РЦИ-Аланийы Сæргълæууæг Сергей Меняйло фембæлд Уæрæсейы Æдасдзинады Федералон Службæйы Арæнхъахъхъæнæн службæйы разамонæджы хæдивæг инæлар-лейтенант Владимир Стрельцовимæ.
Фембæлды фæлгæты Цæгат Ирыстоны Арæнхъахъхъæнæн управленийы ног хицау инæлар-майор Сергей Балакинимæ республикæйы разамонджыты базонгæ кодтой. Архайдта ма дзы Цæгат Ирыстоны Арæнхъахъхъæнæн управленийы раздæры разамонæг Александр Байков, уый дзы фæкуыста 2019 азæй фæстæмæ.
Сергей Меняйло Александр Байковæн бузныг загъта, республикæйы размæ цы æдасдзинады фарстатæ ‘взæрд, уыдоныл бæстон кæй архайдта, уый тыххæй. Схорзæхджын æй кодта зæрдылдарæн лæварæй. Ног разамонæгæн æнтыстдзинæдты тыххæй раарфæ кодта, «…республикæйы Хицауад æмæ Арæнхъахъхъæнæн управленийы ‘хсæн фидар æмгуыстдзинад кæй уыдзæн, уый дызæрдыггаг нæу», — загъта республикæйы Сæргълæууæг.
«Нæхи ‘рдыгæй мах цæттæ стæм республикæйы æмæ Уæрæсейы фарнæн кусынмæ. Арæнхъахъхъæнæн управленийы раздæры разамынд цы нысантыл куыстой, арæнты æдасдзинады домæнтæм куыд къæрцхъус уыдысты, уыдон дарддæр дæр æххæстгонд кæй цæудзысты, уый мæ уырны. Кусдзыстæм бæстон æмæ лæмбынæг», — ахæм уыд Сергей Меняйлойы хатдзæг.
Сергей Балакин Цæгат Ирыстонмæ æрбацæуыны размæ уыд Сомихы республикæйы Æдасдзинады Федералон Службæйы Арæнхъахъхъæнæн управленийы хицауы фыццаг хæдивæг.
РЦИ-Аланийы
Сæргълæууæджы æмæ Хицауады пресс-службæ
