Ацы бонты горæт Сочийы, федералон ахуырадон центр «Сириус»-ы йæ куыст кæны Фæсивæды дунеон фестиваль. Иннæ уæрæсейаг регионтæ æмæ бирæ фæсарæйнаг делегациты æмрæнхъ уыцы стыр æмбырды архайынц Цæгат Ирыстоны фæсивæды минæвæрттæ дæр. Знон форумы кадджын уазæг уыд РЦИ-Аланийы Сæргълæууæг Сергей Меняйло.
Зындгонд куыд у, афтæмæй фестивалы мадзæлтты 1 мартъийæ 7 мартъийы онг архайдзысты 30 мин æрыгон адæймаджы æппæт уæрæсейаг регионтæ æмæ дунейы 188 бæстæйæ. Цæгат Ирыстонæй форумы архайынц 90 адæймаджы. Уыимæ, фестивалмæ сæрмагонд делегаци ссыд Хуссар Ирыстонæй дæр.
Знон фестивалы мадзæлттæ бабæрæг кодта Сергей Меняйло. РЦИ-Аланийы Сæргълæууæгæн боны дæргъы уыд цалдæр цымыдисаг фембæлды. Зæгъæм, Уæрæсейы Æфснайæн банчы сæрдар Герман Грефимæ Сергей Меняйло фæбæлвырд кодта республикæ æмæ амынд финансон структурæйы иумæйаг проектты уагæвæрдтæ. Республикæйы дарддæры райрæзтыл ныхас рауад æндæр федералон ведомствæты разамонджытимæ дæр.
Фæлæ, кæй зæгъын æй хъæуы, форумы сæйрагдæр фембæлдтытæ баст сты фæсивæды цардимæ, æрыгон фæлтæры тыхстаг фарстатæ æмæ хъæппæристимæ. Æппæт уыдæттыл Сергей Меняйлойæн цымыдисаг ныхас рауад Цæгат æмæ Хуссар Ирыстоны делегациты уæнгтимæ.
— Абон сæмбæлдтæн Сочимæ, цæмæй балæууон нæ фæсивæды фарсмæ, — йæ раныхасы бафиппайдта Сергей Меняйло. — Æхсызгон мын у, нæ республикæйы фæсивæд фестивалы æппæт мадзæлтты дæр зæрдиагæй кæй архайынц, сæ зонындзинæдтæ æмæ арæхстдзинад ирдæй кæй æвдисынц, уый.
Фембæлды архайджытæ бирæ фарстытæ радтой республикæйы разамонæгмæ, фæхæццæ йæм кодтой сæ хъæппæристæ æмæ фæндæттæ…
Уыцы бон Сергей Меняйло уæрæх интервью радта информацион агентад «ТАСС»-æн дæр.
Фæсивæды дунеон фестивалы фембæлдтыты тыххæй бæстондæр æрмæг кæсут газеты хæстæгдæр номырты.
Нæ уацхæссæг
