Хурхӕтӕны мӕйы 15 боны газет «Рӕстдзинад»-ы куы бакастӕн «Иры Стыр Ныхас»-ы ӕгъдӕутты комитеты сӕрдар Моргуаты Эдиславы ӕрмӕг «Кӕдмӕ ӕмӕ цӕмӕ ‘нхъӕлмӕ кӕсӕм?», зӕгъгӕ, уӕд та мӕн дӕр бафӕндыд мӕ хъуыдытӕ зӕгъын. Чидӕртӕ афтӕ хъуыды кӕнынц, зӕгъгӕ, дам, сылгоймаджы та цы хъуыддаг ис ӕгъдӕутты тыххӕй дзурынмӕ, фӕлӕ ӕз никуы кастӕн ӕмӕ нӕ кӕсын куыдфӕндыйы цӕстӕй ӕхсӕнадон цардмӕ. Нӕ мадӕлон ӕвзаг ӕмӕ нӕ рӕсугъд ӕгъдӕутты хъысмӕт мӕ мӕты дӕр ӕмӕ сагъӕсы дӕр ӕфтауы. Ӕмӕ та ныр дӕр мӕ хъуыдытӕ ӕргомӕй зӕгъын. Кӕд раст нӕ дӕн, уӕд развӕлгъау курын хатыр.
Нӕ абоны риссаг фарстаты тыххӕй Эдислав цыдӕриддӕр зӕгъы, уыдон иууылдӕр тынг раст сты. Дзуры нӕ царды ӕцӕгдзинад. Нӕ рӕсугъд ӕгъдӕуттӕ ныззыгъуыммӕтӕ сты. Мӕнмӕ афтӕ кӕсы, ӕмӕ ӕппӕты стырдӕр аххосаг ис уый мидӕг, ӕмӕ бахаудыстӕм ӕдзӕстуарзондзинад, хӕлӕгдзинады уацары. Уый, дам, мӕнӕй цӕмӕй лӕгдӕр у? Уымӕн цӕмӕн ис, мӕнӕн — цӕуылнӕ? ӕз цы хъӕубӕсты, сыхбӕсты схъомыл дӕн, уым-иу кӕрӕдзи ӕнтыстдзинӕдтыл райгӕ кодтой хистӕрӕй, кӕстӕрӕй. Стыр аргъгӕнӕг уыдысты хъӕубӕсты, сыхбӕсты дзырддзӕугӕ, куырыхон хистӕртӕн. Уыдоны ныхасмӕ, сӕ уынаффӕмӕ хъуыстой иууылдӕр. Ахӕм фӕткӕвӕрд абон цӕхгӕр фӕивта. Ӕз стыр аргъгӕнӕг дӕн «Иры Стыр Ныхас»-ы уӕнгтӕй алкӕмӕн дӕр. О, раст у, фӕстаг рӕстӕг сӕ архайд фӕлӕмӕгъдӕр. Фӕлӕ уымӕн дӕр ис йӕхи аххосаг. Адӕмыл низӕфтауӕг рын куы ахӕлиу, уӕд, ай-гъай, тӕссаг уыд ӕмбырдтӕ, фембӕлдтытӕ аразын. Иннӕмӕй та, сӕрмагонд ӕфсӕддон операци дӕр нӕ куырыхон хистӕрты куыстмӕ бахаста къуылымпыдзинад. Абон афтӕ чи зӕгъы, ӕмӕ цӕмӕн хъӕуынц, цы кусынц «Иры Стыр Ныхас»-ы уӕнгтӕ, уыдон тынг рӕдийынц. Афтид рӕзгӕ фӕлтӕримӕ цы ахадгӕ куыст кӕнынц, уый дӕр кӕуылты у! Кӕд ӕмӕ сӕ равзӕрстам, уӕд сӕм хъусгӕ та цымӕ цӕуылнӕ кӕнӕм? Цӕмӕй не ‘гъдӕуттӕ сӕ гаччы сбадой, иудзинад нӕм уа, уый тыххӕй цы удуӕлдай архайд кӕнынц, уый хъуамӕ алчидӕр уына ӕмӕ ӕмбара. Фӕлӕ нӕ иуӕй-иуты нӕ фӕнды хорзӕй хорз зӕгъын. Ӕмӕ алчидӕр ӕгъдӕуттӕ кӕны йӕхирдыгонау. Кӕд иу адӕм, иу туг, иу стӕг стӕм, уӕд не ‘гъдӕуттӕ дӕр хъуамӕ иухуызон уой. Ӕппынфӕстаг, мӕнӕ ирон ӕмбисонд куыд зӕгъы: «Кӕй уӕрдоны бадыс, уый зарӕг кӕн». Раст зӕгъы Эдислав, цалдӕр азы размӕ «Стыр Ныхас» мыхуыры рауагъта цыбыр бӕрӕгуат «Чындзхаст, чызгӕрвыст ӕмӕ марды ӕгъдӕуттӕ». Фӕлӕ ахӕм бӕрӕгуат дӕр ис, уый, ӕвӕццӕгӕн, бирӕтӕ зонгӕ дӕр нӕ кӕнынц. «Иры Стыр Ныхас»-ы уӕнгтӕ йыл бакуыстой, бафыдӕбон ыл кодтой ӕмӕ нын ӕй балӕвар кодтой. Мах сын хъуамӕ нӕ сӕртӕй ныллӕг кувӕм, арфӕтӕ сын хъуамӕ кӕнӕм. Ӕмӕ сын сӕ куыстмӕ фаутӕ хӕссыны бӕсты сӕ фарсмӕ хъуамӕ ӕрбалӕууӕм нӕлгоймагӕй, сылгоймагӕй не ‘ппӕт дӕр.
Ӕрӕджы сӕмбӕлдтӕн зианы афӕдзы кӕнды Дзӕуджыхъӕуы. Ам федтон ӕцӕг ирон ӕгъдау. Кӕддӕр-иу мӕ райгуырӕн хъӕубӕсты цы рӕсугъд ӕгъдау кодтой, уый ма ныр федтон. Ӕмӕ банкъардтон стыр ӕхсызгондзинад. Фынгыл хистӕрӕн бадт Хозиты Барис. Уымӕн ӕз дӕн стыр аргъгӕнӕг йӕ ирондзинад, йӕ адӕймагдзинад, йӕ профессион арӕхстдзинады тыххӕй. Ӕмӕ йӕ ацы фынгыл хистӕры бынаты бадгӕ куы федтон, уӕд мын ӕмбӕрстгонд уыд, ам ӕгъдӕуттӕ сӕ уагыл кӕй уыдзысты, уый. Хъуыстон ӕм тынг лӕмбынӕг. Куыд фӕзӕгъынц: йӕ алы ныхас дӕр — карст, барст. Мӕнӕ абон нӕ цины ӕмӕ нӕ зианы ӕгъдӕуттӕ бахӕр, бануазыны охыл куыд кӕнынц, уый дзы нӕ федтон. Фӕлӕ кӕрӕй-кӕронмӕ федтон ӕцӕг ирон ӕгъдау. Кӕй зӕгъын ӕй хъӕуы, уыдис дзы ахӕмтӕ дӕр (зӕгъон ӕй дӕрзӕгӕй), куы-иу бафсӕст, уӕд-иу фестад. Фӕлӕ ахӕм ӕнӕуаг адӕймӕгтӕн Барис сӕ «рохтыл» хорз хӕцыд. Цалынмӕ ӕцӕг ирон ӕгъдауы домӕнтӕ ӕххӕстгонд ӕрцыдысты, уӕдмӕ сӕ нӕ бауагъта сыстын. Мӕ фарсмӕ ма бадт ӕцӕг ирон ацӕргӕ сылгоймӕгтӕ, кӕцытӕ дӕр мӕн хуызӕн зӕрдиагӕй хъуыстой Барисмӕ. Ӕхсызгон сын уыд уыдонӕн дӕр ацы ирон фынджы ӕгъдау. ӕмӕ бадты кӕрон иумӕ бацыдыстӕм Барисмӕ ӕмӕ йын фӕарфӕтӕ кодтам…
Ӕз разы дӕн Эдиславимӕ, ома, хъӕуты, сыхбӕсты, горӕтты бирӕуӕладзыгон хӕдзӕртты кӕртыты Ныхасты куыст базмӕлын кӕнын хъӕуы. Алы хъӕуы дӕр, алы сыхы дӕр ис ахӕм куырыхон лӕгтӕ, кӕцытӕ, мӕнӕ Барисы хуызӕн, хорз зонынц ирон фынджы ӕгъдӕуттӕ. ӕмӕ уыдон бӕстон дзуриккой адӕмимӕ. ӕз афтӕ хъуыды кӕнын, ӕмӕ ахӕм мадзӕлттӕ стыр ахъаз фӕуиккой нӕ иудзинадӕн.
Фӕрниаты Рая,
газет «Рӕстдзинад»-ы иузӕрдион хӕлар
