмæ химийы. — Мæ фидæны дæсныйад программист уыдзæн, уый раджы сфæнд кодтон, фæлæ ныр афтæ тынг цæуынц мæ зæрдæмæ ацы центры ахуыртæ æмæ дызæрдыг кæнын райдыдтон, чи зоны, суон химик, —зæгъы Давид.
Æвдæм къласы ахуырдзау Кокайты Давид та спортмæ здæхт у. Алцæмæй ифтонг залы фæлтæрдджын тренертимæ архайынц баскетболæй, волейболæй, теннисæй.
Уазджытæ æвдисæн уыдысты, республикæйы Сæргълæууæг лæппутæй иуимæ теннисæй дæсны куыд ахъазыд, уымæн. Зæрдылдарынæн сæ хуыз иумæ систой.
Центры бæстыхайæн йæ æддаг бакаст куыд аив у, афтæ райдзаст у йæ алы къуым дæр. Кълæсты интерактивон фæйнæджытæ, нырыккон лабораториты алыхуызон фæлварæнтæ кæнынц, музыкæйы къласы ис æппæт хъæугæ инструменттæ.
Центры директоры хæдивæг Кокойты Алинæйы ныхасмæ гæсгæ «Вершина» лæггад кæндзæн районты сывæллæттæн дæр. Уыдонæн кусдзысты цыбыр æмгъуыдмæ сæрмагонд программæтæ. Ныртæккæ цалцæггæнæн куыстытæ цæуынц æмдзæрæны.
Республикæйы Сæргълæууæг æмæ центры ахуырдзаутæн фадат уыд аныхас кæнынæн. Уый тыххæй сæм ис, цæлхæмбырдтæ кæм цæудзæн, ахæм бæстыхай.
Фæстæдæр Сергей Меняйло æмæ мæскуыйаг уазæг, Уæрæсейы Ахуырады министрады паддзахадон политикæйы департаменты директор Наталья Наумова дзуаппытæ радтой журналистты фарстытæн.
— Цы федтон, цы фехъуыстон, уымæй разыйæ баззадтæн. Ахæм ахуырадон центр фадат дæтты нæ кæстæрты алывæрсыг райрæзтæн. Бирæ курдиатджын чызджытæ æмæ лæппутæ нæм ис, фæлтæрдджын ахуыргæнджытæ сын цæстуарзонæй сæ зонындзинæдтæ дæттынц. Уадз æмæ нæм уа хорз дохтыртæ, инженертæ, спортсментæ æмæ музыканттæ. Ацы центры та сын фадат ис ахæм хорз уавæрты хи бафæлварынæн, — загъта Сергей Меняйло æмæ бафтыдта, республикæйæн алывæрсыг æххуыс кæй бакодта Уæрæсейы Ахуырады министрад æмæ сын бузныг загъта.
Наталья Наумовайы ныхасмæ гæсгæ, Дзæуджыхъæуы центр «Вершина» Уæрæсейы ныр у 61-æм.
Бæрзæндтæм тырнын хорз у, уымæй хуыздæр та у бæрзæндмæ ныфсджын къахдзæфтæй цæуын.

Цæгæраты Жаннæ

Къамтæ систа
Хъайырты Дианæ

ОСТАВЬТЕ ОТВЕТ

Please enter your comment!
Please enter your name here