РЦИ-Аланийы Сæргълæууæджы цур Инвалидты хъуыддæгты советы æмбырды равзæрстой уæлбар хостæй ифтонг кæныны, реабилитацийы техникон фæрæзтæ дæттыны, се ‘нæниздзинадмæ гæсгæ цыбыр авналæнтимæ сывæллæтты ахуыр, куысты бынæттæ сын кæнынимæ баст фарстатæ. Амыдта йæ Хицауады Сæрдар Дзанайты Барис.
Æнæниздзинад хъахъхъæнынады ведомствæйы разамонæг Тебиаты Сослан куыд радзырдта, афтæмæй Цæгат Ирыстоны цæрджытæй паддзахадон æххуыс социалон лæггæдтæ исыны федералон хыгъды сты 94,7 мин адæймаджы. Уыдонæй æрмæстдæр 18,7 мин адæймаджы сразы сты лæвар хостæ исыныл. Иннæтæ равзæрстой æхца.
Федералон уæлбар лæггæдтæ исджытæн 2023 азы бæстæйы бюджетæй радих кодтой 260 милуан сомы, регионалон бюджетæй республикæйы льготниктæн радтой 630 милуан сомæй фылдæр. Ныхас ма рауад, сæ авналæнтæ се ‘нæниздзинадмæ гæсгæ цыбыргонд кæмæн сты, уыцы адæмы медицинон реабилитацийы фæдыл. Ныртæккæ уыцы нысантæ æххæст кæнынц амбулаторитæ æмæ рынчындæттæ.
Дзанайты Барис куыд бафæдзæхста, афтæмæй пайда кæнын хъæуы цæугæ медицинон комплекстæй дæр. Уыдон ацæуынц дæрддзæф хъæутæм, инвалидтимæ кусынæн сын фадæттæ ис. Уымæй уæлдай, хъуамæ æппæт медицинон ног авналæнтæ инвалидтæм фæхæстæгдæр кæной. Медико-социалон экспертизæйы сæрмагонд программæтæ æххæст кæнынæн инвалидты хъæуынц реабилитацийы фæрæзтæ. Социалон фонды регионалон управленийы разамонæджы хæдивæг Дойаты Дианæ куыд радзырдта, афтæмæй Социалон фонд уыцы нысантæн радих кодта 170 милуан сомы.
Инвалид-сывæллæтты ахуырады фарстаты тыххæй раныхас кодта ахуырады ведомствæйы разамонæг Алыбегты Эллæ. Аразынц сын фадатджын уавæртæ скъолаты. Уыцы фарстатæм каст цæуы дарддæр дæр, хъавынц скъолайы агъоммæ, скъолайы, уæлæмхасæн, дæсныйадон ахуырады æппæт парахат фадæттæ скæнын. Ацы аз скуыстой инклюзивон боныгон лагертæ, аутизмимæ сабитæн рæвдауæндон. Республикæйы ис 5 коррекцион центры, 8 скъолайы кусынц фæстауæрцон кълæстæ. Скъола каст чи фæцис, уыцы æвзонг адæмæн скодтой уавæртæ сæ дарддæры фæндагæн, сæ бон у дæсныйад райсын, фæстæдæр та куысты ныллæууын.
«Росздравнадзор»-ы регионалон управленийы разамонæг Ольгæ Давыдова куыд фæбæрæг кодта, афтæмæй хъуамæ ахуырадон хъуыддаджы нымад цæуа инвалидтæн хъарм хæринаг дæттыны фарста дæр. Зæгъæм, сæкæрнизæй рынчын сывæллæттæн хъæуы сæрмагонд меню. Алыбегты Эллæйы ныхасмæ гæсгæ, скъолатæ хъуамæ Хойраджы комбинатмæ æрвитой куырдиæттæ.
Дзанайты Барис куыд загъта, афтæмæй цыбыргонд авналæнтимæ сывæллæттæн сæ царды уавæртæ хуыздæргонд хъуамæ цæуой. «Реабилитацийы мадзæлттæ исой, се ‘ппæт фæзилæнтæ нымад цæуой. Æртæ азмæ лæвар хостæн æртæ хатты фылдæр æхца исæм, РЦИ-Аланийы Сæргълæууæг фарстатæм у къæрцхъус. Иугæр нæм инвалид æрхатыд, уæд ын программæты тыххæй дзурын нæ хъæуы, фæлæ æцæг æххуыс бакæнын. Уый тыххæй нæм алцыдæр ис. Се ‘нæниздзинадмæ гæсгæ цыбыргонд авналæнтимæ адæм хъуамæ ахуырад дæр исой, кусгæ дæр кæной, бæрæгбæттæ дæр бæрæг кæной — æхсæнады царды уой сæрæн архайджытæ», — загъта Хицауады Сæрдар.
Уый тыххæй фехъусын кодта РЦИ-Аланийы Сæргълæууæджы æмæ Хицауады пресс-службæ.
Æхсараты Розæ
