Цæгат Ирыстоны 2024 азы 180 милуан сомæй фылдæр уагъд æрцæудзæн промышленносты рæзтæн феххуыс кæнынмæ. Уый тыххæй фехъусын кодта профилон министрады пресс-службæ.
«Уæлæмхасæн фæрæзтæ ратдзысты республикон «Промышленносты райрæзты фонд»-æн. Уыцы фæрæзты руаджы регионалон фонд дарддæр финансон æгъдауæй æххуыс кæндзæн промышленнон куыстуæттæн ифтонггæрзтæ æмæ станоктæ балхæнынæн. Ацы бонмæ уал «Промышленносты райрæзты фонд»-æн радтой уæлæмхасæн 335,4 милуан сомы бæрц, æмæ уый руаджы дæс промышленнон проектæн баххуыс кодта æхцайæ.
Фонд уæлæмхасæн кæй райста, уыцы фæрæзтæ йын йæ гæнæнтæ фæфылдæр кæндзысты ацы аз дæр республикæйы промышленнон куыстуæттæн паддзахадон æххуыс радтынæн», — фæбæрæг кодтой ведомствæйы.
Уæрæсейы Федерацийы Промышленност æмæ базарады министрадимæ бафыст бадзырды бындурыл федералон бюджетæй Цæгат Ирыстоны бюджетмæ 2024 азы кæй æрбарвиттдзысты, уыцы субсидийы бæрц, æмткæй райсгæйæ, у 80,7 милуан сомы, республикæйы бюджетæй та промышленнон куыстуæттæн ратдзысты 100,0 милуан сомы.
Гапбаты Алетæ
