Знон Бетъырбухы йӕ куыст райдыдта XXVI Дунеон экономикон форум. Уым архайы Цӕгат Ирыстоны делегаци республикӕйы Сӕргълӕууӕг Сергей Меняйлойы разамындӕй.
Форумы фӕлгӕты фембӕлдзысты иннӕ регионты делегацитимӕ, хъуыддаджы лӕуд адӕймӕгтимӕ ӕмӕ федералон хицаудзинады оргӕнты минӕвӕрттимӕ ӕмӕ семӕ, куыд пълан кӕнынц, афтӕмӕй бафысдзысты ӕмгуыстады бадзырдтӕ.
Форумы цаутӕн сӕ сӕйрагдӕр уыдзӕн пленарон ӕмбырд. Куыд нысангонд цӕуы, афтӕмӕй дзы раныхас кӕндзӕн бӕстӕйы Президент Владимир Путин.
Цӕгат Ирыстон бацӕттӕ кодта нӕ республикӕйы экономикон райрӕзтыл дзурӕг стенд. Амынд дзы ӕрцыдысты промышленносты, инвестициты, агропромышленнон комплексы, туризм ӕмӕ ӕндӕр къабӕзты ӕнтыстытӕ ӕмӕ нысантӕ. Презентацитӕ, цыбыр видео-равдыстытӕ ӕмӕ ӕндӕр фӕрӕзты фӕрцы форумы архайджытӕ ӕмӕ йӕ уазджытӕ базонгӕ уыдзысты Цӕгат Ирыстоны инвестицион хъомысимӕ. Нӕ республикӕ цы проекттӕ бацӕттӕ кодта, уыдоны ‘хсӕн сты: афӕдзы дӕргъы дӕр уӕзӕгтӕ ласынӕн транспортон-логистикон нырыккондӕр инфраструктурӕйы арӕзтад; сӕнӕфсиры хуызтӕ садзын, стӕй дзы сӕн уадзыны куыстуаты арӕзтад; йӕ фӕзуат 60 гектары кӕмӕн бацахсдзӕн, ахӕм хъӕрмуаты арӕзтад; тематикон парк «Аланийы парк»-ы ӕмӕ туристон-рекреацион комплекс «Къӕхтысӕр»-ы арӕзтӕдтӕ.
Уымӕй уӕлдай, форумы ӕвдыст ӕрцӕудзӕн туристон кластер саразыны фӕдыл проект. Стӕй ма дзы йӕ уазджытӕ базонгӕ уыдзысты, куыд арӕзт цӕуынц туристон-рекреацион комплекс «Мамысон», сойджын туагадтӕ уадзыны завод, агрокомплекс Мӕздӕджы ӕмӕ IT-хъӕу.
Бетъырбухы Дунеон экономикон форум ацы аз цӕудзӕн 14-17 июны. Йӕ сӕйраг темӕ у: «Хӕдбар рӕзт — рӕстаг дунейы бындур. Фидӕны фӕлтӕрты сӕраппонд баиу кӕнӕм нӕ тыхтӕ». Программӕмӕ гӕсгӕ, арӕзт ӕрцӕудзӕн 140 алыхуызон мадзӕлттӕ, сӕ архайджытӕ та уыдзысты мин адӕймагӕй фылдӕр.
Экономикон форум у, дунейы чи ӕрцӕуы, уыцы хъуыддаджы цаутӕн сӕ егъаудӕртӕй иу. Арӕзт цӕуы 1997 азӕй фӕстӕмӕ, 2006 азӕй фӕстӕмӕ та — нӕ бӕстӕйы Президент Владимир Путины комкоммӕ архайды фӕрцы. Афтӕмӕй, 26 азмӕ уый ссис, глобалон экономикӕйы ахсджиагдӕр фарстатыл ныхас кӕныны ӕмӕ экономикӕйы фидар рӕзты нысанимӕ ӕппӕт дунейы дӕр хуыздӕр фӕлтӕрддзинадимӕ зонгӕ кӕныны раззагдӕр дунеон фӕзуат.
Форумы нысантӕ, йӕ программӕмӕ гӕсгӕ, сты дунеон ӕмӕ уӕрӕсейаг экономикӕйы, стӕй социалон фарстатыл ӕмӕ технологиты райрӕзтыл ныхас ӕмӕ сӕ лыг кӕнын.
ДЕДЕГКАТЫ Зӕлинӕ
