РЦИ-Аланийы Сæргълæууæг Сергей Меняйло архайдта кадджын мадзал байгом кæныны Уæрæсейы чемпионаты фехтованийæ. Уый банымайæн ис фехтованийы къæлиндары сæйрагдæр цауыл, уымæн æмæ æппæт бæстæйæ сæмбырд кæны тыхджындæр спортсменты. Дзæуджыхъæуы чемпионаты архайдзысты 542 спортсмены Уæрæсейы 30 регионæй. Ерыстæ цæудзысты 17 апрелæй 24 апрелмæ.
«Нæ республикæйы ис ахъаззаг спортивон традицитæ, Цæгат Ирыстоны цы спортивон скъолатæ ис, уыдонмæ фехтованийы скъола дæр хауы. Йæ хъомылгæнинæгтæ æвдисынц уарзондзинад фехтованимæ. Ахæм æмвæзады ерыстæ нæм кæй цæуынц, уый нæ бæрндзинад домы. Спортмæ ма чемпионат ноджы фылдæр фæсивæд æрбахондзæн», — загъта Сергей Меняйло.
Уый спортсментæн æмæ ерысты уазджытæн раарфæ кодта, йæ зæрдæ сын æнтыстдзинæдтæ æмæ стыр уæлахизтæ кæй зæгъы, уый бафиппайдта. Уæрæсейы чемпионаты архайынц Мæскуыйы, Бетъырбухы, Новосибирскы æмæ Курскы облæстты, Тæтæр æмæ Башкортостаны республикæты, иннæ регионты тыхджындæр командæтæ. Хъуылаты Бадзийы номыл спорты галуан «Манеж»-мæ рахиздзысты бæстæйы хуыздæр спортсментæ, Олимпиаг хъæзтыты æмæ чемпионатты призертæ, дунейы æмæ Европæйы чемпионатты уæлахиздзаутæ.
Уыдонимæ уыдзысты: рапиристкæтæ Аделинæ Загидуллина, Ларисæ Коробейникова, Мартæ Мартьянова, Кирилл æмæ Антон Борадачевтæ, Владислав Мыльников, саблисттæ Софья Великая, Янæ Егорян, Ольгæ Никитина, Софья Позднякова æмæ иннæтæ. Чемпионаты сбæрæг уыдзысты рапирæ, шпагæ æмæ æхсаргардæй хуыздæр чи арæхсы, уыдон. Хъуыддаг саразыныл бацархайдтой Уæрæсейы Спорты æмæ РЦИ-Аланийы Физкультурæ æмæ спорты министрадтæ, Уæрæсейы æмæ РЦИ-Аланийы Фехтованийы федерацитæ.
Бутаты Эльзæ
