Нæ бæстæйæ чи алыгъд…

0
42

Бæстæйæ алидзæг граждæнтæй Уæрæсейыл цъыфкалæнтæ чи кæны сæ раныхæсты, уыдонæн скæнын хъæуы юридикон аргъ. Уый тыххæй фехъусын кодта Цæгат Ирыстоны Æхсæнадон палатæйы сæрдар Нинæ Чиплакова.

«Абон мах цæрæм ног æцæгдзинады уавæрты. Æхсæнад куыд фæдихтæ, уый зыны бæлвырдæй. Ацы уæззау историон рæстæг Уæрæсейы фылдæр хай æрлæууыд йæ Фыдыбæстæ бахъахъхъæныны фарс. Кад æмæ намыс уыдонæн, сты арфæйы аккаг. Чидæртæ та сфæнд кодтой сæ бæстæ ныууадзын æмæ алыгъдысты хуыздæр цардагурæг. Æмæ цасфæнды куы дзурæм уыцы адæмы сæрибартæ æмæ барты тыххæй, уæддæр Фыдыбæстæ æфсæддон архайды рæстæг ныууадзын нæу моралон æмæ хæрзуагмæ гæсгæ сæрмæхæссинаг. Фæлæ сæ цæсгом равдыстой. Иугæр тæппуд æмæ уæйгæнæгау фæлыгъдтæ æмæ ма ноджы дæ Райгуырæн бæстæйæн знаг паддзахæдты идеологон архайды фарс фæдæ, уæд уый хуымæтæджы политикон æнæразыдзинад нæу. Уый у гадзрахатдзинад.
Иугæр де ‘мбæстæгты ныхмæ æргомæй знаджы фæндаг равзæрстай, уæд ахъуытты у уыцы æмбаладæй. Агур амонд æндæр рæтты. Нæ республикæ цæхгæр у, йæ бæстæ чи ныууагъта æмæ ‘ргомæй Уæрæсейы ныхмæ фæндагыл чи ‘рлæууыд, уыдоны ныхмæ. Мæнмæ гæсгæ, кæй зондахаст нæма сфидар, уыдоны змæнтын æмæ халыны архайджыты ныхмæ саразын хъæуы ахадгæ мадзæлттæ.
Уый гæнæн ис се знаггад архайды тыххæй сæ Уæрæсейы граждайнадæй фæиппæрд кæнынæй. Дæ бæстæ дын æгад куы кæной, уæд зын бауромæн сты æнкъарæнтæ, фæлæ алы бæлвырд цау дæр хъæуы бæстон æвзарын. Алы цауæн дæр кæнын хъæуы юридикон аргъ, алы хицæн адæймаг — нæ бæстæйы алы гражданины архайдмæ дæр æркæсын хъæуы барадон цæстæнгасæй. Кæд адæймаг йæ бæстæ ныууагъта знаггад ын ракæныны тыххæй æмæ уыцы хъуыддагыл хæст у, уæд саразын хъæуы мадзæлттæ закъонмæ гæсгæ.
Зæгъæм, ис статустæ «инагент», «нежелательное лицо» радтыны фæрæзтæ. Абоны æхсæнадон арæзты сæйраг уавæртæ хъуамæ уой закъон æмæ æнæсайдæй цæрын.
Æхсæнадæн фидар уæвæн ис закъоны бындурыл», — загъта Нинæ Чиплакова.
Уæ зæрдыл уын æрлæууын кæндзыстæм, амæйразмæ актер Артур Смеляковы фидиуæн Уæрæсейы ныхмæ цы уæрæх мæстджын ныхас расайдта, уый.
Цалдæр депутаты дзыллон информацийы фæрæзтæ æмæ социалон хызты раныхас кодтой, йæ бæстæйыл цъыфкалæн чи кæна Уæрæсейы Федерацийы граждæнтæй, уыдоны ныхмæ хъæугæ мадзæлттæ саразыны тыххæй.

Касаты Батрадз

 

ОСТАВЬТЕ ОТВЕТ

Please enter your comment!
Please enter your name here