Уыд Республикæ Цæгат Ирыстон-Аланийы Парламенты советы радон æмбырд. Амыдта йæ Парламенты Сæрдар Тускъаты Таймураз.
Депутаттæ æркастысты æмæ равзæрстой республикæйы социалон-экономикон æмæ æхсæнадон-политикон цардимæ баст федералон æмæ республикон закъонты проекттæ — цыппорæй фылдæр.
Советы уæнгтæ байхъуыстой «2023 азы фыццаг æмбисы Республикæ Цæгат Ирыстон-Аланийы Юстицийы министрады Управленийы архайды тыххæй» хъусынгæнинагмæ. Раныхасгæнæг уыд Управленийы разамонæг Цхуырбаты Владимир. Куыд загъта, афтæмæй республикæйы ныртæккæ ис 917 æнæкоммерцион организацийы, 428 æхсæнадон организацийы, 112 дины организацийы, æндæр организацитæ — 323, 31 хъазахъхъаг æхсæнады æмæ 23 политикон партийы регионалон хайады. Се ‘ппæт дæр сæ куыст аразынц федералон закъонæвæрынады бындурыл. «Йæ архайдмæ гæсгæ фæсарæйнаг агентыл банымайæн кæмæн ис кæнæ экстремистон архайд чи кæны, ахæмтæ республикæйы нæй», — загъта Цхуырбаты Владимир. Афæдзы æмбисы дæргъы Управленийы кусджытæ, пъланмæ гæсгæ, сарæзтой 22 бæрæггæнæн мадзалы, æмæ уыдоны фæдыл рахастой аст фæдзæхсты æмæ административон барадхалæн цауы фæдыл — æртæ суагъæйы. Цхуырбайы-фырт куыд загъта, афтæмæй стыр æргом здæхт цыд алы адæмыхæттытæ æмæ динты ‘хсæн ахастдзинæдтæм æмæ национ-культурон æхсæнадты архайдмæ. Уымæй уæлдай, раныхасгæнæг бæстон æрдзырдта нотариалон къанторы, адвокатурæты, Юридикон бюройы куысты тыххæй.
Фарстайы фæдыл æмдоклад скодта Парламенты Сæрдары хæдивæг Ортабайты Тимур.
«Республикæ Цæгат Ирыстон-Аланийы Горæтгæрон районы бюджетæн 2021-2022 азты республикон бюджетæй лæвæрд фæрæзты ‘хсæн трансферттæй куыд фæстауæрцгæнгæ æмæ хæдзардзинæй æрцыд пайдагонд, уый сбæрæг кæныны тыххæй» хъусынгæнинагимæ раныхас кодта республикæйы Нымайæн-цæстдарæн палатæйы аудитор Созæты Алан. Куыд загъта, афтæмæй районы бюджеты æфтиæгтæ амынд рæстæгмæ рауадысты 1 миллиард 850 милуан сомы, кæнæ та пълангонд бæрæггæнæнтæн сæ 100,5 проценты; хæрдзтæ — 1 миллиард 824 милуан сомы, кæнæ та пълангонд бæрæггæнæнтæн сæ 95,4 проценты. Афтæмæй районы бюджет рауад æфтиагджын — 25 милуан сомы. Муниципалон хæс 83 процентæй фæкъаддæр, æмæ ма республикæйæ дардтой 3 милуаны 700 мин сомы, фæлæ абоны бонмæ уыцы хæс дæр район бафыста. Созæйы-фырты ныхасмæ гæсгæ, муниципалон бюджет ногæй æфтиагджындæр уа, уый сæ бон у, фæлæ æппæт гæнæнтæй дæр районы пайдагонд нæма цæуы.
Фарстайы фæдыл æмдоклад скодта Парламенты бюджеты, хъалонты, исбонад æмæ кредитон организациты комитеты сæрдары хæдивæг Тауытты Алыксандр. Советы уæнгтæм цы фарстытæ сæвзæрд, уыдонæн дзуаппытæ радта Горæтгæрон районы бынæттон хиуынаффæйады администрацийы сæргълæууæг Есиаты Руслан.
Депутаттæ ма байхъуыстой, «2020-2024 азтæм «Республикæ Цæгат Ирыстон-Аланийы хъæды хæдзарады райрæзты» Республикæ Цæгат Ирыстон-Аланийы паддзахадон программæ 2020-2022 азты куыд æххæстгонд цыд, уый фæдыл республикæйы экологи æмæ æрдзон фæрæзты министр Бæззаты Вадимы раныхасмæ. Куыд загъта, афтæмæй, министрады куысты бæрæггæнæнтæм гæсгæ, Цæгат Ирыстон у, хуыздæртыл нымад чи ‘рцыд, уыцы уæрæсейаг дæс регионæй иу.
Фарстайы фæдыл æмдоклад скодта Парламенты аграрон фарстаты, зæххы политикæйы, экологи æмæ æрдзон фæрæзты комитеты сæрдар Кочораты Олег.
Уымæй уæлдай, советы уæнгтæ цы республикон закъонты æмæ уынаффæты проекттæ равзæрстой, уыдон баст уыдысты культурæ, экономикæ æмæ социалон къабæзты лыггæнинаг фарстатæ закъонæвæрынадон бындурыл алыг кæнынимæ. Раныхасгæнджытæ уыдысты: Парламенты наукæйы, ахуырады, культурæ æмæ информацион политикæйы комитеты сæрдар Еленæ Князева, социалон политикæйы, æнæниздзинад хъахъхъæнынад æмæ ветеранты хъуыддæгты фæдыл комитеты сæрдар Реуазты Ларисæ, промышленносты, транспорты, бастдзинад æмæ амалхъомады комитеты сæрдар Киситы Мурат, национ политикæ æмæ фæсивæды хъуыддæгты фæдыл комитеты сæрдар Джиоты Георги.
Советы уæнгтæ ивддзинæдтæ бахастой Республикæ Цæгат Ирыстон-Аланийы æвдæм равзæрст Парламенты Закъонæвæрынадон архайды пъланмæ æмæ Парламенты иуæй-иу комитетты скондмæ, стæй сфидар кодтой Парламенты æхсæрдæсæм æмбырды боны фæтк.
Дедегкаты Зæлинæ
