РЦИ-Аланийы Хицауады Сæрдар Дзанайты Барис видеоконференцийы бастдзинады фæрцы архайдта Стратегион хъæппæристы федералон агентады уæрæх æмбырды. Агентады генералон директор Светланæ Чупшевайы разамындæй фембæлды архайджытæ æрдзырдтой 2023 азы куысты рагагъоммæ бæрæггæнæнтыл, стæй фæбæрæг кодтой 2024 азы архайды сæйрагдæр нысантæ.
Зындгонд куыд у, афтæмæй Стратегион хъæппæристы агентад æмæ Цæгат Ирыстон кусынц ахсджиаг иумæйаг проекттыл. Уыдон сахаддзысты республикæйы промышленност, ахуырад æмæ иннæ къабæзтыл. Уыдоны нымæцы — проектон-ахуырадон интенсив «Архипелаг» дæр. Ацы æмæ иннæ проекттæ царды рауадзыны æмгъуыдтæ фæбæлвырддæр кодтой æмбырды архайджытæ.
Дзанайты Барис йæ дзуаппон раныхасы куыд бафиппайдта, афтæмæй Цæгат Ирыстон зæрдиагæй архайы агентады программæтæ æмæ проектты.
— Республикæйы Сæргълæууæг Сергей Меняйло Хицауады уæнгты размæ сæвæрдта бæлвырд хæс — Стратегион хъæппæристы агентадимæ æмархайд æнгомдæр кæнын. Уымæн ахъаз у, республикæ æмæ агентад æмгуыстады фарстаты фæдыл ацы аз цы сæрмагонд бадзырд бафыстой, уый дæр. Зæрдыл дарын хъæуы, амынд агентады проекттæ æмæ программæтæ Уæрæсейы граждæнты царды фæрныгад хъомысджындæр кæнынмæ здæхт кæй сты, уый, — загъта Хицауады Сæрдар.
Видеоконференцийы фæстæ Дзанайты Барис бæлвырд амынддзинæдтæ радта профилон республикон ведомствæты разамонджытæн Стратегион хъæппæристы агентадимæ æмархайд хъомысджындæр кæныны нысанимæ.
РЦИ-Аланийы
Сæргълæууæджы æмæ Хицауады
пресс-службæ
