РЦИ-Аланийы Сæргълæууæг Сергей Меняйло сарæзта æмбырд Республикæйы наркотикты ныхмæ архайæг къамисæн. Цы фарстатæм æркастысты, уыдонæй иу — республикæйы синтетикон наркотиктæ, психотропон буаргъæдтæ æмæ афтекты хосты хуызы наркотикты æнæзакъон зилдухы ныхмæ цы мадзæлттæ арæзт цæуы, уый.
Æмбырд байгом кæнгæйæ, Сергей Меняйло бахахх кодта, республикæйы фæзуаты наркотиктæ парахат кæныны хъуыддаг актуалон кæй у, æмæ бахæс кодта фарстайыл дзуапдæттæг ведомствæтæн, цы тасдзинад сæвзæрд, уый ныхмæ хъæддыхдæрæй лæууын.
— Нæ республикæйы наркомани куыд парахат кæны, уый тынг сагъæссаг у. Кæд наркотикты æнæзакъон зилдухы ныхмæ барадхъахъхъæнæн æмæ профилактикон мадзæлттæ арæзт цæуынц, уæддæр уавæр тæссаг у, бынтон фæдисы уавæр та сæвзæрд, афтектæ хосты хуызы цы наркотиктæ уæй кæнынц, уыдонимæ, — загъта РЦИ-Аланийы Сæргълæууæг.
Республикæйы разамонæг ма фæбæрæг кодта, синтетикон наркотикты æнæзакъон зилдух дзæвгар кæй сырæзыд, æмæ дзы чи фæхъæстæ вæййы, уыдоны æнæниздзинадæн стыр зиан кæй хæссынц.
Ацы азы дæс мæйы барадхъахъхъæнджытæ ныхгæдтой, наркотиктæ республикæмæ кæцæй цыдысты, ахæм 33 гуырæны, уыдонæй 24 — синтетикон наркотиктæ. Ахæм нымæцтæ æрхаста РЦИ-Аланийы Мидхъуыддæгты министрады наркотикты зилдухмæ цæстдарæг управленийы разамонæджы хæстæ рæстæгмæ æххæстгæнæг Игорь Захарченко. Уый ма фæбæрæг кодта, синтетикон наркотиктæ иугай адæймæгтæ æмæ къордтæй кæй парахат кæнынц, сусæг ран сæ бамбæхсгæйæ, «тайник»-ты руаджы. Ноджы ма афтектæй исынц, мæнг рецепттæ скæнгæйæ, тыхджын препараттæ æмæ сæ уæй кæнынц.
РЦИ-Аланийы «Росздравнадзор»-ы разамонæг Ольгæ Давыдова куыд загъта, афтæмæй азы райдайæнæй нырмæ афтекты организацитæй æстдæсæн бафæдзæхстой æгъдаухæлдтытæ ма ‘руадзыны тыххæй. Уымæй уæлдай ма ацы аз сæхгæдтой 53 интернет-сайты, семæ — предметон-нымæцон хыгъды цы хостæ ис, уыдон дистанцион хуызы чи уæй кодта, ахæмтæ.
Сергей Меняйло бафæдзæхста дзуапдæттæг оргæнтæн сæрæндæрæй бæлвырд кæнын æмæ æфхæрын, æнæ рецепттæй наркотикты бæсты кæй æлхæнынц, уыцы тыхджын хостæ уæйгæнæг афтекты разамонджыты. Ноджы ма бахæс кодта Хуссар Ирыстонимæ арæныл, контролон-уадзæн пункт «Дæллаг Зæрæмæг»-ы фæтыхджындæр кæнын оперативон-агурæн æмæ бæлвырдгæнæн архайд, уавæрмæ иудадзыг цæст дарын.
Æмбырды архайджытæ æркастысты РЦИ-Аланийы паддзахадон программæ «Æнæзакъонæй психотропон буаргъæдтæ фæлхасгæнджыты, æнæ дохтыры амындæй психоактивон буаргъæдтæ чи фæлхас кæны, уыцы адæймæгты реабилитаци æмæ ресоциализацийы иумæйаг мадзæлттæм». 2024 азмæ царды уагъд цы программæ цæуы, уый фæлгæты хуыздæр кæнынц медицинон уагдæтты, реабилитацион центры материалон-техникон базæ, наркоманийæ рынчынты сбæлвырд æмæ реабилитаци кæныны мадзæлттæ.
Программæйæн цы фæрæзтæ уагъд æрцыд, уыдоны руаджы къухы бафтыд наркологон службæ сифтонг кæнын Уæрæсейы Президенты фæдзæхстытæм гæсгæ. Арæзт æрцыд Цæгат Кавказы фыццаг паддзахадон реабилитацион центр наркоманийæ рынчынтæн, фæзынд реабилитаци æмæ куыстадон ресоциализацийы программæ.
Сергей Меняйло сæрмагондæй æрлæууыд фæндагон-транспортон фыдбылызтæ саразджытæй наркотикты фæлхасгæнджыты уавæр сбæлвырд кæныны фарстайыл. Æнæниздзинад хъахъхъæнынады министр Тебиаты Сослан куыд фæбæлвырд кодта, афтæмæй 1 декабрæй фæстæмæ республикæйы фæндæгтыл кусын райдыдта цæугæ медицинон комплекс, уый Паддзахадон автоинспекци æмæ Мидхъуыддæгты министрадимæ иумæ уыцы хъуыддагыл архайдзысты.
Кæронбæттæны æмбырды архайджытæ сбæлвырд кодтой Республикæйы наркотикты ныхмæ архайæг къамисы куысты пълан фидæны азмæ.
РЦИ-Аланийы Сæргълæууæджы
æмæ Хицауады пресс-службæ
